༄༅། །ཕྱི་ལོ་ ༢༠༢༡ ཟླ་ ༦ ཚེས་ ༨ རེས་གཟའ་མིག་དམར་ཉིན་ཨ་རིའི་གྲོས་ཚོགས་གོང་མའི་ནང་མང་གཙོ་ཆབ་སྲིད་ཚོགས་པ་དང་སྤྱི་མཐུན་ཆབ་སྲིད་ཚོགས་པ་ཐུན་མོང་གིས་རྒྱ་ནག་གི་ཉེན་ཁ་ལ་ཁ་གཏད་དུ་གསར་གཏོད་དང་འགྲན་སྡུར་གྱི་ཁྲིམས་འཆར་(The Innovation and Competition Act) ཞེས་པ་ཞིག་གཏན་འབེབས་གནང་འདུག

དེ་ཡང་ཨ་རིའི་ཆབ་སྲིད་ཚོགས་པ་གཉིས་ཀྱི་གྲོས་ཚོགས་འཐུས་མིས་ཁྲིམས་འཆར་དེར་མོས་མཐུན་གནང་བའི་འོས་གྲངས་ ༦༨ དང་། མོས་མཐུན་མེད་པའི་འོས་གྲངས་ ༣༢ ཡིན་ཞིང་། གསར་གཏོད་དང་འགྲན་སྡུར་གྱི་ཁྲིམས་འཆར་ཞེས་པ་དེས་ཨ་རིའི་ཚན་རིག་དང་འཕྲུལ་ལས་ལག་རྩལ་འཕེལ་རྒྱས་ཀྱི་ཆེད་དུ་ཨ་སྒོར་ཐེར་འབུམ་ ༢༥༠ ($250 billion dollars ) བཀའ་འཁྲོལ་གནང་ཡོད་པ་དང་། ཁྲིམས་འཆར་དེ་ནི་གཙོ་བོ་ཨ་རིའི་གཞུང་གིས་དེང་དུས་ཚན་རིག་དང་འཕྲུལ་ལས་ལག་རྩལ་ཐོག་རྒྱ་ནག་ལ་ཁ་གཏད་དང་འགྲན་སྡུར་གྱི་ཆེད་དུ་གཏན་འབེབས་གནང་ཡོད།

ཐེངས་འདིའི་ཁྲིམས་འཆར་གྱི་སྡེ་ཚན་ཨང་ ༣༣༠༦ ནང་བོད་དང་འབྲེལ་བའི་སྲིད་བྱུས་ (SEC. 3306. POLICY WITH RESPECT TO TIBET) ཞེས་པའི་སྡེ་ཚན་ཞིག་འཁོད་ཡོད་པ་དང་། དེའི་ནང་ཨ་རིའི་སྲིད་འཛིན་གྱིས་ཨ་རིའི་གྲོས་ཚོགས་གོང་མའི་ལམ་སྟོན་དང་མོས་མཐུན་ཡོད་པའི་ཐོག་བོད་དོན་དམིགས་བསལ་འབྲེལ་མཐུད་པ་ཞིག་བསྐོ་བཞག་གནང་རྒྱུ་དང་། ཡང་ན་ཨ་རིའི་ཕྱི་སྲིད་ལྷན་ཁང་གི་དྲུང་ལས་ཀྱི་གནས་རིམ་ཚད་མཉམ་ཡོད་པའམ་དེ་ལས་མཐོ་བའི་ལས་བྱེད་ཅིག་བསྐོ་བཞག་གནང་རྒྱུ་ཡིན་པ་འཁོད་ཡོད་པ་མ་ཟད། ཨ་རིའི་གཞུང་གིས་ཁྲིན་ཏུའུ་གྲོང་ཁྱེར་དང་བོད་ཀྱི་རྒྱལ་ས་ལྷ་སར་ཨ་རིའི་གཞུང་གི་ཡན་ལག་གཞུང་ཚབ་ཁང་ཚུགས་མ་ཐུབ་པར་དུ་རྒྱ་ནག་གི་རྒྱལ་ས་པེ་ཅིན་དུ་ཡོད་པའི་ཨ་རིའི་གཞུང་ཚབ་ཁང་གི་ཆབ་སྲིད་སྡེ་ཚན་ནང་བོད་དང་འབྲེལ་བའི་སྡེ་ཚན་ཞིག་གསར་འཛུགས་དགོས་པ་འཁོད་ཡོད།

