༄༅། །ཕྱི་ལོ་ ༢༠༢༡ ཟླ་ ༦ ཚེས་ ༡ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བོད་རིགས་གཞོན་སྐྱེས་རྣམས་ལ་དྲ་ལམ་བརྒྱུད་རྗེ་ཙོང་ཁ་པ་ཆེན་པོས་མཛད་པའི་རྟོགས་བརྗོད་འདུན་ལེགས་མའི་བཀའ་ཆོས་དབུ་འཛུགས་མཛད་ཡོད།
དེ་ཡང་གོང་ཚེས་ཉིན་གྱི་སྔ་དྲོ་ཆུ་ཚོད་ ༩ མ་ཟིན་ཙམ་ལ་མགོན་པོ་གང་ཉིད་བཞུགས་སྒར་རྒྱལ་བའི་གཟིམ་ཆུང་ཕོ་བྲང་ནས་གསུང་ཆོས་གནང་ཡུལ་དུ་ཆིབས་སྒྱུར་གྱིས་བཀའ་སློབ་སྩལ་དོན། ནམ་རྒྱུན་ཕྱི་ཟླ་ ༦ ཚེས་ ༡ ཉིན་སློབ་ཕྲུག་ཚོར་ཆོས་འབྲེལ་དང་ཐུག་འཕྲད་སོགས་བྱེད་ཀྱི་ཡོད་པ་རེད། ད་རེས་ནད་ཡམས་སོགས་ལ་བརྟེན་ནས་ངོས་རང་ཕྱི་ལ་འཐོན་གྱི་མེད་པ་རེད། དེ་རིང་དྲ་རྒྱའི་ཐོག་ནས་སློབ་ཕྲུག་ཚོ་དང་སྐད་ཆ་བཤད་རྒྱུ་ཡིན། དེ་རིང་བཀའ་ཆོས་ནི་རྟོགས་བརྗོད་འདུན་ལེགས་མའི་བཤད་ལུང་དང་དྲི་བ་དྲིས་ལན་བྱེད་རྒྱུ་དེ་ཧ་ཅང་ཡག་པོ་འདུག
ང་ཚོ་ནི་བོད་རིགས་ཆགས་ཡོད། ཧི་མ་ལ་ཡ་རི་རྒྱུད་ནས་མི་དེ་འདྲ་ཕལ་ཆེར་ཡོད་ངེས་རེད། ངོས་ཀྱིས་ནམ་རྒྱུན་རྟག་པར་རྗོད་ཀྱི་ཡོད། ཆོས་རྒྱལ་སྲོང་བཙན་སྒམ་པོས་རྒྱ་བཟའ་དང་བལ་བཟའ་མཉམ་ཁྲུང་ས་བསྐྱོན་པ་རེད། འོན་ཀྱང་ང་རང་ཚོ་བོད་པར་བོད་ཡིག་ཟུར་དུ་དགོས་ཀྱི་ཡོད་པ་གཟིགས་པ་དེ་ངོས་ཀྱིས་རླབས་ཆེན་པོ་མཐོང་གི་འདུག ཆོས་རྒྱལ་སྲོང་བཙན་སྒམ་པས་བོད་ཡིག་རྒྱ་ཡིག་ལ་དཔེ་བལྟས་པ་མིན་པར་རྒྱ་གར་རང་གི་དབྱངས་དང་གསལ་བྱེད་ཡོད་པའི་ཡི་གེ་དེར་དཔེ་གཟིགས་ཏེ་ང་ཚོ་བོད་པའི་ཡི་གེ་འདི་བཟོས་པ་ཡིན་པ་རེད། དེ་ནས་ཆོས་རྒྱལ་ཁྲི་སྲོང་ལྡེའུ་བཙན་ཕེབས་པའི་སྐབས་སུ་བོད་ཡིག་ཟུར་དུ་ཡོད་སྟབས། ཆོས་རྒྱལ་ཁྲི་སྲོང་ལྡེའུ་བཙན་གྱིས་ལེགས་སྦྱར་དང་པཱ་ལིའི་སྐད་སློབ་རྒྱུ་རིགས་མི་དགོས་པར་བོད་ཡིག་རང་གི་ནང་ལ་ལེགས་སྦྱར་དང་པཱ་ལིའི་གཞུང་ནང་ཡོད་པ་དེ་དག་བོད་ཡིག་རང་གི་ནང་ཚུར་བསྒྱུར་ནས་བོད་པ་ཚོས་བོད་ཡིག་རང་གི་ཐོག་ནས་སློབ་སྦྱོང་བྱེད་རྒྱུ་ཞིག་གནང་བ་རེད། 
