༄༅། །མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཐེངས་ ༤༧ འཚོགས་བཞིན་པ་དང་བསྟུན། ཕྱི་ལོ་ ༢༠༢༡ ཟླ་ ༦ ཚེས་ ༢༥ ཉིན་སུད་སི་དང་ལིག་ཏེན་སིཊཡན་བོད་རིགས་སྤྱི་མཐུན་ཚོགས་པས་རྒྱལ་ཚོགས་སུ་རྒྱ་ནག་གཞུང་གིས་བོད་ནང་བོད་མིའི་ཆོས་དད་རང་དབང་ལ་ཐེ་བྱུས་དང་རིག་གཞུང་རྩ་གཏོར་གཏོང་བཞིན་པ་མཚམས་འཇོག་བྱེད་དགོས་པའི་ཞུ་འབོད་དོན་ཚན་ལྔ་ཅན་ཞིག་ཕུལ་ཡོད།
དེ་ཡང་གོང་ཚེས་ཉིན་སུད་སི་དང་ལིག་ཏེན་སིཊཡན་བོད་རིགས་སྤྱི་མཐུན་ཚོགས་པ་དང་། ཡུ་རོབ་བོད་ཀྱི་གཞོན་ནུ་ཚོགས་པ། སུད་སིའི་ས་གནས་བུད་མེད་ཚོགས་པ་བཅས་ཀྱི་ཚོགས་གཙོ་རྣམ་པ་དང་། དེ་བཞིན་སུད་བོད་མཛའ་འབྲེལ་ཚོགས་པའི་སྐུ་ཚབ་སོགས་མཉམ་འབྲེལ་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་ལྷན་ཁང་གི་མདུན་དུ་འདུ་འཛོམས་ཀྱི་ཐོག་ནས་རྒྱ་ནག་དམར་ཤོག་གཞུང་གི་དྲག་གནོན་འོག་ད་བར་བོད་མི་རྒྱལ་གཅེས་པ་འདས་གྲོངས་སུ་གྱུར་བ་རྣམས་ལ་གུས་འདུད་དང་མྱ་ངན་རྗེས་དྲན་ཞུ་སླད་སྐར་མ་གཅིག་རིང་ངག་བཅད་ཞུས་རྗེས་རྒྱ་ནག་དམར་ཤོག་གཞུང་གི་དྲག་གནོན་འོག་བོད་ནང་གི་འགྲོ་བ་མིའི་ཐོབ་ཐང་ཇེ་སྡུག་ཇེ་ཞན་དུ་འགྲོ་བཞིན་པར་ཞི་བའི་ངོ་རྒོལ་གནང་ཡོད།
སྐབས་དེར་སུད་སིའི་སྐུ་ཚབ་དོན་གཅོད་འཆི་མེད་རིག་འཛིན་ལགས་ཀྱིས་གསུང་དོན། རང་བྱུང་གི་གོད་ཆག་ལ་བརྟེན་ནས་ང་ཚོ་ཕ་ཡུལ་བོད་དང་ཁ་བྲལ་དགོས་བྱུང་བ་མ་ཡིན་པར། ཆབ་སྲིད་ཀྱི་རྒྱབ་ལྗོངས་ལ་བརྟེན་ནས་རྒྱ་ནག་དམར་ཤོག་གཞུང་གིས་བཙན་དབང་གིས་ང་ཚོ་རང་གི་ཕ་ཡུལ་བོད་དང་ཁ་བྲལ་བཅུག་ཡོད་སྟབས། ང་ཚོ་ཚང་མ་བོད་མིའི་འཐབ་རྩོད་ཀྱི་ལས་འགུལ་ནང་མཉམ་ཞུགས་བྱེད་དགོས་པ་མ་ཟད། བོད་པ་མི་རེ་ངོ་རེའི་ཕྲག་ཏུ་ལས་འགན་ཡོད། ཅེས་བོད་པ་ཚང་མར་དྲན་སྐུལ་གནང་ཡོད།
གཞན་ཡང་ཁོང་གིས་བོད་དོན་བདེན་མཐའ་མ་གསལ་བར་དུ་བོད་མིའི་འཐབ་རྩོད་རྒྱུན་སྐྱོང་མཐར་སྐྱེལ་བྱ་ངེས། ཞེས་གསུངས། དེ་བཞིན་སུད་སི་དང་ལིག་ཏེན་སིཊཡན་བོད་རིགས་སྤྱི་མཐུན་ཚོགས་པ་དང་། ཡུ་རོབ་བོད་ཀྱི་གཞོན་ནུ་ཚོགས་པ། སུད་སིའི་ས་གནས་བུད་མེད་ཚོགས་པ་བཅས་ཀྱི་ཚོགས་གཙོ་དང་། དེ་བཞིན་སུད་བོད་མཛའ་འབྲེལ་ཚོགས་པའི་སྐུ་ཚབ་བཅས་ནས་ཐེངས་འདིའི་ཞི་བའི་ངོ་རྒོལ་སྐོར་གསུང་བཤད་གནང་ཡོད།
