༄༅། །རྒྱལ་ཚོགས་ཀྱི་གནམ་གཤིས་འགྱུར་ལྡོག་སྐོར་གྱི་ཚོགས་འདུ་སི་ཁོ་ཊི་ལན་ཌིའི་གྷི་ལ་སི་གྷོ་གྲོང་ཁྱེར་(Glasgow)ནང་མ་འཚོགས་གོང་ཨིན་ཡུལ་སྐུ་ཚབ་དོན་གཅོད་ཁང་གི་གོ་སྒྲིག་འོག་ཕྱི་ལོ་ ༢༠༢༡ ཟླ་ ༦ ཚེས་ ༢༥ ནས་ ༢༦ བར་ཉིན་གྲངས་གཉིས་རིང་བོད་མཐོ་སྒང་གི་ཁོར་ཡུག་སྟེ་འཛམ་གླིང་གི་སྣེ་གསུམ་པའི་གནམ་གཤིས་འགྱུར་ལྡོག་གི་དཀའ་ངལ་སེལ་ཐབས་ཞེས་པའི་སྐོར་ཨིན་ཡུལ་གྱི་རྒྱལ་ས་ལོན་ཌོན་དུ་རྟེན་གཞི་བྱས་པའི་ས་ཁམས་རིག་པའི་ཚོགས་པ་ (Royal Geographical Society) རུ་འཚོགས་གཏན་འཁེལ་ཡོད།

ཚོགས་འདུའི་ཐོག་གསུང་བཤད་གནང་མཁན་རྣམས་ནི། བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་དང་། ཨ་བྷར་ཌན་མཐོ་སློབ་ཁང་གི་སི་ཁོ་ཊི་ཞིའི་ཧི་མ་ལ་ཡ་ཉམས་ཞིབ་བསྟི་གནས་ཁང་གི་འགན་འཛིན་མར་ཊིན་མི་ལི་སི་ (Dr Martin Mills) ལགས། བོད་གནས་ལྟ་ཞིབ་ཁང་གི་ཉམས་ཞིབ་པ་བསྟན་འཛིན་ཆོས་སྐྱིད་ལགས། རྒྱལ་སྤྱིའི་བོད་དོན་འབྲེལ་མཐུད་ཁང་གི་ཉམས་ཞིབ་པ་བློ་བཟང་དབྱངས་མཚོ་ལགས། རྒྱ་ནག་གྲོས་མོལ་ (Chinadialogue) ཞེས་པའི་གསར་ཁང་གི་རྩོམ་སྒྲིག་པ་དང་ཚོགས་པ་དེ་གསར་འཛུགས་གནང་མཁན་ཨི་ས་སྦེལ་ཧི་ལི་ཊོན་ (Isabel Hilton) ལགས། ཨིན་ཡུལ་གྲོས་ཚོགས་འཐུས་མི་དང་ཨིན་ཡུལ་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཚོགས་མི་ཀེ་རེ་མེག་ཁར་ཐེ་ལགས། སུད་སིའི་སྐུ་ཚབ་དོན་གཅོད་ཁང་གི་ལས་བྱེད་འཕྲིན་ལས་ཆོས་སྐྱིད་ལགས་བཅས་ཡིན་ཞིང་། བགྲོ་གླེང་གི་ལས་རིམ་ཆ་ཚང་ཨིན་ཡུལ་སྐུ་ཚབ་དོན་གཅོད་ཁང་གི་ངོ་དེབ་བརྒྱུད་ཐད་གཏོང་གནང་གཏན་འཁེལ་ཡོད་པ་བཅས། །