༄༅། །ཕྱི་ལོ་ ༢༠༢༡ ཟླ་ ༤ པའི་ནང་བོད་འབྲི་རུ་རྫོང་ཙྭ་ལ་ཡུལ་ཚོ་མེ་རི་གྲོང་ནས་བོད་མི་བརྒྱ་བྱིན་ལགས་དང་བོད་མི་གཞན་ཁག་གཅིག་རྒྱ་ནག་གཞུང་གིས་འཛིན་བཟུང་བྱས་འདུག་པ་དང་། ད་ལྟའི་ཆར་བོད་མི་དེ་དག་གི་གནས་སྟངས་དང་ས་གནས་གང་དུ་བཙོན་འཇུག་བྱས་ཡོད་མེད་སོགས་ཀྱི་ཞིབ་ཕྲའི་གནས་ཚུལ་གང་ཡང་ཤེས་རྟོགས་ཐུབ་ཀྱི་མེད་པ་རེད།
དེ་ཡང་བོད་མི་བརྒྱ་བྱིན་ལགས་ཀྱིས་བཙན་བྱོལ་དུ་ཡོད་པའི་རང་ཉིད་ཀྱི་སྤུན་ཉེ་དང་ལྷན་འབྲེལ་བ་བྱས་པར་བརྟེན་རྒྱ་ནག་གཞུང་གི་ཉེན་རྟོག་པས་ཁོང་འཛིན་བཟུང་བྱས་ཡོད། ད་ལྟའི་ཆར་བོད་མི་བརྒྱ་བྱིན་ལགས་ནི་རང་ལོ་ ༤༤ ཡིན་ཞིང་། དུས་རྒྱུན་བོད་མི་རིགས་ཀྱི་སྐད་ཡིག་དང་རིག་གཞུང་སོགས་གལ་ཆེ་ཡིན་སྐོར་དང་མི་ཉམས་རྒྱུན་འཛིན་བྱེད་དགོས་སྐོར། དེ་བཞིན་ཁོར་ཡུག་སྲུང་སྐྱོབ་དང་བོད་མི་ནང་ཁུལ་མཐུན་སྒྲིལ་བྱེད་དགོས་པ་སོགས་ཀྱི་ཐོག་ཕྱག་ལས་གནང་མཁན་ཞིག་ཡིན།
བོད་ཀྱི་ས་ཁུལ་འདྲ་མིན་ནས་རྒྱ་ནག་གཞུང་གི་དཔོན་རིགས་དང་རྒྱ་ནག་གཞུང་གི་སྲིད་བྱུས་ངན་པར་ངོ་རྒོལ་ཤུགས་ཆེ་བྱེད་བཞིན་ཡོད། དེའི་ཁྲོད་བོད་ནག་ཆུ་འབྲི་རུ་རྫོང་ནི་རྒྱ་ནག་གཞུང་གི་དཔོན་རིགས་རྣམས་ལ་ངོ་རྒོལ་ཤུགས་ཆེ་བྱེད་མཁན་གྱི་ས་ཁུལ་ཞིག་ཡིན་པར་ངོས་འཛིན་གྱིས་རྒྱ་ནག་གཞུང་གིས་འབྲི་རུ་རྫོང་ཁུལ་དུ་རྣམ་ཀུན་དང་མི་འདྲ་བར་དམ་བསྒྲགས་ཤུགས་ཆེ་བྱེད་བཞིན་ཡོད། ད་ཆ་འབྲི་རུ་ནང་དམ་བསྒྲགས་ཆེ་བའི་གནས་སྟངས་ཁྲོད་སྐབས་ཐོག་གི་གནས་ཚུལ་རྣམས་ཤེས་རྟོགས་ཐུབ་རྒྱུ་ཧ་ཅང་ཁག་པོ་ཡིན།
དེ་སྔ་ཕྱི་ལོ་ ༢༠༡༣ ཟླ་ ༡༡ ཚེས་ ༨ ཉིན་བོད་མདོ་ཁམས་ནག་ཆུ་འབྲི་རུ་རྫོང་ཆགས་རྩེ་ཤང་གྲོང་ཚོ་ལྔ་པ་ནས་ཡིན་པའི་དཀོན་མཆོག་སྦྱིན་པ་ལགས་ཀྱིས་གསང་བ་ཕྱིར་བསྒྲགས་བྱས་པའི་ཉེས་མིང་འོག་རྒྱ་ནག་གཞུང་གི་ཉེན་རྟོག་པས་ཁོང་འཛིན་བཟུང་བྱས་ཤིང་ལོ་ཉི་ཤུ་རྩ་གཅིག་ཁྲིམས་ཐག་བཅད་ཡོད་པ་དང་། རྒྱ་གཞུང་གིས་བཙོན་ཁང་དུ་རྡུང་རྡེག་མནར་གཅོད་ཚད་ལས་བརྒལ་བ་བཏང་བའི་རྐྱེན་གྱིས་ནད་གཅོང་དུ་གྱུར་ནས་ཕྱི་ལོ་ ༢༠༢༡ ཟླ་ ༢ ཚེས་ ༦ ཉིན་ཁོང་འདས་གྲོངས་སུ་གྱུར་ཡོད།
གཞན་ཡང་རྒྱ་ནག་གཞུང་གིས་རྡུང་རྡེག་མནར་གཅོད་འོག་ཁམས༌འབྲི་རུའི་བུད་མེད་ལྷ་མོ་ལགས་ཕྱི་ལོ་ ༢༠༢༠ ཟླ་ ༨ ནང་འདས་གྲོངས་སུ་གྱུར་ཡོད་པ་བཅས། །
