༄༅། །ཕྱི་ལོ་ ༢༠༢༡ ཟླ་ ༦ ཚེས་ ༡༧ ཉིན་བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ཀྱི་ཏོག་དབྱིབས་གཉན་རིམས་ལས་དོན་ཚོགས་ཆུང་གི་གསར་འགོད་གསལ་བསྒྲགས་ཐེངས་ ༦༤ དེ་སྤེལ་ཡོད་པ་དང་། གསལ་བསྒྲགས་གནང་མཁན་བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ཀྱི་དྲུང་འཕར་བྱམས་པ་ཕུན་ཚོགས་ལགས་དང་། སྨན་པ་ཚེ་རིང་མཚམས་གཅོད་ལགས་རྣམ་གཉིས་ཡིན།
དེ་ཡང་འཕྲོད་བསྟེན་དྲུང་འཕར་བྱམས་པ་ཕུན་ཚོགས་ལགས་ཀྱིས་གསུང་དོན། དེང་སྐབས་རྒྱ་བལ་འབྲུག་གསུམ་ནང་ཏོག་དབྱིབས་གཉན་རིམས་སྔོན་འགོག་ཁབ་བརྒྱབ་དང་རྒྱག་མུས་རེད། ལྷག་པར་རྒྱ་གར་ནང་རང་ལོ་ ༡༨ ཡན་གྱི་བོད་མི་མང་དག་ཅིག་ལ་སྔོན་འགོག་ཁབ་བརྒྱབ་ཐུབ་པ་བྱུང་ཡོད་པ་མ་ཟད། བཙན་བྱོལ་བོད་མིའི་གཞིས་ཆགས་ཆེ་ཁག་ནང་གི་བོད་མི་བརྒྱ་ཆ་ ༩༠ ལྷག་གིས་སྔོན་འགོག་སྨན་ཁབ་ཞུ་ཐུབ་པ་བྱུང་འདུག དེར་བརྟེན་མཐུན་འགྱུར་དང་རྒྱབ་སྐྱོར་སོགས་གནང་མཁན་ཡོངས་ལ་སྙིང་ཐག་པ་ནས་བཀའ་དྲིན་ཆེ་ཞེས་ཞུ་རྒྱུ་ཡིན།
བཙན་བྱོལ་བོད་མི་གནས་ཡུལ་ས་གནས་ཁག་ཏུ་ཏོག་དབྱིབས་གཉན་རིམས་སེང་དྲག་མ་བྱུང་བར་དུ་དོགས་ཟོན་དང་སྔོན་འགོག་གི་ཐབས་ལམ་གང་ཡོད་པ་དེ་དག་མུ་མཐུད་བསྟན་དགོས། ཞེས་གསུངས་གྲུབ་མཚམས་ལས་དོན་ཚོགས་ཆུང་གི་གསར་འགོད་འབྲེལ་མཐུད་པ་སྨན་པ་ཚེ་རིང་མཚམས་གཅོད་ལགས་ཀྱིས་འདས་པའི་བདུན་ཕྲག་གཅིག་ནང་ཚོགས་ཆུང་གི་སྙན་ཐོའི་སྐོར་གསུང་དོན། འདས་པའི་བདུན་ཕྲག་ནང་རྒྱ་གར་ནང་གི་བཙན་བྱོལ་བོད་མིའི་གཞིས་ཆགས་ཁག་གྲངས་ ༢༠ དང་། བལ་ཡུལ་ནང་གི་བཙན་བྱོལ་བོད་མིའི་གཞིས་ཆགས་ཁག་གྲངས་ ༦ བཅས་ཁྱོན་བཙན་བྱོལ་བོད་མིའི་གཞིས་ཆགས་ཁག་གྲངས་ ༢༦ ནང་གི་བོད་མི་རང་ཁྱིམ་དུ་མི་གྲངས་ ༥༢༥ དང་སྒྲིག་འཛུགས་ནས་མཐུན་འགྱུར་སྦྱར་བའི་འགོག་དབྱེ་ཟུར་འཇོག་ཁང་དུ་བཞུགས་མཁན་མི་གྲངས་ ༥༤༠ བཅས་ཁྱོན་བསྡོམས་བོད་མི་གྲངས་ ༡༠༦༥ འགོག་དབྱེ་ཟུར་བཀག་ཐོག་བཞུགས་ཡོད།