དེ་རྗེས་སུད་སིའི་སྐུ་ཚབ་དོན་གཅོད་ཁང་གི་ལས་བྱེད་སྐལ་ལྡན་མཚོ་མོ་ལགས་དང་། སུད་སི་དང་ལིག་ཏེན་སིཊཡན་བོད་རིགས་སྤྱི་མཐུན་ཚོགས་པའི་ཚོགས་གཙོ་ཀརྨ་ཆོས་སྐྱིད་ལགས་རྣམ་གཉིས་ཀྱིས་མཉམ་འབྲེལ་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་ལྷན་ཁང་གི་སྐུ་ཚབ་བརྒྱུད་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་ལྷན་ཁང་གི་ཚོགས་གཙོ་ལྕམ་སྐུ་མི་ཤེ་ལེ་བྷ་ཤེ་ལེ་ཊི་ (Michelle Bachelet Jeria) མཆོག་གི་མཚན་ཐོག་དོན་ཚན་ལྔ་འཁོད་པའི་ཤོག་གྲངས་བཞི་ཅན་གྱི་ཞུ་འབོད་ཕུལ་ཡོད། 
རྒྱལ་ཚོགས་ཀྱི་ངོས་ནས་གཤམ་གསལ་དོན་ཚན་ལྔའི་ཐོག་རྒྱ་ནག་གཞུང་ལ་འབོད་སྐུལ་གནང་དགོས་པ་ནི།
༡། རྒྱ་ནག་གིས་བོད་ནང་གི་འགྲོ་བ་མིའི་ཐོབ་ཐང་རྩིས་མེད་རྡོག་རོལ་གཏོང་བཞིན་པའི་སྐོར་གླེང་སློང་གནང་དགོས་པ་དང་།
༢། རྒྱ་ནག་གིས་བོད་ནང་རིག་གཞུང་རྩ་གཏོར་གཏོང་བཞིན་པ་མཚམས་འཇོག་བྱེད་དགོས་པའི་འབོད་སྐུལ་གནང་དགོས་པ།
༣། རྒྱ་ནག་གིས་བོད་མིའི་ཆོས་དད་རང་དབང་ལ་ཐེ་བྱུས་བྱེད་བཞིན་པ་མཚམས་འཇོག་དང་། ༸ཀུན་གཟིགས་པཎ་ཆེན་སྐུ་ཕྲེང་བཅུ་གཅིག་པ་དགེ་འདུན་ཆོས་ཀྱི་ཉི་མ་མཆོག་གང་དུ་ཡོད་མེད་ཁ་གསལ་ཐོག་གློད་བཀྲོལ་གཏོང་དགོས་པའི་འབོད་སྐུལ་གནང་དགོས་པ།
༤། རྒྱ་ནག་གིས་བོད་མི་ཉེས་མེད་བཙོན་འཇུག་དང་མནར་གཅོད་གཏོང་བཞིན་པ་མཚམས་འཇོག་དང་། བོད་ཀྱི་ཆབ་སྲིད་བཙོན་པ་རྣམས་གློད་བཀྲོལ་གཏོང་དགོས་པའི་འབོད་སྐུལ་གནང་དགོས་པ།
༥། རྒྱ་ནག་གིས་བཙན་དབང་གིས་བོད་ཀྱི་འབྲོག་པ་རྣམས་གནས་སྤོ་བཅུག་པ་དང་། བོད་ནང་ངལ་རྩོལ་སྒྱུར་བཀོད་ཁང་བསྐྲུན་དང་སྐྲུན་བཞིན་པ་མཚམས་འཇོག་བྱེད་དགོས་པའི་འབོད་སྐུལ་གནང་དགོས་པ་བཅས་ཞུ་འབོད་དོན་ཚན་ལྔ་འཁོད་ཡོད་པའི་ཡི་གེ་དེ་ཕུལ་ཡོད་པ་བཅས།།
