༄༅། །ཕྱི་ལོ་ ༢༠༢༡ ཟླ་ ༦ ཚེས་ ༡༥ ཉིན་ཨ་རིའི་སྲིད་འཛིན་སྐུ་ཞབས་ཇོ་བཱཡི་ཌེན་ (Joe Biden) མཆོག་དང་། ཡུ་རོབ་སྤྱི་མཐུན་ཚོགས་པའི་འགན་འཛིན་སྐུ་ཞབས་ཆར་ལེ་སི་མ་ཡི་ཀེལ་ ( Charles Michel ) མཆོག ཡུ་རོབ་སྤྱི་མཐུན་ཚོགས་པའི་འཛིན་སྐྱོང་ལྷན་ཁང་གི་འགན་འཛིན་ལྕམ་སྐུ་ཨུར་སུ་ལ་ཝོན་ཌེར་ལེ་ཡེན་ (Ursula von der Leyen) མཆོག་བཅས་དབུ་བཞུགས་ཐོག་ཨ་རི་དང་ཡུ་རོབ་སྤྱི་མཐུན་ཚོགས་པ་གཉིས་ཀྱིས་སྦེལ་ཇམ་གྱི་རྒྱལ་ས་སྦར་སིལ་ནང་ཆེས་མཐོའི་ལྷན་ཚོགས་ཀྱི་ཚོགས་འདུ་ཚོགས་ཡོད་པ་དང་། ཚོགས་འདུ་གྲོལ་རྗེས་ཨ་རི་དང་ཡུ་རོབ་སྤྱི་མཐུན་ཚོགས་པ་གཉིས་ཀྱིས་ཐུན་མོང་གིས་བསྒྲགས་གཏམ་ཞིག་སྤེལ་སྐབས་རྒྱ་ནག་གིས་བོད་ནང་གི་འགྲོ་བ་མིའི་ཐོབ་ཐང་རྩིས་མེད་རྡོག་རོལ་གཏོང་བཞིན་པའི་སྐོར་ཐུགས་འཚབ་དང་སྦྲགས་གླེང་སློང་ཤུགས་ཆེ་གནང་འདུག

དེ་ཡང་ཨ་རི་དང་ཡུ་རོབ་སྤྱི་མཐུན་ཚོགས་པ་གཉིས་ཀྱིས་རྒྱ་ནག་གི་དྲག་པོའི་སྟོབས་ཤུགས་ལ་གདོང་ལེན་ཆེད་དུ་མཉམ་རུབ་ཐོག་མང་གཙོ་དང་རྒྱལ་སྤྱིའི་འགྲོ་བ་མིའི་ཐོབ་ཐང་སྲུང་སྐྱོབ་དང་། དེ་བཞིན་ལྐོག་ཟ་རུལ་སུངས་མེད་པར་བཟོ་རྒྱུ་ཡིན་པའི་སྐོར་ཤུགས་ཆེ་གསུངས་ཡོད།

ཐེངས་འདིའི་ཨ་རི་དང་ཡུ་རོབ་སྤྱི་མཐུན་ཚོགས་པ་གཉིས་ཀྱི་ཆེས་མཐོའི་ལྷན་ཚོགས་ཀྱི་ཚོགས་འདུ་ནི། ཕྱི་ལོ་ ༢༠༡༤ ལོ་ནས་བཟུང་ད་བར་གྱི་ཚོགས་འདུ་ཐེངས་དང་པོ་དེ་ཆགས་ཡོད་པ་དང་། ཕྱི་ལོ་༢༠༡༧ ལོ་ནས་བཟུང་ཨ་རིའི་སྲིད་འཛིན་ཡུ་རོབ་སྤྱི་མཐུན་ཚོགས་པ་མ་ལག་ཁག་ལ་ཕེབས་པ་ཆེས་ཐོག་མ་དེ་ཆགས་ཡོད།།