༄༅། །བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་ཉི་ཧོང་གི་སྲིད་བློན་ཟུར་པ་སྐུ་ཞབས་ཤིན་ཛོ་ཨ་བྷེ་ (Shinzo Abe) མཆོག་དང་། ཉི་ཧོང་གི་གྲོས་ཚོགས་འཐུས་མི་རྣམས་ལ་འཚམས་འཕྲིན་གནང་བ་ཁག་ཉི་ཧོང་སྐུ་ཚབ་དོན་གཅོད་ཨརྱ་ཚེ་དབང་རྒྱལ་པོ་ལགས་ཀྱིས་ཉི་ཧོང་གི་སྲིད་བློན་ཟུར་པ་སྐུ་ཞབས་ཤིན་ཛོ་ཨ་བྷེ་མཆོག་དང་ཉི་ཧོང་གི་གྲོས་ཚོགས་འཐུས་མི་རྣམ་པའི་ལས་ཁུངས་སུ་ཕེབས་ཏེ་ཕུལ་ཡོད།

དེ་ཡང་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་ཉི་ཧོང་གི་སྲིད་བློན་ཟུར་པ་སྐུ་ཞབས་ཤིན་ཛོ་ཨ་བྷེ་མཆོག་ལ་ཐུགས་རྗེ་ཞུའི་གསུང་འཕྲིན་ནང་འཁོད་དོན། སྐུ་ཉིད་ཀྱིས་ཉི་ཧོང་གི་སྲིད་བློན་གནང་བའི་སྐབས་དུས་རྟག་ཏུ་བོད་དོན་སྐོར་གླེང་སློང་གནང་ཡོད་པ་མ་ཟད། རྒྱ་ནག་གིས་བོད་ནང་གི་འགྲོ་བ་མིའི་ཐོབ་ཐང་རྩིས་མེད་རྡོག་རོལ་གཏོང་བཞིན་པའི་འགན་དེ་རྒྱ་ནག་དམར་ཤོག་གཞུང་ལ་འཁུར་དུ་འཇུག་དགོས་པའི་སྐོར་གསུངས་ཡོད། སྐུ་ཉིད་ཀྱིས་འབད་བརྩོན་གནང་བ་དེས་ཉི་ཧོང་གི་གྲོས་ཚོགས་འཐུས་མི་དང་སྲིད་དོན་པ་རྣམས་ལ་བོད་དོན་ཐད་རྒྱབ་སྐྱོར་གནང་རྒྱུར་ཤུགས་རྐྱེན་བཟང་པོ་ཐེབས་ཡོད་པ་དང་། དེ་ལ་བརྟེན་ནས་ཉི་ཧོང་གི་གྲོས་ཚོགས་འཐུས་མི་བརྒྱ་ལས་གྲུབ་པའི་ཉི་ཧོང་རྒྱལ་ཡོངས་གྲོས་ཚོགས་བོད་དོན་རྒྱབ་སྐྱོར་ཚོགས་པ་ཆེ་ཤོས་དེ་གསར་འཛུགས་གནང་ཐུབ་ཡོད། ཅེས་དང་།གཞན་ཡང་དཔལ་ལྡན་སྲིད་སྐྱོང་མཆོག་གིས་སྲིད་བློན་ཟུར་པ་སྐུ་ཞབས་ཤིན་ཛོ་ཨ་བྷེ་མཆོག་གིས་བོད་དོན་སྐོར་ཉི་ཧོང་ནང་གླེང་སློང་ཤུགས་ཆེ་གནང་སྟབས། ཉི་ཧོང་བ་ཚོས་བོད་བརྒྱུད་ནང་བསྟན་དང་རིག་གཞུང་ལ་དོ་སྣང་དང་། དེ་བཞིན་བོད་དོན་ལ་རྒྱབ་སྐྱོར་གྱི་རྣམ་པ་ཉིན་རེ་བཞིན་ཤུགས་ཆེ་རུ་འགྲོ་བཞིན་ཡོད། ཅེས་འཁོད་ཡོད་པ་དང་། སྐབས་དེར་ཉི་ཧོང་གི་སྲིད་བློན་ཟུར་པ་སྐུ་ཞབས་ཤིན་ཛོ་ཨ་བྷེ་མཆོག་གིས་གསུང་དོན། ཉི་ཧོང་གི་སྲིད་བློན་ཡིན་པའི་སྐབས་ངས་བོད་ཀྱི་གནད་དོན་དེ་རྒྱལ་སྤྱིའི་ཚོགས་འདུའི་སྟེང་གླེང་སློང་ཞུས་ཡོད། བོད་མི་ཚོས་ངེས་པར་དུ་ཡུ་རོབ་སྤྱི་མཐུན་ཚོགས་པའི་ནང་བོད་དོན་ཞུ་གཏུག་གི་ལས་འགུལ་ཤུགས་ཆེ་རུ་གཏོང་དགོས། ཞེས་དང་། གཞན་ཡང་ཁོང་གིས་ད་ལྟའི་བོད་ནང་གི་གནས་སྟངས་སྤྱིའི་སྐོར་བཀའ་འདྲི་གནང་བ་མ་ཟད། བོད་ཀྱི་གནད་དོན་དེ་རྒྱལ་སྤྱི་རིམ་པའི་སྡིངས་ཆའི་སྟེང་དང་། དེ་བཞིན་ཉེ་ཆར་ཚོགས་ཟིན་པའི་འཛམ་གླིང་གི་སྟོབས་ཆེན་རྒྱལ་ཁབ་བདུན་ (G7) ཞེས་པའི་ཚོགས་འདུའི་སྟེང་དེ་ཙམ་གླེང་སློང་གནང་མེད་སྟབས་ཐུགས་འཚབ་གནང་གི་ཡོད་པའི་སྐོར་གསུངས་ཡོད། ཉི་ཧོང་སྐུ་ཚབ་དོན་གཅོད་ཨརྱ་ཚེ་དབང་རྒྱལ་པོ་ལགས་ཀྱིས་སྲིད་བློན་ཟུར་པ་སྐུ་བས་ཤིན་ཛོ་ཨ་བྷེ་མཆོག་ལ་ད་ལྟའི་བོད་ནང་གི་གནས་སྟངས་ཧ་ཅང་ཛ་དྲག་ཏུ་གྱུར་ཡོད་པ་མ་ཟད། རྒྱ་ནག་གཞུང་གིས་བོད་མིའི་འགྲོ་འདུག་རང་དབང་སོགས་ཀྱི་ཐོག་དམ་བསྒྲགས་དང་། བོད་ས་ཡོངས་རྫོགས་ཉེན་རྟོག་པའི་གཞུང་ཞིག་ཏུ་བསྒྱུར་ཡོད། ཅེས་གསུངས།དེ་རྗེས་སྐུ་ཚབ་དོན་གཅོད་ཨརྱ་ཚེ་དབང་རྒྱལ་པོ་ལགས་ཀྱིས་ཉི་ཧོང་རྒྱལ་ཡོངས་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཚོགས་གཙོ་དང་ཉི་ཧོང་ཤེས་རིག་བློན་ཆེན་ཟུར་པ་སྐུ་ཞབས་ཞི་མོ་མུ་ར་ཧ་ཀུ་བྷུན་ (Shimomura Hakubun) མཆོག་དང་མཇལ་འཕྲད་ཀྱིས་དཔལ་ལྡན་སྲིད་སྐྱོང་མཆོག་གི་འཚམས་འཕྲིན་དེ་ཕུལ་ཡོད། དཔལ་ལྡན་སྲིད་སྐྱོང་མཆོག་གིས་འཚམས་འཕྲིན་གནང་བའི་ནང་འཁོད་དོན། སྐུ་ཉིད་ཀྱིས་དྲང་བདེན་དང་རང་དབང་གི་ཆེད་དུ་བོད་དོན་ལ་རྒྱབ་སྐྱོར་གནང་ཡོད། བོད་མིའི་དྲང་བདེན་གྱི་འཐབ་རྩོད་འདི་མདུན་ནས་མདུན་དུ་སྐྱོད་སླད་སྐུ་ཉིད་ཀྱིས་རྒྱལ་སྤྱིའི་གྲོས་ཚོགས་འཐུས་མི་རྣམ་པ་ཚོ་དང་ལྷན་མཉམ་ཞུགས་དང་རྒྱབ་སྐྱོར་གནང་བའི་རེ་སྐུལ་ཞུ་རྒྱུ་ཡིན། ཞེས་འཁོད་ཡོད།དེ་བཞིན་སྐུ་ཚབ་དོན་གཅོད་ཨརྱ་ཚེ་དབང་རྒྱལ་པོ་ལགས་ཀྱིས་ཉི་ཧོང་རྒྱལ་ཡོངས་གྲོས་ཚོགས་བོད་དོན་རྒྱབ་སྐྱོར་ཚོགས་པའི་དྲུང་ཆེ་སྐུ་ཞབས་ནཱ་གའོ་བཀྲ་ཀ་ཤིས་ (Mr. Nagao Takashi) མཆོག་དང་མཇལ་འཕྲད་ཀྱིས་དཔལ་ལྡན་སྲིད་སྐྱོང་མཆོག་གི་འཚམས་འཕྲིན་དེ་ཕུལ་ཡོད། དཔལ་ལྡན་སྲིད་སྐྱོང་མཆོག་གིས་འཚམས་འཕྲིན་གནང་བའི་ནང་འཁོད་དོན། སྐུ་ཉིད་ཀྱིས་བོད་དོན་སླད་ཧུར་ཐག་གིས་རྒྱབ་སྐྱོར་གནང་སྟེ་བོད་ཀྱི་གནད་དོན་དེ་ཉི་ཧོང་གི་གྲོས་ཚོགས་ནང་སླེབས་ཐུབ་པ་བཟོས་གནང་ཡོད་སྟབས། ང་ཚོས་སྐུ་ཉིད་ལ་སྙིང་ཐག་པ་ནས་ཐུགས་རྗེ་ཆེ་ཞུ་རྒྱུ་ཡིན། ཞེས་འཁོད་ཡོད་པ་བཅས།།