༄༅།།བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་ཕྱི་ལོ་ ༢༠༢༡ ཟླ་ ༧ ཚེས་ ༥ རེས་གཟའ་ཟླ་བའི་ཉིན་བོད་ཀྱི་སྨན་རྩིས་ཁང་དུ་འཚམས་གཟིགས་སུ་ཕེབས་ཡོད།
དེ་ཡང་གོང་ཚེས་ཉིན་གྱི་སྔ་དྲོ་ཆུ་ཚོད་ ༡༡།༥༠ ཙམ་ལ་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་བོད་ཀྱི་སྨན་རྩིས་ཁང་གི་ཚོགས་ཁང་དུ་ཕེབས་བསྟུན་སྨན་རྩིས་ཁང་གི་འགན་འཛིན་བཀྲ་ཤིས་ཚེ་རིང་ལགས་ཀྱིས་གཙོས་སྡེ་ཚན་ཁག་གི་འགན་འཛིན་རྣམས་ཀྱིས་དཔལ་ལྡན་སྲིད་སྐྱོང་མཆོག་ལ་རྟེན་འབྲེལ་མཇལ་དར་སྒྲོན་འབུལ་ཞུས་གྲུབ་མཚམས་བོད་ཀྱི་སྨན་རྩིས་ཁང་གི་འགན་འཛིན་བཀྲ་ཤིས་ཚེ་རིང་ལགས་ཀྱིས་ཕེབས་བསུའི་གསུང་བཤད་གནང་གྲུབ་མཚམས་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་མཆོག་གིས་གསུང་བཤད་གནང་དོན། བོད་ཀྱི་སྨན་རྩིས་ཁང་གི་འགན་འཛིན་དབུས་པའི་ལས་བྱེད་ཡོངས་ལ་ངས་བོད་མིའི་སྒྲིག་འཛུགས་དང་སྒེར་གྱི་ངོས་ནས་ཐོག་མར་འཚམས་འདྲི་ཞུ་རྒྱུ་ཡིན། ངས་སྲིད་སྐྱོང་གི་དམ་འབུལ་ཞུས་ཏེ་བོད་ཀྱི་སྨན་རྩིས་ཁང་དུ་གཞུང་འབྲེལ་འཚམས་གཟིགས་ཐེངས་དང་པོ་དེ་ཡིན། ཕྲན་རང་ཉིད་སྨན་གྱི་སློབ་སྦྱོང་བྱེད་མྱོང་མེད་། འོན་ཀྱང་འདིར་བོད་ཀྱི་སྨན་རྩིས་ཁང་དུ་ངོ་ཤེས་པ་དང་སྨན་པ་དང་ལྷན་དུ་སྨན་སོགས་ཀྱི་སྐོར་བཀའ་མོལ་མང་པོ་ཡོང་གི་ཡོད།ཕྱི་ལོ་ ༡༩༦༡ ནས་འགོ་འཛུགས་ཀྱིས་ཕྱི་ལོ་ ༡༩༨༡ ལོར་དངོས་སུ་བོད་ཀྱི་སྨན་རྩིས་གསར་འཛུགས་གནང་བའི་འོག་ད་བར་ཡར་རྒྱས་ཇི་ལྟར་ཕྱིན་ཡོད་སྐོར་སྡེ་ཚན་གྱི་ལས་འགན་ངོ་སྤྲོད་གནང་ཡོང་དུས་བོད་མིའི་སྒྲིག་འཛུགས་ལས་སྨན་རྩིས་ཁང་འདི་བཞིན་རྒྱ་ཆེ་བ་ལྟ་བུ་འདུག སྤྱི་ཡོངས་ནས་བོད་ཀྱི་སྨན་རྩིས་ཁང་བརྒྱུད་མིའི་གཟུགས་ཁམས་དང་སེམས་ཁམས་གཉིས་ཀར་ཕན་ཐོགས་ཆེན་པོ་ཡོད་པ་ཙམ་མ་ཟད། སྒྲིག་འཛུགས་རང་གི་ཐོག་ནས་ད་ལྟའི་འགོ་ལས་སློབ་ཕྲུག་གི་གྲངས་འབོར་ ༨༨༥ ཙམ་ལ་ཕྱག་ལས་གནང་ཐུབ་གྱི་ཡོད་པ་དང་། ཁོང་རྣམ་པའི་འཚོ་བའི་མདུན་ལམ་ཐོག་ཐུགས་ཕན་གསོ་ཐུབ་ཀྱི་ཡོད། འདི་ཡང་ཕན་ཐོགས་ཤུགས་ཆེན་པོ་སྒྲུབ་ཀྱི་ཡོད།