མཁན་ཆེན་ཞི་བ་ཚོ་ཁོ་རང་གིས་བོད་ཡིག་ལ་དོ་སྣང་གནང་བ་རེད་ཅེས་ངོས་ཀྱི་ངོ་ཤེས་པ་ཁ་ཤས་ཀྱིས་འདི་ལྟར་བརྗོད་མྱོང་། གང་ལྟར་བོད་མི་རྣམས་ཧ་ཅང་གྱོང་པོ་རེད་འདུག དུས་རབས་བདུན་པའི་སྐབས་ཆོས་རྒྱལ་སྲོང་བཙན་སྒམ་པོས་བོད་ཡིག་བཟོས་པ་དང་། ཕྱིས་སུ་དུས་རབས་བརྒྱད་པའི་སྐབས་ཆོས་རྒྱལ་ཁྲི་སྲོང་ལྡེའུ་བཙན་གྱིས་ང་ཚོར་བོད་ཡིག་ཡོད་པ་ཡིན་སྟབས། ལེགས་སྦྱར་ནང་ཡོད་པའི་ནང་པའི་གཞུང་དེ་དག་དང་པཱ་ལིའི་གཞུང་ནང་ཡོད་པ་དེ་དག་བོད་ཡིག་ནང་ཚུར་བསྒྱུར་རྒྱུ་གནང་སྟེ་རིམ་བཞིན་ལོ་ཙཱ་བས་བོད་ཡིག་ནང་ཚུར་བསྒྱུར་ནས་བཀའ་འགྱུར་པོ་ཏི་བརྒྱ་ལྷག་ཙམ་དང་བསྟན་འགྱུར་པོ་ཏི་ཉིས་བརྒྱ་ལྷག་ཙམ་བཅས་ཁྱོན་པོ་ཏི་སུམ་བརྒྱ་ལྷག་ཙམ་བཅས་ནང་པའི་གཞུང་གལ་ཆེ་བ་ཚང་མ་དེའི་ནང་ཡོད་པ་ཞིག་ཆགས་འདུག ང་རང་ཚོ་བོད་པས་སོ་སོའི་སྐད་ཡིག་རང་གི་ཐོག་ནས་རང་མགོ་ཚ་ཚང་ཐོན་ཐུབ་པ་ཞིག་དང་། སྐད་ཡིག་འདིའི་ཐོག་ནས་ས་དགེ་བཀའ་རྙིང་རིས་སུ་མ་ཆད་པའི་མཁས་གྲུབ་གཉིས་ལྡན་གྱི་སྐྱེས་བུ་དམ་པ་ཇི་ཙམ་བྱུང་ཡོད། ལྷག་པར་ས་པཎ་ཡབ་སྲས་གྱིས་ཚད་མ་རིག་པའི་སྐོར་དམིགས་བསལ་ཐུགས་སྣང་གནང་ཡོད། རྗེ་རིན་པོ་ཆེས་ཚད་མའི་གཞུང་ལ་དམིགས་བསལ་ཐུགས་སྣང་གནང་འདུག
དེང་སྐབས་སངས་རྒྱས་པའི་ཆོས་ཚད་མ་རིག་པའི་ཐོག་ནས་འགྲེལ་བཤད་རྒྱག་རྒྱུ་ཡོད་པ་འདི་ཕལ་ཆེར་བོད་པ་ཁོ་ན་མ་གཏོགས་རྒྱལ་ནག་ལ་སྒོམ་རྒྱག་རྒྱུ་ཙམ་མ་གཏོགས་དེ་འདྲའི་སློབ་སྦྱོང་ལ་དམིགས་བསལ་དོ་སྣང་གང་ཡང་བྱེད་ཀྱི་མི་འདུག དེ་སྔ་ཡང་བྱས་མི་འདུག པཱ་ལིའི་ཆོས་བརྒྱུད་འཛིན་པ་གནང་མཁན་འབར་མ་དང་། ཐེ་ལེནྜི། སིན་ཧ་ལ་དེ་ཚོའི་གྲས་ལ་ཚད་མ་རིག་པའི་སྐོར་སློབ་སྦྱོང་གང་ཡང་མེད། དེར་བརྟེན་ངོས་ཀྱིས་ནམ་རྒྱུན་འདི་ལྟར་རྗོད་ཀྱི་ཡོད། 
