༄༅། །ཨུ་རུ་སུའི་རྒྱལ་ས་མོ་སི་ཁོར་རྟེན་གཞི་བྱས་པའི་རྒྱ་གར་གྱི་གཞུང་ཚབ་ཁང་དང་། ཨུ་རུ་སུའི་ཚན་རིག་ཤེས་ཡོན་བསྟི་གནས་ཁང་། ཝི་ཝེ་ཀ་ནནྡཱ་རྒྱལ་སྤྱིའི་ཐེབས་རྩ་ཁང་བཅས་ཐུན་མོང་གི་གོ་སྒྲིག་འོག་དྲ་ལམ་བརྒྱུད་རྒྱ་གར་དང་ཨུ་རུ་སུ་དབར་ནང་བསྟན་རིག་གཞུང་སྤེལ་རེས་ (India-Russia Exchanges on Buddhism) ཞེས་པའི་བརྗོད་གཞིའི་ཐོག་ཚོགས་འདུ་ཚོགས་ཡོད།

དེ་ཡང་ཨུ་རུ་སུའི་རྒྱལ་ས་མོ་སི་ཁོར་རྟེན་གཞི་བྱས་པའི་རྒྱ་གར་གྱི་གཞུང་ཚབ་ཆེན་མོ་ཝེན་ཀ་ཊེཤ་ཝར་མ་ (D.B. Venkatesh Varma) ལགས་ཀྱིས་ཚོགས་འདུ་དབུ་འབྱེད་སྐབས་གསུང་བཤད་གནང་དོན། ཚོགས་འདུའི་སྡིངས་ཆ་འདི་བརྒྱུད་ཁྱད་མཁས་པ་རྣམས་འདུ་འཛོམས་ཐོག་ཕྱོགས་གཉིས་ཀྱི་རྒྱལ་ཁབ་དབར་འབྱུང་འགྱུར་ཤེས་ཡོན་དང་། རིག་གཞུང་། ཚན་རིག་ཉམས་ཞིབ་བཅས་ཀྱི་ཐད་མཉམ་འབྲེལ་ཇི་ལྟར་གནང་ཐུབ་པའི་ཐབས་ལམ་གྲོས་བསྡུར་སྐོར་ཡིན། ཞེས་དང་།

འདི་ནི་རྒྱ་གར་གྱི་སྲིད་བློན་ན་རེནྡྲ་མོ་དི་ (Narendra Modi) མཆོག་གིས་ནང་པའི་ཤེས་ཡོན་རྒྱ་གར་ཙམ་མ་ཡིན་པར་རྒྱལ་སྤྱིའི་སྟེང་གོང་མཐོར་གཏོང་བཞིན་པའི་སྲིད་བྱུས་ཤིག་ཡིན། ཞེས་གསུངས།

ཚོགས་འདུའི་ཐོག་རུ་སོག་སྐུ་ཚབ་དོན་གཅོད་ཏེ་ལོ་རིན་པོ་ཆེ་མཆོག་དང་། ལྦར་ཎ་དབུས་བོད་ཀྱི་ཆེས་མཐོའི་གཙུག་ལག་སློབ་གཉེར་ཁང་གི་ཉེ་བའི་རིགས་བདག་དགེ་བཤེས་ངག་དབང་བསམ་གཏན་ལགས། དེ་བཞིན་རྒྱ་གར་དང་ཨུ་རུ་སུའི་ཁྱད་མཁས་པ་ཁག་གཅིག་སོགས་མཉམ་ཞུགས་གནང་ཡོད། རུ་སོག་སྐུ་ཚབ་དོན་གཅོད་ཏེ་ལོ་རིན་པོ་ཆེ་མཆོག་གིས། ཨུ་རུ་སུ་དང་རྒྱ་གར་དབར་དཔལ་འབྱོར་དང་ཆབ་སྲིད་ཀྱི་འབྲེལ་བ་ཙམ་མིན་པར་ནང་བསྟན་གྱི་འབྲེལ་བ་ཡང་གཏིང་ཟབ་ཡོད། ནང་བསྟན་རྒྱ་གར་ནས་བོད་ལ་དར། བོད་ནས་སོག་ཡུལ་ལ་དར། དེ་ནས་ཨུ་རུ་སུར་དར་བའི་རྒྱ་གར་དང་ཨུ་རུ་སུ་དབར་གྱི་འབྲེལ་བའི་སྐོར་གསུངས་ཡོད།

གཞན་ཡང་ཁོང་གིས་སོག་པོའི་སློབ་ཕྲུག་ཁག་གཅིག་རྒྱ་གར་ནང་ཡོད་པའི་བོད་པའི་དགོན་སྡེ་ཁག་ཏུ་སློབ་གཉེར་ཆེད་བཏང་བའི་སྐོར་དང་། རྒྱ་གར་གཞུང་གིས་མཐུན་འགྱུར་རོགས་རམ་གནང་བར་བརྟེན་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གི་དགོངས་བཞེད་ལྟར་བོད་ཀྱི་དགོན་སྡེ་ཁག་རྒྱ་གར་ནང་སླར་ཡང་འཛུགས་སྐྲུན་གནང་ཐུབ་ཡོད་པ་སོགས་ཀྱི་སྐོར་གསུངས།

ཝི་ཝེ་ཀ་ནནྡཱ་རྒྱལ་སྤྱིའི་ཐེབས་རྩ་ཁང་གི་ངེས་སྟོན་པ་ཨར་ཝིནྟ་གུབ་ཊ་ (Dr. Arvind Gupta) ལགས་ཀྱིས་ཚོགས་འདུ་གཙོ་སྐྱོང་གནང་ཡོད་པ་བཅས།།