༄༅། །ཕྱི་ལོ་ ༢༠༢༡ ཟླ་ ༥ ཚེས་ ༢༨ ཉིན་ཅེག་སྤྱི་མཐུན་རྒྱལ་ཁབ་ཀྱི་རྒྱལ་ས་པྲཱག་ནང་རྟེན་གཞི་བྱས་པའི་ ༢༠༠༠ ཞི་བདེའི་ལྷན་ཚོགས་ ( Forum 2000 ) ཞེས་པས་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་ལ་ ༢༠༠༠ ཞི་བདེའི་ལྷན་ཚོགས་ཀྱི་དམིགས་བསལ་ཚོགས་འདུ་ཐེངས་ ༢༥ པའི་སྟེང་གསུང་བཤད་གནང་མཁན་དུ་མགྲོན་འབོད་ཞུས་གནང་འདུག

དེ་ཡང་ཕྱི་ལོ་ ༢༠༢༡ ཟླ་ ༥ ཚེས་ ༢༨ ཉིན་ ༢༠༠༠ ཞི་བདེའི་ལྷན་ཚོགས་ཀྱི་འགན་འཛིན་སྐུ་ཞབས་ཇ་ཀུབ་ཀ་ལེ་པལ་ (Jakub Klepal) ལགས་ཀྱིས་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་ལ་མགྲོན་འབོད་དང་འཚམས་འདྲི་ཞུས་གནང་བའི་ནང་འཁོད་དོན། སྐུ་ཉིད་བོད་མིའི་སྒྲིག་འཛུགས་ཀྱི་སྲིད་སྐྱོང་ལ་བདམས་ཐོན་བྱུང་བར་ངས་ ༢༠༠༠ ཞི་བདེའི་ལྷན་ཚོགས་ཀྱི་ཚབ་ཞུས་ཏེ་སྙིང་ཐག་པ་ནས་འཚམས་འདྲི་ཞུ་རྒྱུ་ཡིན། སྐུ་ཉིད་ཀྱིས་བོད་ལ་མང་གཙོ་དང་རང་དབང་ཐོབ་ཐབས་སུ་འཐབ་རྩོད་གནང་བཞིན་པར་ངས་རྒྱབ་སྐྱོར་དང་། ང་ཚོའི་གྲོགས་པོའི་འདུ་ཤེས་མུ་མཐུད་གནས་རྒྱུར་ཆོད་སེམས་བརྟན་པོ་ཡོད། ཅེས་གསུངས།

ཞི་བདེའི་ལྷན་ཚོགས་དེ་ཉིད་ཐོག་མར་ཕྱི་ལོ་ ༡༩༩༦ ལོར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དང་ཐུགས་འདྲིས་ཟབ་པའི་ཅེག་སྤྱི་མཐུན་རྒྱལ་ཁབ་ཀྱི་སྲིད་འཛིན་ཟུར་པ་ཞིང་གཤེགས་སྐུ་ཞབས་ཝ་སི་ལབ་ཧ་ཝེལ་ (Vaclav Havel)  མཆོག་དང་། ཉི་ཧོང་གི་གཞན་ཕན་སྲི་ཞུ་བ་ཡོ་ཧེ་སཱ་ས་ཀ་ཝ་ (Yohei Sasakawa) མཆོག ནོ་བེལ་ཞི་བདེའི་གཟེངས་རྟགས་བཞེས་མྱོང་མཁན་ཨི་ལེ་ཝེ་སེལ་ ( Elie Wiesel) མཆོག་བཅས་ནས་གསར་འཛུགས་གནང་ཞིང་། ད་བར་ ༢༠༠༠ ཞི་བདེའི་ལྷན་ཚོགས་ཀྱིས་ཅེག་སྤྱི་མཐུན་རྒྱལ་ཁབ་ཀྱི་སྲིད་འཛིན་ཟུར་པ་ཞིང་གཤེགས་དམ་པ་ཝ་སི་ལབ་ཧ་ཝེལ་ (Vaclav Havel  ) མཆོག་གི་མཛད་རྗེས་རྗེས་དྲན་ཞུ་སླད་མང་གཙོ་དང་། འགྲོ་བ་མིའི་ཐོབ་ཐང་། དེ་བཞིན་ཆོས་ལུགས་དང་མི་རིགས་ནང་ཁུལ་མཐུན་སྒྲིལ་སོགས་གོང་མཐོར་བཏང་དང་གཏོང་བཞིན་ཡོད། ༢༠༠༠ ཞི་བདེའི་ལྷན་ཚོགས་ཀྱི་དམིགས་བསལ་ཚོགས་འདུ་ཐེངས་ ༢༥ དེ་བཞིན་ཕྱི་ལོ་ ༢༠༢༡ ཟླ་ ༡༠ ཚེས་ ༡༠ ནས་ ༡༢ བར་ཅེག་སྤྱི་མཐུན་རྒྱལ་ཁབ་ཀྱི་རྒྱལ་ས་པྲཱག་ནང་ཚོགས་གཏན་ཁེལ་ཡོད་པ་བཅས།།