ཐེ་ལེནྜི་དང་འབར་མའི་དགེ་སློང་དངོས་གནས་འདུལ་བ་འཛིན་པ་ཧ་ཅང་ཡག་པོ་དེ་འདྲ་ཡོད། ངོས་ཀྱིས་བཀའ་ཆོས་བྱེད་སྐབས་འགའ་ཤས་ཡོང་བཞིན་ཡོད་སྟབས་ངོ་ཤེས་པ་ནང་ཚགས་ལྟ་བུ་ཆགས་པར་བརྟེན་ཕྱིས་སུ་ངོས་ཀྱིས་སྙད་བཏགས་ཏེ་ཁྱེད་རང་ཚོས་པཱ་ལིའི་གཞུང་སྦྱངས་ནས་བཅོམ་ལྡན་འདས་ཀྱིས་གསུངས་པ་རེད་ཟེར་རྒྱུ་ཙམ་མ་གཏོགས་རིགས་པའི་སྒྲུབ་བྱེད་ཀྱི་ཐོག་ནས་བཅོམ་ལྡན་འདས་ཀྱི་བཀའ་དེ་ཡང་དག་པ་ཡིན་ཤོད་རྒྱུ་མེད། དེར་བརྟེན་ཁྱེད་རང་ཚོ་སོ་མེད་པ་དང་གཅིག་པ་རེད་ཅེས་ངོས་ཀྱིས་ཤོད་ཀྱི་ཡོད། སོ་མེད་མཁན་གྱི་མི་ཚོས་ཁ་ལག་མཁྲེགས་པོ་རིགས་བྱུང་བ་ཡིན་ན་མུར་རྒྱུ་མ་གཏོགས་གང་ཡང་མི་འདུག སོ་ཡོད་མཁན་ཞིག་གིས་བཟས་པ་དང་སོ་རྒྱག་རྒྱུ་ཡོད་པ་རེད། དེར་བརྟེན་ཚད་མ་རིག་པ་ཡོད་པ་དེ་དག་གིས་དོན་དག་ཇི་འདྲ་ཞིག་ཡིན་ནའང་རིགས་པས་དཔྱད་པ་བྱས་ནས་འགྲོ་རྒྱུ་ཞིག་ཡིན་སྟབས། ངོས་ཀྱིས་བར་སྐབས་ནས་ཚན་རིག་པ་དང་མཉམ་དུ་འབྲེལ་བ་བྱས་པ་རེད། ང་ཚོར་ཚད་མ་རིག་པ་བསླབ་མེད་པ་དང་དབུ་ཚད་ཀྱི་གཞུང་དེ་འདྲ་མེད་པར་འདུལ་བའི་འགྲོ་སྟངས་ཁོ་ནར་ཕྱིན་པ་ཡིན་ན། ཚན་རིག་པ་དང་ལྷན་འབྲེལ་བ་བྱེད་རྒྱུ་མེད་པའི་བཟོ་འདྲ་ཞིག་རེད། ང་ཚོ་བོད་ལ་མཁན་ཆེན་ཞི་འཚོས་དབུ་ཚད་སེང་གེ་མཇིང་གནོན་ཞེས་གསུངས་པ་ནང་ལྟར་བོད་ལ་ལོ་ཡུན་དེའི་རིང་བོད་ཀྱི་སྐྱེས་བུ་དམ་པ་མང་པོ་ཞིག་གིས་ཆོས་རྒྱལ་ཚོའི་སྐབས་ང་ཚོར་ལམ་སྟོན་གནང་བ་ཁག་མཐའ་འཁྱོངས་པ་ཞིག་གནང་བ་དེ་ལྟར་རེད་འདུག དེང་སྐབས་བོད་ཀྱི་ནང་ཆོས་འདི་ཁྱད་དུ་འཕགས་པ་ཞིག་རེད། ཚན་རིག་པ་ཚོ་དང་མཉམ་དུ་གོ་བསྡུར་བྱེད་པའང་ང་ཚོར་སྤོབས་པ་ཡོད་པ་ཞིག་ཆགས་ཡོད།
