༄༅། །བོད་མིའི་བླ་ན་མེད་པའི་དབུ་ཁྲིད་འཛམ་གླིང་ཞི་བདེའི་དེད་དཔོན་ཆེན་མོ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་འགྲོ་བ་ལྷ་དང་བཅས་པའི་མགོན་དཔུང་དུ་སྐུ་བལྟམས་ཏེ་དགུང་གྲངས་ ༨༦ ལ་ཕེབས་པའི་༸སྐུའི་འཁྲུངས་སྐར་གྱི་མཛད་སྒོ་གཟབ་རྒྱས་ཤིག་ཨོ་གླིང་རྒྱལ་ཁབ་ཀྱི་ལྷོ་ཕྱོགས་གྲོང་ཁྱེར་གནས་མཁར་གསར་ (Newcastle) ཞེས་པའི་ས་གནས་བོད་རིགས་ཚོགས་པ་དང་ཨོ་གླིང་བོད་ཀྱི་མདའ་རྩལ་ཚོགས་པ་ (Australian Tibetan Archery Talent) ཐུན་མོང་གི་གོ་སྒྲིག་འོག་ཕྱི་ལོ་ ༢༠༢༡ ཟླ་ ༦ ཚེས་ ༡༥ ཉིན་ཨོ་སི་ཊོ་ལི་ཡའི་གྲོང་ཁྱེར་གནས་མཁར་གསར་ཁུལ་དུ་རྟེན་གཞི་བྱས་པའི་བྷོ་ལ་རོ་བྷོ་མན་ (Boolaroo Bowmen) མདའ་རྩེད་ལྷན་ཚོགས་ཀྱི་རྩེད་ཐང་དུ་སྲུང་བརྩི་ཞུས་ཡོད།
མཛད་སྒོའི་ཐོག་ཨོ་སི་ཊི་ལི་ཡའི་སྐུ་ཚབ་དོན་གཅོད་ཀརྨ་སེངྒེ་ལགས་དང་། སྐབས་བཅུ་བདུན་པའི་བདམས་ཐོན་སྤྱི་འཐུས་རྡོ་རིང་བསྟན་འཛིན་ཕུན་ཚོགས་ལགས། གཞན་ཡང་སྐུ་མགྲོན་རྣམ་པ། དེ་བཞིན་ས་གནས་མི་མང་བཅས་ཕེབས་ཡོད།དེ་ཡང་མཛད་སྒོའི་ཐོག་མར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་སྐུ་ཚེ་བསྐལ་བརྒྱར་བརྟན་སླད་ས་གནས་མང་ཚོགས་ནས་བསང་གསོལ་དང་། ༧རྒྱལ་བའི་ཞབས་བརྟན་གསུང་འདོན་གནང་རྗེས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་སྐུ་པར་མཐོལ་གྲོལ་རིན་པོ་ཆེར་མཇལ་དར་ཕུལ་ཏེ་མཇལ་ཁ་ཞུས་ཡོད།

དེ་རྗེས་སྐུ་མགྲོན་གཙོ་བོ་ཨོ་སི་ཊི་ལི་ཡའི་སྐུ་ཚབ་དོན་གཅོད་ཀརྨ་སེངྒེ་ལགས་ཀྱིས་མཛད་སྒོ་དབུ་འབྱེད་དང་འབྲེལ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ད་བར་འགྲོ་བ་མི་སྤྱིའི་ཁེ་ཕན་ལ་དམིགས་ཏེ་འགྲོ་བ་མིའི་བྱམས་བརྩེ་དང་ཆོས་ལུགས་ནང་ཁུལ་མཐུན་སྒྲིལ་གོང་མཐོར་མཛད་བཞིན་པ་སོགས་ཀྱི་སྐོར་གསུངས།

གཞན་ཡང་ཁོང་གིས་ཨོ་སི་ཊོ་ལི་ཡའི་གྲོང་ཁྱེར་གནས་མཁར་གསར་ཁུལ་གྱི་ཕ་མ་དང་དང་བླངས་དགེ་རྒན་རྣམ་པས་ཧུར་ཐག་གིས་བོད་པའི་ཕྲུ་གུ་རྣམས་ལ་བོད་ཀྱི་སྐད་ཡིག་དང་རིག་གཞུང་སོགས་སློབ་ཁྲིད་གནང་ཐུབ་ཡོད་སྟབས་རྗེས་སུ་ཡི་རང་ཞུས་གནང་ཡོད།མཛད་སྒོའི་ཐོག་བོད་པའི་སློབ་ཕྲུག་དང་ས་གནས་བོད་མི་རྣམས་ནས་སྲོལ་རྒྱུན་གཞས་སྣ་འཁྲབ་སྟོན་ཞུས་རྗེས་སྲོང་བཙན་རུ་ཁག་དང་ཁྲི་རལ་རུ་ཁག་གཉིས་དབར་བོད་པའི་སྲོལ་རྒྱུན་གྱི་མདའ་རྩལ་འགྲན་བསྡུར་འགོ་བཙུགས་ཞུས་ཡོད། འགྲན་སྡུར་ཁྲོད་སྲོང་བཙན་རུ་ཁག་ལ་རྒྱལ་ཁ་ཐོབ་ཡོད། མེལ་སྦོན་དང་། ཨོ་གླིང་ས་གནས་ནང་ཁུལ་མདའ་རྩལ་འགྲན་སྡུར་ཁྲོད་སི་ཌི་ནེ་ (Sydney) ས་གནས་རུ་ཁག་ལ་ཨང་དང་པོའི་གཟེངས་རྟགས་ཐོབ་ཡོད་པ་དང་། ཨོ་གླིང་གྲོང་ཁྱེར་བྷི་རི་སི་བྷེན་ ( Brisbane) ས་གནས་རུ་ཁག་ལ་ཨང་གཉིས་པ་དང་གནས་མཁར་གསར་ (Newcastle) ས་གནས་རུ་ཁག་ལ་ཨང་གསུམ་པའི་གཟེངས་རྟགས་ཐོབ་ཡོད།མི་སྒེར་གྱི་མདའ་རྩལ་འགྲན་བསྡུར་ལས། ཡེ་ཤེས་བཟང་པོ་ལགས་ལ་ཨང་དང་པོའི་གཟེངས་རྟགས་དང་། མགུར་འབུམ་རྒྱལ་ལགས་ལ་ཨང་གཉིས་པ། པདྨ་ཚེ་རིང་ལགས་དང་ནམ་མཁའ་ཚེ་རིང་ལགས་ལ་ཨང་གསུམ་པའི་གཟེངས་རྟགས་ཐོབ་ཡོད། མཛད་སྒོའི་མཇུག་སྡོམ་སྐབས་སྒོར་གཞས་འཁྲབ་རྗེས་མདའ་རྩལ་འགྲན་སྡུར་ཁྲོད་རྒྱལ་ཁ་ཐོབ་མཁན་རྣམས་ལ་གཟེངས་རྟགས་ཕུལ་ཡོད་པ་བཅས།།