༄༅། །འདི་གར་སྦིར་བོད་ཚོགས་ས་གནས་འགོ་འཛིན་ལས་ཁུངས་ནས་བཏང་གནས་ནང་འཁོད་དོན། བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་ཕྱི་ལོ་ ༢༠༢༡ ཟླ་ ༦ ཚེས་ ༨ རེས་གཟའ་མིག་དམར་ཉིན་རྒྱ་གར་བྱང་ཕྱོགས་ཁུལ་གྱི་ས་གནས་འགོ་འཛིན་རྣམས་དང་དྲ་རྒྱའི་བརྒྱུད་ཏོག་དབྱིབས་གཉན་རིམས་དང་འབྲེལ་བའི་ལས་དོན་བྱེད་ཕྱོགས་སྐོར་ལམ་སྟོན་གནང་སྐབས་བོད་མིའི་སྒྲིག་འཛུགས་ནས་ཏོག་དབྱིབས་གཉན་རིམས་སྔོན་འགོག་སྨན་ཁབ་མཐུན་འགྱུར་གནང་རྒྱུའི་ཞལ་བཞེས་གནང་ཡོད་ནའང་། ༸སྐྱབས་རྗེ་རྫོང་སར་མཁྱེན་རྩེ་རིན་པོ་ཆེ་མཆོག་གི་ཐུགས་དགོངས་ལམ་སྟོན་འོག་རྫོང་སར་བཤད་གྲྭ་དང་གཞོན་ནུ་དོན་གྲུབ་ཀྱི་དགོངས་པ་རྒྱ་གར་ཡན་ལག་ (Siddharth’s Intent India) གཉིས་མཉམ་འབྲེལ་ཐོག་སྦིར་སྡེ་ནང་གསུམ་གྱི་ཁྱབ་ཁོངས་མི་མང་དང་། དགོན་སྡེ་ཁག དགེ་ལས་སློབ་ཕྲུག དེ་བཞིན་ལི་ལི་གྲོང་སྡེ་བཅས་ཁོངས་སུ་ཡོད་པའི་གཞིས་མི་རང་ལོ་ ༡༨ ནས་ ༤༤ བར་ཟིན་པ་རྣམས་ལ་རིན་མེད་ཐོག་སྔོན་འགོག་ཁབ་སྨན་སྦྱིན་རོགས་རམ་གནང་ཡོད།དེ་ཡང་ས་གནས་འཕྲོད་བསྟེན་སྨན་ཁང་གི་འགན་འཛིན་ཀརྨ་སྒྲོལ་མ་ལགས་ཀྱིས་ཐུགས་འགན་རྐང་བཞེས་ཐོག་རྒྱ་གར་ཕོར་ཌི་སི་ (Fortis) སྨན་ཁང་དང་གཉིས་མོས་གན་ཡིག་བཞག་པའི་ཐོག་གོ་སྒྲིག་ཞུ་མུས་བཞིན། ཕྱི་ལོ་ ༢༠༢༡ ཟླ་ ༦ ཚེས་ ༡༡ ནས་ལས་གཞི་དངོས་སུ་འགོ་བཙུགས་ཀྱིས་སྦིར་བོད་ཚོགས་ཁྱབ་ཁོངས་རང་ལོ་ ༡༨ ནས་ ༤༤ བར་མི་གྲངས་ ༩༥ དང་། ས་གནས་འགོ་འཛིན་ཁྱབ་ཁོངས་སུ་ཇ་བོད་ཁྱིམ་གྱི་དགེ་ལས་སློབ་ཕྲུག་གྲངས་ ༡༢༤ བཅས་ཁྱོན་བསྡོམས་མི་གྲངས་ ༢༡༩ ལ་སྔོན་འགོག་ཁབ་བརྒྱབ་ཟིན་པར་སོང་། ༸སྐྱབས་རྗེ་རྫོང་སར་མཁྱེན་རྩེ་རིན་པོ་ཆེ་མཆོག་དང་། འབྲེལ་ཡོད་དགོན་པའི་ལས་སྣེ་རྣམ་པར་ཁྱབ་ཁོངས་གཞིས་མི་ཡོངས་ཀྱི་ཚབ་ཞུས་ཏེ་ཐུགས་རྗེ་བཀའ་དྲིན་བླ་མེད་དུ་ཆེ་ཞུ་རྒྱུ་ཡིན།།