སྤྱིར་སངས་རྒྱས་པའི་ཆོས་རྒྱ་གར་ནས་ཡོང་བ་འདི་ལ་སེམས་ཁམས་རིག་པ་དང་སྒོམ་གྱི་སྐོར་ཤུགས་ཆེན་པོ་ཡོད་པ་འདི་དག་ང་ཚོར་ཡོད་པའི་ཐོག་ལ་དབུ་ཚད་སེང་གེ་མཇིང་གནོན་ཟེར་བའི་ཐོག་ཕྱིན་པའི་སྐབས་སུ་རིགས་པ་རང་གི་ཐོག་ནས་བཤད་རྒྱུ་དང་འགྲེལ་བཤད་བརྒྱག་རྒྱུ་ཡོད་པ་ཞིག་རེད། དེར་བརྟེན་ཚན་རིག་པ་དང་མཉམ་དུ་ང་ཚོས་སྤོབས་པ་བྱས་ནས་གོ་བསྡུར་དང་བགྲོ་གླེང་བྱེད་རྒྱུའི་རྒྱུ་རྐྱེན་གཙོ་བོ་ནི་དབུ་ཚད་སེང་གེ་མཇིང་གནོན་གྱི་ཆོས་བརྒྱུད་ཅིག་ཡོད་པའི་ལག་རྗེས་རེད། ད་ཆ་ང་ཚོའི་ལུང་པའི་ནང་དཀའ་ངལ་ཧ་ཅང་འཕྲད་བཞིན་ཡོད། འོན་ཀྱང་ང་ཚོ་བཙན་བྱོལ་བ་ཉུང་ཤས་ཤིག་ཡོད་པ་དེ་དག་གིས་ང་ཚོའི་སྐད་ཡིག་དང་། སྐད་ཡིག་དེའི་ནང་དུ་དབུ་ཚད་སེང་གེ་མཇིང་གནོན་ཞེས་སངས་རྒྱས་པའི་ཆོས་ཚུལ་རིགས་པའི་ལམ་ནས་འགྲེལ་བཤད་རྒྱག་རྒྱུ་དང་སྤུས་དག་པོ་ཞིག་ཡོད་སྟབས་ང་ཚོ་རྒྱ་གར་དུ་སླེབས་ནས་དང་པོ་དེ་ནེ་རུ་ལ་ང་ཚོར་སྐད་ཡིག་ཟུར་དུ་ཡོད་པར་བརྟེན་བོད་པའི་སློབ་གྲྭ་ཟུར་དུ་དགོས་ཀྱི་འདུག་ཅེས་ཞུས་པར་ཁོང་གིས་ཧ་ཅང་ཡག་པོ་འདུག་ཅེས་རྒྱབ་སྐྱོར་གཙང་མ་གནང་ནས་བཙན་བྱོལ་ནང་བོད་པའི་སློབ་གྲྭ་ཟུར་དུ་བཙུགས་པ་དེ་ལྟར་རེད།
བོད་པའི་སློབ་གྲྭའི་ནང་ཤེས་ཡོན་སྤྱི་བྱིངས་ཀྱི་དགེ་རྒན་ཡོད་པའི་ཐོག་ལ་ནང་པའི་གཞུང་སློབ་མཁན་གྱི་ཆོས་དགེ་འཛུགས་དགོས་ཀྱི་འདུག གལ་ཆེ་ཤོས་བཙན་བྱོལ་ནང་གྲྭ་ས་ནས་སྐྱབས་བཅོལ་ལ་ཡོང་བ་སྟོང་ཕྲག་ཁ་ཤས་ཤིག་ཡོད་པ་རེད། ངོས་རང་དེ་དུས་སིམ་ལ་དང་ཅམ་པ་ཁུལ་དུ་ལམ་བཟོ་རྒྱུག་མཁན་ལ་ལྟ་སྐོར་དུ་ཕྱིན་མྱོང་། ཅམ་པ་ལ་གྲྭ་ས་ནས་ཡོང་བའི་དགེ་འདུན་པ་ལམ་བཟོ་རྒྱུག་མཁན་གང་ཙམ་འདུག ཁོང་ཚོ་ནི་སྡོམ་གཙང་རང་རེད། དཔེ་ཆ་བལྟས་ཡོད་པས་ཅམ་པ་རུ་གྲྭ་ས་ནས་ཡོང་བ་ཚོ་རུག་རུག་ཚོགས་ཏེ་ཁོང་ཚོས་རྟགས་གསལ་བཏང་བ་རེད། ང་ཚོར་གཟན་སྐེར་པར་དཀྲི་རྒྱུ་ཡོད་པ་རེད། ཁོ་ཚོས་ཕྱུ་པ་གྱོན་ཡོད་སྟབས་ཕུ་ཐུང་སྐེད་པར་དཀྲིས་ནས་རྟགས་གསལ་བཏང་བ་རེད། 
