༄༅། ། ལྷོ་ཨ་ཕི་རི་ཀའི་རྒྱལ་ས་ཀེབ་ཊའུན་ནང་རྟེན་གཞི་བྱས་པའི་ཨིན་ཀ་ཐ་རང་དབང་ཆབ་སྲིད་ཚོགས་པའི་ (Inkatha Freedom Party) ཚོགས་གཙོ་དང་ཚོགས་པ་གསར་འཛུགས་གནང་མཁན་རྒྱལ་སྲས་སྐུ་ཞབས་མན་གྷོ་སུ་ཐུ་བྷུ་ཐེ་ལེ་ཛི་ (Prince Mangosuthu Buthelezi) མཆོག་གིས་བོད་མིའི་སྒྲིག་འཛུགས་ཀྱི་སྲིད་སྐྱོང་ཟུར་པ་བློ་བཟང་སེངྒེ་མཆོག་གིས་འདས་པའི་ལོ་ངོ་བཅུའི་རིང་ཡིད་སྨོན་སྐྱེས་འོས་པའི་དབུ་ཁྲིད་གནང་ཡོད་ཅེས་བསྔགས་བརྗོད་གནང་ཡོད།

དེ་ཡང་ཁོང་གིས་གསུང་དོན། སྐུ་ཉིད་བོད་མིའི་སྒྲིག་འཛུགས་ཀྱི་སྲིད་སྐྱོང་ཞེས་གུས་བཀུར་འོས་པའི་དབུ་ཁྲིད་ཅིག་གནང་བར་བསྔགས་བརྗོད་ཤུགས་ཆེ་ཞུ་རྒྱུ་ཡིན། སྐུ་ཉིད་ཀྱིས་སྐུ་ཞབས་སྤེན་པ་ཚེ་རིང་མཆོག་ལ་ལས་དོན་རྩིས་སྤྲོད་པར་བརྟེན་བོད་མིར་རྒྱབ་སྐྱོར་བྱེད་མཁན་ང་ཚོས་མུ་མཐུད་རང་དབང་དང་། དྲང་བདེན་འཐབ་རྩོད་བྱེད་རྒྱུའི་རེ་བ་ཆེན་པོ་ཡོད།

སྐུ་ཉིད་ཀྱི་ལས་ཡུན་རིང་བོད་ཀྱི་འཐབ་རྩོད་མདུན་ཕྱོགས་སུ་གོང་འཕེལ་འགྲོ་རྒྱུར་སྐུལ་འདེད་གནང་ཡོད་པས། མང་གཙོར་དད་གུས་བྱེད་མཁན་ཚང་མས་སྐུ་ཉིད་ལ་བཀའ་དྲིན་ཆེ་ཞུ་རྒྱུ་ཡིན། སྐུ་ཉིད་དང་ལྷན་ལས་ཀ་བྱེད་རྒྱུ་བྱུང་བ་ནི་གཟི་བརྗིད་ལྡན་པ་ཞིག་ཡིན་ལ། ལྷག་པར་དེ་སྔ་སྐུ་ཉིད་ལྷོ་ཨ་ཕི་རི་ཀར་ཕེབས་ཏེ་ང་ཚོའི་གྲོས་ཚོགས་སུ་འཚམས་གཟིགས་གནང་བའི་སྐབས་སྣེ་ལེན་ཞུ་རྒྱུ་བྱུང་བར་དགའ་ཚོར་ཆེན་པོ་བྱུང་། ཞེས་དང་།

མཐའ་དོན་ཁོང་གིས་སྲིད་སྐྱོང་ཟུར་པ་བློ་བཟང་སེངྒེ་མཆོག་ལ་འབྱུང་འགྱུར་ལོ་ཟླའི་ནང་བྱ་བ་ལམ་འགྲོ་ཡོང་བའི་སྨོན་འདུན་ཞུས་ཡོད་པ་བཅས། །