༄༅། །ཕ་རན་སིའི་སྐད་རྒྱག་མཁན་གྱི་སུད་སིའི་ས་ཁུལ་ཁག་གཅིག་དང་ལྷག་པར་ཇི་ནི་ཝ་གྲོང་ཁྱེར་ཁུལ་ལ་དམིགས་ཏེ་སུད་བོད་མཛའ་འབྲེལ་ཚོགས་པས་ (Swiss-Tibetan Friendship Association) ཕྱི་ལོ་ ༢༠༢༡ ཟླ་ ༦ ཚེས་ ༢༤ ཉིན་སུད་སིའི་སྐུ་ཚབ་དོན་གཅོད་ཁང་དུ་མ་འོངས་བོད་དོན་ཞུ་གཏུག་གི་འཆར་གཞིའི་སྐོར་ཚོགས་འདུ་ཚོགས་ཏེ་གྲོས་སྡུར་གནང་ཡོད།
དེ་ཡང་སུད་བོད་མཛའ་འབྲེལ་ཚོགས་པའི་ཚོགས་གཙོ་ཐོ་མ་སི་ (Thomas Büchli) ལགས་དང་། སུད་སུའི་གྲོས་ཚོགས་འཐུས་མི་ཟུར་པ་དང་སུད་བོད་མཛའ་འབྲེལ་ཚོགས་པའི་སྐུ་ཚབ་རེ་མེ་( René Longet) ལགས། ཇི་ནི་ཝ་གྲོང་ཁྱེར་གྱི་གྲོང་སྡེ་སྤྱི་ཁྱབ་པ་ཟུར་པ་ལྕམ་སྐུ་ཁོན་ཊ་ཊི་་(Marguerite Contat) ལགས་བཅས་ནས་སུད་སིའི་སྐུ་ཚབ་དོན་གཅོད་འཆི་མེད་རིག་འཛིན་ལགས་དང་། དོན་གཅོད་ཁང་གི་ལས་བྱེད་བསོད་ནམས་མཐར་ཕྱིན་ལགས། འཕྲིན་ལས་ཆོས་སྐྱིད་ལགས། སྐལ་ལྡན་མཚོ་མོ་ལགས་བཅས་དང་ལྷན་དུ་ཚོགས་འདུ་ཚོགས་ཏེ་མ་འོངས་བོད་དོན་ཞུ་གཏུག་གི་འཆར་གཞི་གཙོ་བོར་གྱུར་བའི་གནད་དོན་ཁག་གཅིག་གི་སྐོར་གྲོས་སྡུར་ལྷུག་པོ་གནང་ཡོད།

སྐབས་དེར་སུད་སིའི་སྐུ་ཚབ་དོན་གཅོད་ཁང་གི་ལས་བྱེད་འཕྲིན་ལས་ཆོས་སྐྱིད་ལགས་ཀྱིས་སུད་སིའི་སྐུ་ཚབ་དོན་གཅོད་ཁང་གི་ཚབ་ཞུས་ཏེ་བཙན་བྱོལ་བོད་མིའི་སྒྲིག་འཛུགས་དང་། སུད་སིའི་སྐུ་ཚབ་དོན་གཅོད་ཁང་གི་ལས་འགན་དང་ལས་དོན་གནང་ཕྱོགས་སྤྱིའི་སྐོར་ངོ་སྤྲོད་གནང་ཡོད།

སུད་བོད་མཛའ་འབྲེལ་ཚོགས་པའི་ཚོགས་གཙོ་ཐོ་མ་སི་ལགས་དང་། སུད་སུའི་གྲོས་ཚོགས་འཐུས་མི་ཟུར་པ་དང་སུད་བོད་མཛའ་འབྲེལ་ཚོགས་པའི་སྐུ་ཚབ་རེ་མེ་ལགས། ཇི་ནི་ཝ་གྲོང་ཁྱེར་གྱི་གྲོང་སྡེ་སྤྱི་ཁྱབ་པ་ཟུར་པ་ལྕམ་སྐུ་ཁོན་ཊ་ཊི་ལགས་བཅས་ནས་ལྷག་བསམ་ཟོལ་མེད་ཀྱི་སྒོ་ནས་བོད་དོན་སླད་སུད་སིའི་གྲོང་སྡེ་ལྷན་ཁང་ཁག་གི་མདུན་དུ་བོད་ཀྱི་རྒྱལ་དར་སྒྲེང་འཛུགས་གནང་སྟེ་རྒྱབ་སྐྱོར་ཤུགས་ཆེ་གནང་དང་གནང་བཞིན་པར་སུད་སིའི་སྐུ་ཚབ་དོན་གཅོད་འཆི་མེད་རིག་འཛིན་ལགས་ཀྱིས་ཐུགས་རྗེ་ཆེ་ཞུས་གནང་ཡོད་པ་བཅས།།