༄༅། །ཕྱི་ལོ་ ༢༠༢༡ ཟླ་ ༥ ཚེས་ ༢༩ ཉིན་ཉི་ཧོང་གི་བོད་དོན་རྒྱབ་སྐྱོར་ཆོས་ཚོགས་ (Super Samgha) ཞེས་པའི་སྐུ་ཚབ་ཀེན་ཇོ་ཨོ་ཀི་ (Ven. Kenjo Oki) ལགས་ཀྱིས་བོད་མི་མང་ཚོགས་ཀྱིས་མང་གཙོའི་ལམ་ནས་འོས་འདེམས་བྱས་པའི་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་ལ་འཚམས་འདྲི་ཞུས་གནང་བའི་ནང་འཁོད་དོན། ང་ཚོས་བོད་མིའི་སྒྲིག་འཛུགས་ཀྱི་སྲིད་སྐྱོང་གསར་པའི་དབུ་ཁྲིད་འོག་བོད་མིར་འཕྲད་བཞིན་པའི་དཀའ་ངལ་རྣམས་ཕན་ཚུན་བསམ་ཤེས་དང་འཚེ་མེད་ཞི་བའི་ཐབས་ལམ་བརྒྱུད་སེལ་ཐུབ་པའི་རེ་བ་བྱེད་ཀྱི་ཡོད།ང་ཚོའི་ཆོས་ཚོགས་ཀྱི་ངོས་ནས་དུས་རྟག་ཏུ་བོད་དང་བོད་མིར་རྒྱབ་སྐྱོར་བྱེད་རྒྱུའི་སྤོབས་པ་ཡོད། ཅེས་དང་།

གཞན་ཡང་ང་ཚོས་བོད་མིའི་སྒྲིག་འཛུགས་ཀྱི་སྲིད་སྐྱོང་ཟུར་པ་བློ་བཟང་སེངྒེ་མཆོག་གིས་འགན་ལྕི་མོ་བཞེས་གནང་སྟེ་ལོ་བཅུའི་ལས་ཡུན་རིང་ཧུར་ཐག་གིས་ཕྱག་ལས་གནང་བར་ཐུགས་རྗེ་ཆེ་ཞུ་རྒྱུ་ཡིན། ཞེས་འཁོད་འདུག་པ་བཅས། །