ཨ་རིའི་ཕྱི་སྲིད་ལྷན་ཁང་གི་དྲུང་ཆེས་པེ་ཅིན་དུ་ཡོད་པའི་ཨ་རིའི་གཞུང་ཚབ་ཁང་གི་ཆབ་སྲིད་སྡེ་ཚན་གྱི་བོད་དང་འབྲེལ་བའི་སྡེ་ཚན་དུ་ཨ་རིའི་མི་གཉིས་ལས་མི་ཉུང་བ་ཐད་ཀར་བསྐོ་གཞག་དང་། ས་གནས་ཀྱི་མི་གཅིག་ལས་མི་ཉུང་བ་བསྐོ་བཞག་གནང་དགོས་པ་འཁོད་ཡོད།

ཁྲིམས་འཆར་དེའི་ནང་ཕྱི་ལོ ༢༠༢༠ ལོའི་བོད་དོན་སྲིད་བྱུས་དང་རྒྱབ་སྐྱོར་གྱི་ཁྲིམས་འཆར་ (Tibetan Policy and Support Act of 2020) སྐོར་ནན་ཏན་གྱིས་གནད་དོན་འཁོད་ཡོད་པ་གཞན་ཞིག་ནི། ཨ་རིའི་ངོས་ནས་ཨ་རིའི་ཕྱི་སྲིད་ལྷན་ཁང་གི་དྲུང་ཆེར་ཨ་རིའི་མཐུན་ཕྱོགས་རྒྱལ་ཁབ་ཁག་དང་ལྷན་དུ་བོད་མིའི་ཆོས་ཕྱོགས་ཀྱི་དབུ་ཁྲིད་རྣམ་པ་ཚོར་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གི་མ་འོངས་ཡང་སྲིད་ངོས་འཛིན་ཞུ་ཕྱོགས་ཐད་རྒྱབ་སྐྱོར་དང་། རྒྱ་ནག་གིས་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གི་མ་འོངས་ཡང་སྲིད་ངོས་འཛིན་ཐད་ཐེ་བྱུས་བྱེད་བཞིན་པར་ངོ་རྒོལ་གནང་དགོས་པའི་སྐུལ་འདེད་གནང་དགོས་པ་འཁོད་ཡོད།

ཁྲིམས་འཆར་དེའི་སྡེ་ཚན་ཨང་ ༣༣༠༧ ནང་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་མ་འོངས་ཡང་སྲིད་དང་བོད་མི་ནང་པའི་ཆོས་དད་རང་དབང་སྐོར་འཁོད་པ་ལྟར་ན། རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་གཞུང་ངམ་གཞུང་གཞན་པ་གང་རུང་ཞིག་གིས་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གི་མ་འོངས་ཡང་སྲིད་ངོས་འཛིན་ཐད་ཐེ་བྱུས་བྱས་ཚེ་དེ་ནི་བོད་མི་དང་བོད་མི་ནང་པ་ཡོངས་ཀྱི་ཆོས་དད་རང་དབང་གི་ཐོབ་ཐང་ལོག་སྤྱོད་བྱས་པར་ངོས་འཛིན་ཁ་གསལ་བྱེད་དགོས་ཞེས་འཁོད་ཡོད།

ཕྱོགས་མཚུངས་ཁྲིམས་འཆར་དེའི་ནང་ཨ་རིའི་ཕྱི་སྲིད་ལྷན་ཁང་གི་དྲུང་ཆེས་ཨ་རིའི་མཐུན་ཕྱོགས་རྒྱལ་ཁབ་ཚོ་དང་ལྷན་དུ་བོད་མིའི་ཆོས་ཕྱོགས་ཀྱི་དབུ་ཁྲིད་ཚོར་༸རྒྱལ་དབང་སྐུ་ཕྲེང་བཅུ་བཞི་པ་ཆེན་པོ་མཆོག་གི་ཡང་སྲིད་ངོས་འཛིན་ཐད་རྒྱབ་སྐྱོར་དང་། རྒྱ་ནག་གཞུང་གིས་ཁོང་ཚོར་༸རྒྱལ་དབང་སྐུ་ཕྲེང་བཅུ་བཞི་པ་ཆེན་པོ་མཆོག་གི་ཡང་སྲིད་ངོས་འཛིན་ཞུ་རྒྱུའི་བདག་དབང་ཡོད་པའི་སྐོར་རྗོད་བཞིན་པར་ངོ་རྒོལ་གནང་རྒྱུ། དེ་བཞིན་རྒྱ་ནག་གཞུང་གིས་བོད་མི་ནང་པའི་ཆོས་དད་རང་དབང་ལ་ཐེ་བྱུས་བྱེད་བཞིན་པ་བཅས་ལ་ཨ་རི་དང་ཨ་རིའི་མཐུན་ཕྱོགས་རྒྱལ་ཁབ་ཚོས་ངོས་ལེན་གནང་རྒྱུ་མེད་པའི་ཐད་ཕྱག་ལས་གནང་དགོས་པ་འཁོད་ཡོད་པ་བཅས།།