༄༅། །སུད་སིའི་གྲོང་ཁྱེར་ཇི་ནི་ཝར་རྟེན་གཞི་བྱས་པའི་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཐེངས་ ༤༧ པ་དེ་བཞིན་ཕྱི་ལོ་ ༢༠༢༡ ཟླ་ ༦ ཚེས་ ༢༡ ནས་ཟླ་ ༧ ཚེས་ ༡༣ བར་འཚོགས་བཞིན་ཡོད་པ་དང་། ཕྱི་ཚེས་ ༢༡ ཉིན་མཉམ་འབྲེལ་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་ལྷན་ཚོགས་ཀྱི་ཚོགས་གཙོ་ལྕམ་སྐུ་མི་ཤེ་ལེ་བྷ་ཤེ་ལེ་ཊི་ (Michelle Bachelet Jeria) མཆོག་གིས་རྒྱལ་ཚོགས་ཀྱི་ལོ་འཁོར་འགྲོ་བ་མིའི་ཐོབ་ཐང་གི་སྙན་ཐོ་སྒྲོགས་སྦྱང་གནང་ཡོད།
དེ་ཡང་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་ལྷན་ཚོགས་ཀྱི་ཚོགས་གཙོ་མཆོག་གིས་ལོ་འཁོར་འགྲོ་བ་མིའི་ཐོབ་ཐང་གི་སྙན་ཐོ་སྒྲོགས་སྦྱང་གནང་བའི་སྐོར་ཕྱི་ཚེས་ ༢༢ ཉིན་རྒྱལ་ཚོགས་ཀྱི་ཚོགས་མི་རྒྱལ་ཁབ་ཁག་གིས་གྲོས་བསྡུར་གནང་སྐབས་ཁེ་ན་ཌའི་རྒྱལ་ཚོགས་ཀྱི་གཞུང་ཚབ་ཆེན་མོ་ལྕམ་སྐུ་ལེ་སི་ལེ་ནོར་ཊོན་ (Leslie E. Norton) མཆོག་གིས་རྒྱལ་ཚོགས་ཀྱི་ཚོགས་མི་རྒྱལ་ཁབ་གྲངས་ ༤༤ ཐུན་མོང་གི་ཚབ་ཞུས་ཏེ་རྒྱ་ནག་གིས་བོད་དང་། ཤར་ཏུར་ཀི་སི་ཐན། ཧོང་ཀོང་བཅས་ཀྱི་ནང་འགྲོ་བ་མིའི་ཐོབ་ཐང་ལ་རྩིས་མེད་རྡོག་རོལ་གཏོང་བཞིན་པའི་ཐད་ཐུགས་འཚབ་ཧ་ཅང་ཆེན་པོ་ཡོད་པའི་བསྒྲགས་གཏམ་སྤེལ་འདུག
མཉམ་འབྲེལ་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་ལྷན་ཚོགས་ཀྱི་ཚོགས་གཙོ་ལྕམ་སྐུ་མི་ཤེ་ལེ་བྷ་ཤེ་ལེ་ཊི་མཆོག་གིས་ལོ་འཁོར་འགྲོ་བ་མིའི་ཐོབ་ཐང་གི་སྙན་ཐོ་སྒྲོགས་སྦྱང་གནང་སྐབས་ཤར་ཏུར་ཀི་སི་ཐན་ནང་གི་འགྲོ་བ་མིའི་ཐོབ་ཐང་གི་གནས་སྟངས་སྐོར་མིང་དོན་མཚུངས་པའི་རྟོག་ཞིབ་སླད་ལོ་འདིའི་ནང་རྒྱ་ནག་གཞུང་གིས་ལྕམ་སྐུ་མཆོག་ཤར་ཏུར་ཀི་སི་ཐན་ནང་ཕེབས་འཇུག་དགོས་པའི་རེ་སྐུལ་གནང་ཡོད་པ་དང་། གནད་དོན་དེ་དང་འབྲེལ་ནས་རྒྱ་ནག་གི་རྒྱལ་ཚོགས་ཀྱི་གཞུང་ཚབ་ཆེན་མོས་མཉམ་འབྲེལ་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་ལྷན་ཚོགས་ཀྱི་ཚོགས་གཙོ་མཆོག་གི་འབྱུང་འགྱུར་གྱི་གཟིགས་སྐོར་ནི་མཛའ་མཐུན་གྱི་གཟིགས་སྐོར་ཞིག་ལ་བརྩི་ཆོག་པ་ལས་རྟོག་ཞིབ་ཀྱི་རྣམ་པ་གང་རུང་ཞིག་ལའང་བརྩི་རྒྱུ་མིན། ཞེས་དང་།
