༄༅། །འདི་གར་ས་གནས་ནས་བཏང་གནས་ནང་འཁོད་དོན། བལ་ཡུལ་མཆོད་འཇོར་བོད་མིའི་ས་གནས་ལས་ཁུངས་ཀྱི་ཚོགས་ཁང་དུ་བོད་མི་སྐྱབས་བཅོལ་བ་རྣམས་ལ་ཨ་རི་ནས་ཐོན་པའི་ (Johnson & Johnson) ཏོག་དབྱིབས་གཉན་རིམས་སྔོན་འགོག་གི་སྨན་ཁབ་དམིགས་གསལ་ཟུར་དུ་བརྒྱབ་ཐུབ་པ་བྱུང་བ་དང་། སྐབས་དེར་བལ་ཡུལ་གཞུང་དང་ས་གནས་ཀྱི་འཕྲོད་བསྟེན་ཚན་པའི་འགན་འཛིན་དང་ས་གནས་ཉེན་རྟོག་སྐུ་སྲུང་བའི་སྤྱི་ཁྱབ་མཆོག དེ་བཞིན་ས་གནས་གཞུང་གི་དཔོན་རིགས་སོགས་ཧ་ཅང་གི་གཟིགས་པ་ཆེན་པོས་ཕེབས་གནང་ཡོད། མཆོད་འཇོར་ཁུལ་གྱི་སེར་སྐྱ་མི་མང་སུམ་སྟོང་མ་ཟིན་ཙམ་ལ་ལས་ཁུངས་ངོས་ནས་ཏོག་དབྱིབས་སྔོན་ཁབ་ཐོབ་ཆེད་ཀྱི་རྒྱབ་གཉེར་ཡིག་ཆ་གནང་ཡོད་པ་དང་། མང་པོ་ཞིག་ཐད་ཀར་དཔྱ་དངུལ་ལག་དེབ་འཁྱེར་ནས་ཐོབ་པ་ཕུད་རེས་གཟའ་ཟླ་བའི་ཉིན་མི་གྲངས་ ༩༡༠ དང་། རེས་གཟའ་མིག་དམར་ཉིན་མི་གྲངས་ ༧༨༠ བཅས་ལ་སྔོན་ཁབ་བརྒྱབ་ཐུབ་པ་སོགས་སྔར་དང་མི་འདྲ་བའི་ཆེ་མཐོང་བྱུང་བ་རྣམས་སྤྱིར་༸གོང་ས་༸སྐྱབས་མགོན་ཆེན་པོ་མཆོག་གི་ཐུགས་རྗེ་བཀའ་དྲིན་དང་། ལྷག་པར་བོད་མིའི་སྒྲིག་འཛུགས་ཀྱི་མཛད་ཇུས་ཐབས་ལམ་དང་ལམ་སྟོན་འོག་བྱུང་བ་ལགས་སོ།།