༄༅། །འདི་གར་བྱང་ཨ་རིའི་སྐུ་ཚབ་དོན་ཁང་ནས་བཏང་གནས་ནང་འཁོད་དོན། ཕྱི་ཟླ་ ༦ ཚེས་ ༤ ཉིན་ནི་དེ་སྔ་ཕྱི་ལོ་ ༡༩༨༩ ལོར་རྒྱ་ནག་དམར་ཤོག་གཞུང་གིས་གནམ་བདེ་སྒོ་མོའི་ཐང་ཆེན་དུ་སློབ་ཕྲུག་གཙོ་བོར་བྱས་པའི་མང་གཙོ་ལས་འགུལ་བར་དམག་ཤུགས་གིས་དྲག་པོའི་དམར་གསོད་བཏང་པའི་ཉིན་ཡིན་ཞིང་། འཛམ་གླིང་ས་ཕྱོགས་མང་པོར་དུས་དྲན་འདི་ཉིད་སྲུང་བརྩི་བྱེད་བཞིན་པ་ལྟར་བྱང་ཨ་རིའི་ས་གནས་འདྲ་མིན་ནང་དུས་དྲན་གྱི་ལས་འགུལ་འདྲ་མིན་སྤེལ་བཞིན་ཡོད་པར། ཨ་རི་དོན་གཅོད་ལས་ཁུངས་ནས་རྒྱ་རིགས་འབྲེལ་མཐུད་པ་ས་གནས་ནིའུ་ཡོག་གི་རྒྱ་རིགས་མང་ཤོས་གཏན་སྡོད་བྱས་ས་ཧྥ་ལ་ཤིང་(Flushing, NYC) དུ་གོ་སྒྲིག་བྱས་པའི་དྲུག་བཞིའི་དུས་དྲན་གྱི་ལས་འགུལ་དང་རྔམ་སྟོན་ཁྲོམ་སྐོར་ལ་མཉམ་ཞུགས་བྱས་ཡོད།

ལས་འགུལ་དེ་བཞིན་རྒྱ་ནག་མང་གཙོ་དོན་གཉེར་བའི་ཚོགས་པ་འདྲ་མིན་བཅུ་ནས་མཉམ་འབྲེལ་ཐོག་གོ་སྒྲིག་ཞུས་ཤིང་། གཏམ་བཤད་གནང་མཁན་ནང་ལོ་ངོ་ ༣༢ ཡར་སྔོན་དོན་རྐྱེན་དེ་ཉིད་དངོས་སུ་མཐོང་མྱོང་ཡོད་པའི་རྒྱ་རིགས་ལས་འགུལ་བ་མང་དག་ཅིག་ནས་སྐབས་དེའི་མཐོང་ཐོས་མྱོང་གསུམ་བརྗོད་པ་དང་། མ་འོངས་པའི་ལས་འགུལ་སྤེལ་ཕྱོགས་སོགས་ཀྱི་ཐད་རྒྱ་རིགས་མང་གཙོ་དོན་གཉེར་བའི་ཚོགས་པ་འདི་དག་གི་ངོ་ཚབ་ནས་བསམ་ཚུལ་བཏོན། 

སྐབས་དེར་རྒྱ་རིགས་འབྲེལ་མཐུད་པས་འདུ་འཛོམས་སུ་ཡོད་པའི་རྒྱ་རིགས་རྣམས་ལ་གསུང་དོན། བོད་མིར་མཚོན་ན་ཕྱི་ལོ་  ༡༩༥༩ ལོར་ཞི་བའི་སྒེར་ལངས་ཀྱི་སྐབས་ནས་རྒྱ་ནག་གི་དམར་དམག་ནས་དམར་གསོད་བཏང་བའི་བོད་མི་གྲངས་ལས་འདས་པ་དང་། བོད་ཀྱི་རྒྱལ་ས་ལྷ་སའི་སྐྱིད་ཆུ་ཀྱང་སྒེར་ལངས་ཀྱི་སྐབས་ལ་ཁྲག་གིས་ཆུ་མདོག་དམར་པོར་གྱུར་ཡོད། དེ་བཞིན་རྒྱ་རིགས་སློབ་ཕྲུག་དང་མི་མང་རྣམས་ལ་དེ་དང་གཅིག་མཚུངས་ཀྱིས་དམར་གསོད་གཏོང་སྐབས་གདུང་སེམས་མཉམ་སྐྱེ་ཡོད་པ་དང་། དེ་བཞིན་ང་དགུ་ལོའི་གོད་ཆག་བྱུང་ནས་ལོ་ངོ་༦༢ ཙམ་སོང་ཡང་། བོད་མི་ཚོས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་བཀའ་གསུང་ཅི་སྒྲུབ་ཞུས་ནས་བོད་ཀྱི་སྐད་ཡིག་དང་ལེགས་བྱང་བདག་ཉར་ཐུབ་ཡོད་པ་མ་ཟད། གོང་ས་མཆོག་གིས་མང་གཙོ་གསོལ་རས་སྩལ་བ་ལག་བསྟར་གྱིས་ཉེ་ཆར་བོད་མིའི་སྒྲིག་འཛུགས་ཀྱི་སྲིད་སྐྱོང་འཛམ་གླིང་གང་སར་ཡོད་པའི་བོད་པ་ཚོས་འོས་བསྡུའི་ལམ་ནས་འོས་འདེམས་བྱས་ཡོད་པ་ནི་རང་དབང་དང་མང་གཙོའི་རྒྱལ་ཁ་ཡིན། ཞེས་དང་།

གཞན་ཡང་ཁོང་གིས། གོང་ས་མཆོག་གིས་ལོ་བཅུ་ལྷག་གི་ཡར་སྔོན་ནས་ང་ཚོ་ཕན་ཚུན་ཐུན་མོང་གི་གཞི་རྟེན་འཚོལ་དགོས་པ་གལ་ཆེན་པོ་ཡིན་པ་བཀའ་སྩལ་ཡོད་པ་ལྟར་ང་ཚོས་མུ་མཐུད་ཐུན་མོང་གི་གཞི་རྟེན་འཚོལ་ནས་ཕན་ཚུན་སློབ་སྦྱོང་དང་རྒྱབ་སྐྱོར། མ་འོངས་པར་ལས་ཀ་མཉམ་རུབ་བྱེད་དགོས་པའི་འབོད་སྐུལ་དང་། སྤྱི་ནོར་༧གོང་ས་༸སྐྱབས་མགོན་ཆེན་པོ་མཆོག་གིས་རྒྱ་རིགས་མི་མང་དུང་ཕྱུར་ ༡༤ ལ་དངོས་ཡོད་གནས་ཚུལ་ཤེས་པའི་ཐོབ་ཐང་ཡོད་པ་དང་རྒྱ་རིགས་མི་མང་ལ་ཡིད་ཆེས་ཡོད་པའི་བཀའ་སློབ་ཐེངས་མང་ཕེབས་པ་འགྲེལ་བརྗོད་ཞུས།

གཏམ་བཤད་ལས་རིམ་གྲུབ་རྗེས་ནིའུ་ཡོག་ཧྥ་ལ་ཤིང་གི་རྒྱ་རིགས་ཆེས་མང་སའི་ལམ་གཞུང་ (Main Street) བརྒྱུད་རྔམ་སྟོན་ཁྲོམ་སྐོར་ལ་མཉམ་ཞུགས་བྱས།།