ད་བར་གསོ་རིག་ལུས་སེམས་ནུས་གསོའི་སྨན་ཁྱོན་བསྡོམས་ ༣༦༠༡༢ རིན་མེད་ཐོག་ཕུལ་ཐུབ་པ་བྱུང་ཡོད། སེམས་ཁམས་འཕྲོད་བསྟེན་དང་འབྲེལ་བའི་འདས་པའི་བདུན་ཕྲག་ནང་ནད་གཞི་ཕོག་པའི་མི་གྲངས་ ༨༠ ལ་སེམས་ཁམས་འཕྲོད་བསྟེན་དང་འབྲེལ་བའི་ལམ་སྟོན་སློབ་གསོ་སོགས་གནང་ཐུབ་པ་བྱུང་ཡོད། ནད་ཡམས་ཁྱབ་བརྡལ་སྔོན་འགོག་སླད་བདུན་ཕྲག་འདིའི་ནང་རྒྱ་གར་ནང་གི་ས་གནས་གྲངས་ ༡༧ དང་བལ་ཡུལ་ནང་གི་ས་གནས་གྲངས་ ༢ ཀྱི་བོད་མི་གྲངས་ ༨༦༠ ཙམ་ལ་ནད་གཞི་ཕོག་ཡོད་མེད་བརྟག་དཔྱད་གནང་ཐུབ་པ་བྱུང་ཡོད།
དེ་བཞིན་སྔོན་འགོག་སྨན་ཁབ་རྒྱག་སྒོ་ཚུགས་པ་ནས་བཟུང་ད་བར་རྒྱ་གར་ནང་སྔོན་འགོག་སྨན་ཁབ་རིམ་པ་དང་པོ་དང་གཉིས་པ་གཉིས་ཀར་བརྒྱབ་ཟིན་པ་མི་གྲངས་ ༡༤༠༩༦ དང་། དེ་བཞིན་སྔོན་འགོག་སྨན་ཁབ་རིམ་པ་དང་པོ་བརྒྱབ་ཟིན་པ་མི་གྲངས་ ༢༡༣༧༠། སྔོན་འགོག་སྨན་ཁབ་མ་ཐོབ་བའམ་བརྒྱབ་མེད་པ་མི་གྲངས་ ༡༥༣༡༡ ཡོད། དེ་བཞིན་བལ་ཡུལ་ནང་སྔོན་འགོག་སྨན་ཁབ་རིམ་པ་དང་པོ་དང་གཉིས་པ་གཉིས་ཀར་བརྒྱབ་ཟིན་པ་མི་གྲངས་ ༣༥༣ དང་། ཕྱོགས་མཚུངས་སྔོན་འགོག་སྨན་ཁབ་རིམ་པ་དང་པོ་བརྒྱབ་ཟིན་པ་མི་གྲངས་ ༡༠༨༤། སྔོན་འགོག་སྨན་ཁབ་མ་ཐོབ་བའམ་བརྒྱབ་མེད་པ་མི་གྲངས་ ༥༣༧༤ ཡོད།
འདས་པའི་བདུན་ཕྲག་གཅིག་གི་ནང་རྒྱ་གར་དང་བལ་ཡུལ་ནང་དུ་ནད་གཞི་ཕོག་པ་ར་འཕྲོད་བྱུང་བ་མི་གྲངས་ ༡༤༩ བྱུང་ཡོད་པ་ལས་སྐྱེས་པ་གྲངས་ ༩༥ དང་། བུད་མེད་གྲངས་ ༥༤ དེའི་ནང་ནས་དགུང་ན་མཐོ་ཤོས་དེ་ ༩༦ དང་ཆུང་ཤོས་དེ་བྱིས་པ་ལོ་ ༡ ཡིན། བློ་ཕམ་པའི་གནས་ཚུལ་ཞིག་ལ་བདུན་ཕྲག་འདིའི་ནང་མི་གྲངས་ ༢ འདས་གྲོངས་སུ་གྱུར་ཡོད། ད་བར་རྒྱ་གར་དང་བལ་ཡུལ་ནང་གི་བོད་མི་ནད་གཞི་ཕོག་པ་ཁྱོན་མི་གྲངས་ ༤༩༥༡ དང་། དྲག་སྐྱེད་བྱུང་བ་མི་གྲངས་ ༤༣༣༩ ། འདས་གྲོངས་སོང་བ་མི་གྲངས་ ༡༢༦ ། ད་ལྟ་ནད་མནར་གསོ་བཅོས་བྱེད་བཞིན་པ་མི་གྲངས་ ༤༨༦ ཡོད། ཅེས་སོགས་གསུངས།།