ངས་སྲིད་སྐྱོང་གི་ལས་འཁུར་ཞུས་ཏེ་ཟླ་བ་གཅིག་ལྷག་འགྲོ་གི་ཡོད། འོན་ཀྱང་གྲོས་ཚོགས་འཚོགས་མ་ཐུབ་པར་བརྟེན་བཀའ་བློན་རྣམ་པ་ཕེབས་ཐུབ་ཀྱི་མེད། ལས་དོན་བྱེད་ཕྱོགས་ཐད་དུས་ཚོད་ཀྱི་དཀའ་ངལ་ཕྲན་བུ་ཙམ་མ་གཏོགས་ལུས་སེམས་ཀྱི་དཀའ་ངལ་དམིགས་བསལ་གང་ཡང་མི་འདུག བོད་ཀྱི་སྨན་རྩིས་ཁང་འདི་བཞིན་ཚན་པ་རྒྱ་ཆེན་པོ་དང་ཕྱག་ལས་གནང་མཁན་མང་པོ། ལྷག་པར་ཕྱི་མི་དང་ལྷན་དུ་འབྲེལ་བ་མང་པོ་ཡོང་གི་ཡོད་སྟབས། སྨན་རྩིས་ཁང་དུ་ཕྱག་ལས་གནང་མཁན་ཞིག་ཡིན་པར་བརྟེན་གཙོ་བོ་སྨན་རྩིས་ཁང་གི་ལས་དོན་སྒྲུབ་དགོས་ཀྱི་ཡོད། ཕྲན་རང་ཉིད་སྲིད་སྐྱོང་གི་ལས་ཁུར་ཞུས་པ་ནས་བཟུང་བོད་མིའི་སྒྲིག་འཛུགས་ཀྱི་ལས་ཁུངས་ཁག་གི་ཚན་པ་སོ་སོས་ལས་དོན་བྱེད་ཕྱོགས་སོགས་རྒྱུས་ལོན་བྱས་པའི་སྐབས་བོད་མིའི་སྒྲིག་འཛུགས་ནང་ལས་བྱེད་རྒན་གྲས་མང་ཆེ་བ་མེད་པ་དང་འབྲིང་བ་གང་འཚམ་ཡོད་པ། ལྷག་པར་གཞོན་སྐྱེས་མང་པོ་ཡོད། སྒྲིག་འཛུགས་སུ་ལས་བྱེད་རྒན་པ་ཡོད་པའི་སྐབས་ལས་བྱེད་གཞོན་པ་རྣམས་གསོ་སྐྱོང་བྱེད་རྒྱུ་ཧ་ཅང་གལ་ཆེན་པོ་རེད།
ཕྱོགས་མཚུངས་སྒྲིག་འཛུགས་ཀྱི་ལས་བྱེད་སུ་འདྲ་ཞིག་ཡིན་རུང་སོ་སོའི་ཚན་པའི་ལས་དོན་གལ་ཆེན་པོ་ཡིན་པ་དང་། དེ་ལས་སྒྲིག་འཛུགས་ཀྱི་ལས་དོན་སྤྱི་ཡོངས་ལ་དོ་སྣང་བྱེད་དགོས་རྒྱུ་གལ་ཆེན་པོ་ཡིན། དེ་ལས་གལ་ཆེ་བ་བོད་ཀྱི་རྩ་དོན་བསྒྲུབ་རྒྱུ་དེ་རེད། སྤྱི་ནོར་༸གོང་ས་༧སྐྱབས་མགོན་ཆེན་པོ་མཆོག་གིས་ལམ་སྟོན་དང་། བོད་མི་མང་སྤྱི་འཐུས་ལྷན་ཚོགས་ནས་སྤྱི་མོས་ཐོག་གཏན་འབེབས་གནང་བའི་དབུ་མའི་ལམ་གྱི་སྲིད་བྱུས་གཞིར་བཟུང་བོད་མིའི་སྒྲིག་འཛུགས་ནས་སྲིད་བྱུས་འདི་ཉིད་བརྒྱུད་རྒྱ་ནག་གཞུང་དང་གང་ཐུབ་སྙོབས་རྒྱུའི་འབད་བརྩོན་ཞུ་རྒྱུ་ཡིན། ད་ལྟའི་རྒྱ་ནག་གཞུང་གི་གནས་སྟངས་ལ་བལྟས་ཚེ་ཅུང་ཁག་པོ་ཡོད་པ་ལྟ་བུ་རེད་འདུག འོན་ཀྱང་ང་ཚོའི་ཐབས་རྩོད་འདི་བཞིན་གནས་དགོས་ཀྱི་ཡོད། མུ་མཐུད་དབུ་མའི་ལམ་གྱི་སྲིད་བྱུས་བརྒྱུད་རྒྱ་ནག་གཞུང་དང་འབྲེལ་བ་བྱ་རྒྱུ་ཡིན། གྲ་སྒྲིག་སྡུག་ས་དང་རེ་བ་བཟང་ས་ནས་བརྒྱག་རྒྱུ་ཡིན།
བཀའ་ཤག་སྐབས་བཅུ་དྲུག་གིས་ལས་འགན་གཙོ་བོ་ནི་བོད་རྒྱའི་དཀའ་རྙོག་དང་འབྲེལ་བའི་གནད་དོན་རྣམས་གཙོ་བོར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་དགོངས་པ་གཞིར་བཟུང་ལག་བསྟར་ཞུ་རྒྱུ་ཡིན། གཞན་ཡང་བོད་ནང་གི་གནས་ཚུལ་མཁོ་སྒྲུབ་བྱ་རྒྱུར་འབད་བརྩོན་བྱེད་རྒྱུ་ཡིན། ང་ཚོས་བོད་ནང་གི་དངོས་ཡོད་གནས་ཚུལ་ཤེས་པའི་ཐོག་ཕྱི་རྒྱལ་ཡུལ་གྲུ་ཁག་དང་མང་ཚོགས་ལ་གོ་རྟོགས་སྤེལ་དགོས་རྒྱུ་གལ་ཆེན་པོ་རེད། ཅེས་དང་། གཞན་ཡང་དཔལ་ལྡན་སྲིད་སྐྱོང་མཆོག་གིས་བོད་མིའི་སྒྲིག་འཛུགས་ཀྱི་ལས་དོན་བྱེད་ཕྱོགས་སྐོར་ངོ་སྤྲོད་ཞིབ་རྒྱས་གནང་ཡོད་པ་བཅས། །