ཧོང་ཀོང་དང་ཤར་ཏུར་ཀི་སི་ཐན་གྱི་གནད་དོན་ནི་རྒྱ་ནག་ནང་ཁུལ་གྱི་གནད་དོན་ཞིག་ཡིན་ཞིང་། གནད་དོན་དེ་རྒྱ་ནག་གི་བདག་དབང་ལ་ཐེ་བྱུས་བྱེད་རྒྱུར་བེད་སྤྱོད་བྱེད་མི་ཆོག་ཅེས་བཤད། རྒྱལ་ཚོགས་ཀྱི་ཚོགས་མི་རྒྱལ་ཁབ་གྲངས་ ༤༤ ཐུན་མོང་གི་བསྒྲགས་གཏམ་དེའི་ནང་འཁོད་དོན། ང་ཚོས་རྒྱ་ནག་ལ་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་ལྷན་ཚོགས་ཀྱི་ཚོགས་གཙོ་ལྕམ་སྐུ་མི་ཤེ་ལེ་བྷ་ཤེ་ལེ་ཊི་མཆོག་ཚུད་པའི་རང་དབང་གི་རྟོག་ཞིབ་ཚོགས་ཆུང་ཞིག་ཤར་ཏུར་ཀི་སི་ཐན་ནང་མིང་དོན་མཚུངས་པའི་རྟོག་ཞིབ་སླད་འཕྲལ་དུ་ཡོང་འཇུག་དགོས་པ་དང་། རྒྱ་ནག་གིས་མི་རིགས་དབྱེ་འབྱེད་དང་། ཡུ་གུར་དང་ཁ་ཆེ་མི་རིགས་ཚོ་ཉེས་མེད་བཙུན་འཇུག་བྱེད་བཞིན་པ་མཚམས་འཇོག་བྱེད་དགོས་པའི་འབོད་སྐུལ་བྱེད་ཀྱི་ཡོད། ཅེས་བསྒྲགས་གཏམ་སྤེལ་ཡོད།
གཞན་ཡང་བསྒྲགས་གཏམ་དེའི་ནང་བོད་དང་ཧོང་ཀོང་ནང་གི་འགྲོ་བ་མིའི་ཐོབ་ཐང་གི་གནས་སྟངས་ལ་ཐུགས་འཚབ་ཧ་ཅང་ཆེན་པོ་ཡོད་པ་འཁོད་ཡོད་པ་མ་ཟད། རྒྱ་ནག་གིས་འགྲོ་བ་མིའི་ཐོབ་ཐང་གི་ཁྲིམས་སྒྲིག་གཞི་ཁག་ལ་བརྩི་སྲུང་བྱེད་དགོས་པའི་འབོད་སྐུལ་གནང་ཡོད་པ་འཁོད་ཡོད། ཨ་རི་དང་། ཁེ་ན་ཌ། ཅེག་སྤྱི་མཐུན་རྒྱལ་ཁབ། ཨི་ཊ་ལེ། འཇར་མན་ནི། ཨིན་ཡུལ། དེ་བཞིན་ཤར་ནུབ་ཡུ་རོབ་ཀྱི་རྒྱལ་ཁབ་སོགས་ཁྱོན་རྒྱལ་ཚོགས་ཀྱི་ཚོགས་མི་རྒྱལ་ཁབ་གྲངས་ ༤༤ ཐུན་མོང་གིས་བསྒྲགས་གཏམ་སྤེལ་ཡོད།
ཁེ་ན་ཌའི་གནས་ཁྲིད་འོག་རྒྱལ་ཚོགས་ཀྱི་ཚོགས་མི་རྒྱལ་ཁབ་གྲངས་ ༤༤ ཐུན་མོང་གིས། རྒྱ་ནག་གིས་བོད་དང་། ཤར་ཏུར་ཀི་སི་ཐན། ཧོང་ཀོང་བཅས་ཀྱི་ནང་འགྲོ་བ་མིའི་ཐོབ་ཐང་ལ་རྩིས་མེད་རྡོག་རོལ་གཏོང་བཞིན་པའི་སྐོར་བསྒྲགས་གཏམ་སྤེལ་གནང་བར་སུད་སིའི་སྐུ་ཚབ་དོན་གཅོད་ཁང་གིས་དགའ་བསུ་དང་སྦྲགས་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་ལྷན་ཚོགས་ཀྱི་ཚོགས་གཙོ་ལྕམ་སྐུ་མི་ཤེ་ལེ་བྷ་ཤེ་ལེ་ཊི་མཆོག་ལ་རྒྱ་ནག་གིས་བོད་ནང་གི་འགྲོ་བ་མིའི་ཐོབ་ཐང་ལ་རྩིས་མེད་རྡོག་རོལ་གཏོང་བཞིན་པའི་སྐོར་རྟོག་ཞིབ་གནང་སྟེ་སྙན་ཐོ་གནང་དགོས་པའི་འབོད་སྐུལ་ཤུགས་ཆེ་གནང་ཡོད་པ་བཅས།།
