༄༅། །ཕྱི་ལོ་ ༢༠༢༡ ཟླ་ ༦ ཚེས་ ༧ ཉིན་གྱི་སྔ་དྲོར་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་བཀའ་ཤག་ཚོགས་ཁང་དུ་ཝུ་ཧན་ཏོག་དབྱིབས་གཉན་རིམས་ཛ་དྲག་ལས་དོན་ཚོགས་ཆུང་གི་ཚོགས་གཙོ་གཙོས་པའི་ཚོགས་མི་དང་ལྷན་དུ་རྒྱ་བལ་གཉིས་ཀྱི་བཙན་བྱོལ་བོད་མིའི་གཞིས་ཆགས་ཁག་གྲངས་ ༣༦ གི་ཏོག་དབྱིབས་གཉན་རིམས་སྔོན་འགོག་སྨན་ཁབ་ཀྱི་གནས་སྟངས་སྐོར་ཚོགས་འདུ་ཚོགས་ཏེ་བསྐྱར་ཞིབ་གནང་ཡོད།སྐབས་དེར་ཝུ་ཧན་ཏོག་དབྱིབས་གཉན་རིམས་ཛ་དྲག་ལས་དོན་ཚོགས་ཆུང་གི་ཚོགས་གཙོ་དཔལ་ལྡན་དོན་གྲུབ་ལགས་ཀྱིས་སྐབས་ ༡༦ པའི་བཀའ་ཤག་གི་ངོས་ནས་རྒྱ་བལ་གཉིས་ཀྱི་བཙན་བྱོལ་བོད་མི་རྣམས་ལ་ཏོག་དབྱིབས་གཉན་རིམས་སྔོན་འགོག་སྨན་ཁབ་རྒྱག་རྒྱུ་དང་། བོད་མིའི་སྒྲིག་འཛུགས་ཀྱི་འཕྲོད་བསྟེན་ལས་ཁུངས་ཀྱི་ཁྱབ་ཁོངས་འཕྲོད་བསྟེན་སྨན་ཁང་ཁག་ལ་སྨན་དང་སྔོན་འགོག་ཡོ་ཆས་མཁོ་སྤྲོད་གནང་རྒྱུ། ནང་སྲིད་ལས་ཁུངས་ཀྱི་ལྟ་རྟོག་འོག་ཡོད་པའི་མི་མང་ཉམ་ཐག་དགོས་ངེས་ཅན་རྣམས་ལ་བཟའ་འབྲུ་རིགས་མཁོ་སྤྲོད་གནང་རྒྱུ་ཡིན་པའི་སྐོར་དང་།གཞན་ཡང་དགོན་སྡེ་ཁག་དང་། གཞུང་འབྲེལ་མིན་པའི་ཚོགས་པ། དེ་བཞིན་མི་སྒེར་པ་སོགས་ནས་མོན་གྷོ་འདོད་རྒུ་གླིང་དང་། ཧོན་སུར་རབ་རྒྱས་གླིང་། ཀོ་ལི་གྷལ་དོན་ལྡན་གླིང་བཅས་ཀྱི་བཙན་བྱོལ་བོད་མི་རྣམས་ལ་སྔོན་འགོག་སྨན་ཁབ་དང་སྔོན་འགོག་ཡོ་ཆས་སོགས་མཁོ་སྤྲོད་གནང་ཡོད་པས་ཐུགས་རྗེ་ཆེ་ཞུ་རྒྱུ་ཡིན་ཞེས་དང་། ཝུ་ཧན་ཏོག་དབྱིབས་གཉན་རིམས་ཛ་དྲག་ལས་དོན་ཚོགས་ཆུང་གི་སློབ་སྟོན་པ་སྐུའི་བླ་སྨན་པ་ས་འདུ་ཚང་ཚེ་བརྟན་རྡོ་རྗེ་ལགས་དང་། སྐུའི་བླ་སྨན་པ་ཚེ་དབང་རྟ་མགྲིན་ལགས་རྣམ་གཉིས་ཀྱི་ལམ་སྟོན་འོག་རྒྱ་བལ་གཉིས་ཀྱི་བཙན་བྱོལ་བོད་མི་རྣམས་ལ་སྔོན་འགོག་སྨན་ཁབ་རག་ཐབས་གནང་བཞིན་ཡོད། ཅེས་གསུངས།ཕྱོགས་མཚུངས་དཔལ་ལྡན་དོན་གྲུབ་ལགས་ཀྱིས་ཏོག་དབྱིབས་གཉན་རིམས་ནད་རླབས་གསུམ་པ་སླེབས་པ་ཡིན་ན་དེའི་གྲ་སྒྲིག་ཆེད་དུ་བཙན་བྱོལ་བོད་མི་ལོ་ན་ ༤ ནས་ ༡༧ བར་དང་། སྔོན་འགོག་སྨན་ཁབ་བརྒྱབ་མེད་པའི་ལོ་ན་ ༡༨ ནས་  ༤༥ བར་གྱི་བཙན་བྱོལ་བོད་མི་རྣམས་ལ་གསོ་རིག་སྨན་པའི་ལམ་སྟོན་འོག་ལུས་ཟུངས་གསོ་བྱེད་གསོ་རིག་སྨན་མཁོ་སྤྲོད་གནང་དང་གནང་བཞིན་པ་དང་། སྦེལ་ཀོབ་བོད་ཁྱིམ་དང་ལ་དྭགས་བོད་ཁྱིམ་མ་གཏོགས་སློབ་གྲྭ་གཞན་ཕལ་ཆེ་བར་ལུས་ཟུངས་གསོ་བྱེད་གསོ་རིག་སྨན་གནང་ཡོད། ཅེས་གསུངས།།