༄༅། །ཕྱི་ལོ་ ༢༠༢༡ ཟླ་ ༧ ཚེས་ ༣༠ ཉིན་གྱི་སྔ་དྲོར་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་དྲ་ལམ་བརྒྱུད་ཨ་རིའི་ཕྱི་སྲིད་ལྷན་ཁང་གི་མང་གཙོ་དང་འགྲོ་བ་མིའི་ཐོབ་ཐང་། ངལ་རྩོལ་གོང་འཕེལ་ལས་དོན་ཚན་པའི་ (Bureau of Democracy, Human Rights, and Labor) འགན་འཛིན་རྣམ་པ་དང་ལྷན་ཚོགས་འདུ་ཚོགས་གནང་ཡོད།

ཐེངས་འདིའི་དྲ་ཐོག་གི་ཚོགས་འདུའི་སྟེང་ཨ་རིའི་ཕྱི་སྲིད་ལྷན་ཁང་གི་མང་གཙོ་དང་འགྲོ་བ་མིའི་ཐོབ་ཐང་། ངལ་རྩོལ་གོང་འཕེལ་ལས་དོན་ཚན་པའི་དྲུང་ཆེ་ལས་རོགས་ལི་ས་པེ་ཊར་སན་ (Lisa Peterson) ལགས་དང་།  དྲུང་གཞོན་ལས་རོགས་ལས་ཚབ་གཙོ་བོ་སི་ཁོ་ཊི་ (Scott Busby) ལགས།  དམིགས་བསལ་ཕྱག་རོགས་ཨན་ཊོན་ (Anton Jongeneel) ལགས། སི་ཊེ་ཕེ་ནེ་སན་ཌི་བྷེག་ (Stephanie Sandbeck) ལགས། ཌེ་ཝི་ཌི་ཨི་ལི་བྷར་ (David Elber) ལགས། མར་གྷི་རེ་ཊི་ཊར་ལེ་ (Margreet Turley) ལགས་བཅས་དང་། བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་དང་། ཕྱི་འབྲེལ་དྲུང་ཆེ་ཀརྨ་ཆོས་དབྱིངས་ལགས། དྲིལ་བསྒྲགས་དྲུང་ཆེ་འཆི་མེད་ཚེ་དབྱངས་ལགས། བྱང་ཨ་རིའི་སྐུ་ཚབ་དོན་གཅོད་དངོས་གྲུབ་ཚེ་རིང་ལགས་བཅས་མཉམ་ཞུགས་གནང་ཡོད།དེ་ཡང་ཆུ་ཚོད་གཅིག་ཙམ་རིང་གི་ཚོགས་འདུའི་ཐོག་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་བོད་རྒྱའི་གནད་དོན་གསལ་སླད་འབྱུང་འགྱུར་གྱི་འཆར་གཞི་དང་ལས་གཞི་ཁག་གི་སྐོར་དང་། བཙན་བྱོལ་བོད་མི་རྣམས་ལ་འཕྲད་བཞིན་པའི་དཀའ་ངལ་དག་ལ་གདོང་ལེན་གནང་ཕྱོགས་སོགས་ཀྱིས་གཙོས་གནད་དོན་གལ་ཆེ་ཁག་གཅིག་གི་སྐོར་གསུངས་ཡོད།

གཞན་ཡང་དཔལ་ལྡན་སྲིད་སྐྱོང་མཆོག་གིས་གལ་ཏེ་རྒྱ་གར་དང་ཨ་རིའི་གཞུང་གིས་གཏོང་ཕོད་ཆེན་པོའི་སྒོ་ནས་མཐུན་འགྱུར་རོགས་རམ་གནང་མེད་ཚེ་བོད་མིའི་གནས་སྟངས་ད་ལྟ་ནང་བཞིན་སྲ་བརྟན་གནས་ཐུབ་ཀྱི་མེད་སྟབས། རྒྱ་གར་དང་ཨ་རིའི་གཞུང་གིས་གཙོས་མི་མང་བཅས་ལ་ཐུགས་རྗེ་ཆེ་ཞུ་རྒྱུ་ཡིན། ཞེས་དང་། ད་དུང་ཡིན་ནའང་མུ་མཐུད་བོད་མི་རྣམས་ལ་རོགས་སྐྱོར་གནང་དགོས་པའི་རེ་སྐུལ་ཞུ་རྒྱུ་ཡིན། ཞེས་གསུངས།

ཕྱོགས་མཚུངས་དཔལ་ལྡན་སྲིད་སྐྱོང་མཆོག་གིས་ཏོག་དབྱིབས་གཉན་རིམས་འདི་མགྱོགས་མྱུར་ཞི་བ་ཡིན་ན་ཨ་རིར་ཆེད་བཅར་གྱིས་ཁོང་རྣམ་པར་མཇལ་འཕྲད་གནང་རྒྱུ་ཡིན་པ་སོགས་ཀྱི་སྐོར་གསུངས། ཨ་རིའི་ཕྱི་སྲིད་ལྷན་ཁང་གི་ལས་བྱེད་རྣམ་པས་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་ལ་འོས་བསྡུའི་ཁྲོད་རྒྱལ་ཁ་ཐོབ་པར་དམིགས་བསལ་འཚམས་འདྲི་ཞུས་གནང་བ་དང་སྦྲགས་དཔལ་ལྡན་སྲིད་སྐྱོང་མཆོག་དང་ལྷན་དུ་མཉམ་ལས་གནང་རྒྱུའི་འདུན་པ་ཤུགས་ཆེ་ཡོད་སྐོར་གསུངས། དེ་བཞིན་ཁོང་རྣམ་པས་དཔལ་ལྡན་སྲིད་སྐྱོང་མཆོག་གི་ལས་དོན་ཐམས་ཅད་ལམ་ལྷོངས་ཡོང་བའི་སྨོན་འདུན་ཞུས་གནང་ཡོད།

ཨ་རི་གཞུང་གིས་བདུན་ཕྲག་ཁ་ཤས་ནང་ཨ་རིའི་བོད་དོན་དམིགས་བསལ་འབྲེལ་མཐུད་པ་གསར་པ་བསྐོ་གཞག་གནང་ཐུབ་པའི་ཚོད་དཔག་གནང་བཞིན་ཡོད། བྱང་ཨ་རིའི་སྐུ་ཚབ་དོན་གཅོད་དངོས་གྲུབ་ཚེ་རིང་ལགས་ཀྱིས་ཨ་རིའི་ཕྱི་སྲིད་ལྷན་ཁང་གི་མང་གཙོ་དང་འགྲོ་བ་མིའི་ཐོབ་ཐང་། ངལ་རྩོལ་གོང་འཕེལ་ལས་དོན་ཚན་པའི་འབྲེལ་ཡོད་ལས་བྱེད་རྣམ་པས་བོད་དོན་ཆེད་དུ་ཐུགས་ཁུར་ཆེ་བཞེས་ཀྱིས་རྒྱབ་སྐྱོར་གནང་དང་གནང་བཞིན་པར་ཐུགས་རྗེ་ཆེ་དང་། མ་འོངས་པར་མུ་མཐུད་བོད་དོན་སླད་དེ་ལྟར་རྒྱབ་སྐྱོར་གནང་བའི་རེ་སྐུལ་ཞུས་གནང་ཡོད་པ་བཅས།།