༄༅། །ཕྱི་ལོ་ ༢༠༢༡ ཟླ་ ༦ ཚེས་ ༢ ཉིན་ཧང་གྷ་རིའི་རྒྱལ་ས་བྷུ་ཌ་པེ་སིའི་ (Budapest) གྲོང་སྡེའི་སྤྱི་ཁྱབ་པ་སྐུ་ཞབས་ཀ་རག་སོ་ནེ་ (Gergely Karacsony) ལགས་དང་བྷུ་ཌ་པེ་སིའི་རྫོང་དགུ་པའི་གྲོང་སྡེའི་སྤྱི་ཁྱབ་ལྕམ་སྐུ་ཀར་སི་ཊི་ན་ (Krisztina Baranyi) ལགས་རྣམ་གཉིས་ཀྱིས་ཧང་གྷ་རིའི་རྒྱལ་ས་བྷུ་ཌ་པེ་སིའི་གཞུང་ལམ་ཞིག་ལ་ཏཱ་ལའི་བླ་མ་གཞུང་ལམ་ཞེས་མཚན་བཏགས་ཏེ་དབུ་འབྱེད་གནང་འདུག  

དེ་དང་ལྷན་དུ་ཧང་གྷ་རིའི་རྒྱལ་ས་བྷུ་ཌ་པེ་སིའི་གཞུང་ཁག་གཅིག་ལ་ཡུ་གུར་སྔོན་གཤེགས་དཔའ་བོ་གཞུང་ལམ་དང་། ཧོང་ཀོང་རང་དབང་གཞུང་ལམ། བི་ཤོབ་ཤེ་སི་ཀོང་གཞུང་ལམ་ཞེས་མཚན་བཏགས་གནང་འདུགབྷུ་ཌ་པེ་སིར་གནས་བཞུགས་བོད་མི་འཕྲིན་ལས་རྣམ་རྒྱལ་ལགས་དང་བོད་དོན་རྒྱབ་སྐྱོར་བ་ཊི་བྷོར་( Hendrey Tibor) ལགས་རྣམ་གཉིས་ཀྱིས་སུད་སིའི་སྐུ་ཚབ་དོན་གཅོད་ཁང་གི་ཚབ་ཞུས་ཏེ་བྷུ་ཌ་པེ་སིའི་གྲོང་སྡེ་སྤྱི་ཁྱབ་པ་རྣམ་གཉིས་ལ་ཁ་བཏགས་དང་བོད་ཀྱི་རྒྱལ་དར་རེ་ཕུལ་ཏེ་གྲོང་སྡེ་སྤྱི་ཁྱབ་པ་གཉིས་ཀྱིས་བོད་མིར་གདུང་སེམས་མཉམ་སྐྱེའི་རྒྱབ་སྐྱོར་གནང་བར་ཐུགས་རྗེ་ཞུས་ཡོད།

ཉེ་ཆར་ཧང་གྷ་རིའི་གཞུང་གིས་རྒྱ་ནག་གཞུང་དང་མཉམ་དུ་རྒྱ་ནག་གི་ཧྥོ་དན་སློབ་ཆེན་ (Fudan University) གྱི་ཡན་ལག་སློབ་ཆེན་ཞིག་ཕྱི་ལོ་ ༢༠༢༤ ལོའི་ནང་ཚུད་ཧང་གྷ་རི་ནང་འཛུགས་སྐྲུན་བྱ་རྒྱུའི་ལས་གཞིའི་གྲོས་མཐུན་ལ་མཚན་རྟགས་བཀོད་ཡོད་པ་དང་། ཧང་གྷ་རི་མི་མང་གིས་ལས་གཞི་དེར་ངོ་རྒོལ་གནང་གི་ཡོད། གྲོང་སྡེའི་སྤྱི་ཁྱབ་པ་སྐུ་ཞབས་ཀ་རག་སོ་ནེ་ལགས་དང་བྷུ་ཌ་པེ་སིའི་རྫོང་དགུ་པའི་གྲོང་སྡེའི་སྤྱི་ཁྱབ་ལྕམ་སྐུ་ཀར་སི་ཊི་ན་ལགས་ཀྱིས་རྒྱ་ནག་གི་བུ་ལོན་འོག་ཚུད་པའི་ཧང་གྷ་རིའི་ཕྱི་འབྲེལ་དང་། རྒྱ་ནག་དམར་ཤོག་གཞུང་གི་ཤུགས་རྐྱེན་ཧང་གྷ་རི་ཚུད་པའི་ནུབ་ཕྱོགས་མང་གཙོའི་རྒྱལ་ཁབ་ཁག་གི་ནང་སླེབས་དང་སླེབ་བཞིན་པར་ཐུགས་འཚབ་གནང་གི་ཡོད་པའི་སྐོར་གསུངས་ཡོད་པ་བཅས།།