ང་ཚོ་བོད་པ་བཙན་བྱོལ་བ་དེ་དག་གིས་ཉག་ཕྲ་བའི་དུས་ཚོད་ལ་ང་ཚོའི་རིག་གཞུང་ལ་གཅེས་སྐྱོང་བྱས་པ་རེད། དེ་ལྟ་བུའི་གཞི་རྩ་ཞིག་ཡོད་པར་བརྟེན་གདན་ས་ཁག་དེ་དག་བཙུགས་པ་རེད། དེང་སང་སེ་འབྲས་དགའ་གསུམ་གཙོ་བོ་རེད། དེ་ནས་བཀྲ་ཤིས་ལྷུན་པོ་དང་རྒྱུད་གྲྭ་སྨད་སྟོད་སོགས་གདན་ས་དེ་དག་སློབ་གཉེར་ཡག་ཐག་ཆོད་ཡོད་པ་དེ་ནི་ང་ཚོ་བཙན་བྱོལ་བའི་གཟི་བརྗིད་ཆགས་ཡོད།
རང་གི་ལུང་པ་བྲལ་ནས་བཙན་བྱོལ་བ་ཆགས་ཡོད་ཀྱང་བོད་ཀྱི་ཆོས་དང་རིག་གཞུང་མི་ཉམས་གོང་འཕེལ་ཡོང་བའི་ཐབས་ཤེས་གང་ཡོང་བྱས་ཏེ་ཡག་ཐག་ཆོད་རེད། དེའི་ཐོག་ལ་ཚན་རིག་གི་སློབ་ཚན་ཞིག་གསར་པ་བཙུགས་ཡོད། སྔར་མེད་པའི་སློབ་ཚན་ཚན་རིག་གི་སྐོར་གདན་ས་ཚོའི་ནང་དུ་སློབ་གཉེར་བྱེད་རྒྱུ་ཡོད་པ་རེད། གང་ལྟར་ངོས་ཀྱིས་ཡོངས་གྲགས་ཐོག་དེང་གི་ནང་པ་ཚོ་དུས་རབས་ཉི་ཤུ་རྩ་གཅིག་པའི་ནང་པ་བྱེད་དགོས་ཞེས་རྗོད་བཞིན་ཡོད། དེའི་དོན་ནི་ང་ཚོའི་ཕ་མེས་ནས་ཡོད་པའི་སངས་རྒྱས་པའི་ལྟ་གྲུབ་རྣམས་ཡོད་པའི་ཐོག་དེང་དང་གི་ཚན་རིག་གི་རྣམ་གཞག་དེ་དག་ཤེས་པ་བྱེད་དགོས། ང་ཚོ་ཚན་རིག་པ་དང་མཉམ་དུ་སྐད་ཆ་བཤད་པར་ཞུམ་དགོས་པ་ཁྱོན་ནས་མི་འདུག སྤོབས་པ་བྱེད་རྒྱུ་ཞིག་རེད།
ངོས་ཀྱིས་ཚན་རིག་པ་དང་མཉམ་དུ་འབྲེལ་བ་བྱས་ནས་ལོ་བཅུ་ཕྲག་ཁ་ཤས་ཕྱིན་པ་རེད། གང་ལྟར་ཚན་རིག་པ་ལ་ཕར་བློ་བསྐྱེད་སྤྲོད་རྒྱུ་དང་ལེགས་བཤད་སྟེར་བ་མ་གཏོགས་ང་ཚོའི་ཆོས་དད་ཉུང་དུ་འགྲོ་རྒྱུ་བཟོ་འདྲ་བོ་དང་། ཆོས་ལ་ཐེ་ཚོམ་ཟ་བ་ལྟ་བུ་རྩ་བ་ཉིད་ནས་མི་འདུག དེར་བརྟེན་བོད་པ་དེ་དག་བཙན་བྱོལ་བ་ཆགས་ཡོད་ནའང་བོད་པའི་ཆོས་དང་རིག་གཞུང་བདག་པོ་ཡག་པོ་བརྒྱབ་སྟེ་གནས་ཡོད། རྟོགས་བརྗོད་འདུན་ལེགས་མ་འདི་རྗེ་རིན་པོ་ཆེ་རང་ཉིད་ཀྱིས་སློབ་གཉེར་ཇི་ལྟར་བརྒྱབ་པ་དེ་དག་འཐོན་ཡོང་གི་འདུག དེ་ཡང་འབྲེལ་ཡོད་ལྟ་བུ་ཆགས་ཏེ་ཧ་ཅང་ཡག་པོ་འདུག ཅེས་བཀའ་སློབ་སྩལ་ཏེ་རྟོགས་བརྗོད་འདུན་ལེགས་མའི་བཤད་ལུང་དབུ་འཛུགས་མཛད་ཡོད་པ་བཅས།།
