༄༅། །ཕྱི་ལོ་ ༢༠༢༡ ཟླ་ ༦ ཚེས་ ༡༤ ཉིན་ཁེ་ན་ཌའི་གྲོས་ཚོགས་བོད་དོན་རྒྱབ་སྐྱོར་ཚོགས་པའི་གོ་སྒྲིག་འོག་དྲ་ལམ་བརྒྱུད་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་དང་ལྷན་དུ་བོད་ཀྱི་ཉིན་མོ་སྲུང་བརྩི་དང་འབྲེལ་བོད་དོན་སླད་གདུང་སེམས་མཉམ་སྐྱེ་དང་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་ལ་ཐུགས་རྗེ་ཆེ་ཞུའི་མཛད་སྒོ་ཚོགས་ཡོད། མཛད་སྒོ་འདི་ནི་ཁེ་ན་ཌའི་གྲོས་ཚོགས་བོད་དོན་རྒྱབ་སྐྱོར་ཚོགས་པས་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་དང་ལྷན་དུ་དྲ་ལམ་བརྒྱུད་ཚོགས་འདུ་ཚོགས་པ་ཐེངས་དང་པོ་དེ་ཡིན་ཞིང་། ཚོགས་འདུའི་མཛད་སྒོར་ཁེ་ན་ཌའི་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཚོགས་གཙོ་སྐུ་ཞབས་ཨ་རིབ་ཝི་ར་ནི་ (Arif Virani) མཆོག་དང་། ཁེ་ན་ཌའི་གྲོས་ཚོགས་འཐུས་མི་སྐུ་ཞབས་གྷར་ནེ་ཊི་ (Garnett Genuis) མཆོག ཁེ་ན་ཊའི་གྲོས་ཚོགས་འཐུས་མི་ཇེམ་སི་མི་ལོ་ནི་ (James Maloney) མཆོག ཁེ་ན་ཌའི་གྲོས་ཚོགས་འཐུས་མི་སྐུ་ཞབས་ཌེ་ཝིཌ་སུ་ཝིཌ་ (MP David Sweet) མཆོག ཁ་ན་ཌའི་གྲོས་ཚོགས་འཐུས་སྐུ་ཞབས་ལར་རེ་བྷག་ནེལ་ (Larry Bagnell) མཆོག དེ་བཞིན་བོད་མིའི་སྒྲིག་འཛུགས་ཀྱི་ཕྱི་འབྲེལ་དྲུང་ཆེ་ཀརྨ་ཆོས་དབྱིངས་ལགས་དང་། དྲིལ་བསྒྲགས་དྲུང་ཆེ་འཆི་མེད་ཚེ་དབྱངས་ལགས། བྱང་ཨ་རིའི་སྐུ་ཚབ་དོན་གཅོད་དངོས་གྲུབ་ཚེ་རིང་ལགས། ཁེ་ན་ཌའི་བོད་དོན་རྒྱབ་སྐྱོར་ཚོགས་པའི་ (Canada Tibet Committee) འགན་འཛིན་ཤེས་རབ་མཐར་ཕྱིན་ལགས། ཁེ་ན་ཌའི་བོད་རིགས་སྤྱི་མཐུན་ཚོགས་པ་དང་གཞུང་འབྲེལ་མིན་པའི་ཚོགས་པ་ཁག་གི་ཚོགས་གཙོ་སོགས་མཉམ་ཞུགས་གནང་ཡོད།
དེ་ཡང་ཐོག་མར་ཁེ་ན་ཌའི་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཚོགས་གཙོ་སྐུ་ཞབས་ཨ་རིབ་ཝི་ར་ནི་མཆོག་གིས། བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་ལ་བོད་སྐད་ཐོག་ཕེབས་བསུའི་འཚམས་འདྲི་ཞུས་པ་དང་འབྲེལ་དཔལ་ལྡན་སྲིད་སྐྱོང་མཆོག་དང་ལྷན་ལས་དོན་གནང་ཕྱོགས་ཐད་འབྲེལ་བ་བཟང་པོ་ཡོང་བར་རེ་ལྟོས་ཧ་ཅང་བྱེད་བཞིན་ཡོད། ཅེས་དང་། ངས་བོད་མིའི་སྒྲིག་འཛུགས་ཀྱི་དབུ་མའི་ལམ་གྱི་སྲིད་བྱུས་ལ་རྒྱབ་སྐྱོར་ཞུ་རྒྱུའི་ཆོད་སེམས་བརྟན་པོ་ཡོད་པ་མ་ཟད། བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༧གོང་ས་༧སྐྱབས་མགོན་ཆེན་མཆོག་ལའང་དབུ་མའི་ལམ་གྱི་སྲིད་བྱུས་ལ་རྒྱབ་སྐྱོར་ཞུ་རྒྱུའི་ཁས་ལེན་ཞུས་ཡོད། ཁེ་ན་ཌ་དང་རྒྱལ་སྤྱིའི་ཐོག་ནས་ཀྱང་དབུ་མའི་ལམ་གྱི་སྲིད་བྱུས་གཞིར་བཞག་ཐོག་བོད་དོན་ལ་དོ་སྣང་གནང་བཞིན་ཡོད། ཅེས་གསུངས།
གཞན་ཡང་ཁོང་གིས་ཁེ་ན་ཌའིི་གྲོས་ཚོགས་གོང་འོག་གཉིས་ཀྱི་ནང་དབུ་མའི་ལམ་གྱི་སྲིད་བྱུས་དང་བོད་རྒྱ་གྲོས་མོལ་བསྐྱར་གསོ་ཡོང་ཐབས་སུ་རྒྱབ་སྐྱོར་གྱི་གྲོས་འཆར་གཉིས་གཏན་འབེབས་གནང་མ་ཐུབ་པར་ལྷག་ཡོད་པའི་སྐོར་དང་། བོད་རྒྱའི་གནད་དོན་གང་མགྱོགས་གསལ་ཐབས་སུ་ཁེ་ན་ཌའི་གྲོས་ཚོགས་འཐུས་མི་རྣམ་པས་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་དང་ལྷན་མཉམ་རུབ་ཐོག་ཕྱག་ལས་གནང་རྒྱུའི་ཆོད་སེམས་བརྟན་པོ་ཡོད་པ་སོགས་ཀྱི་སྐོར་གསུངས།
བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་ཁེ་ན་ཌའི་གྲོས་ཚོགས་འཐུས་མི་རྣམ་པས་གཙོས་མཉམ་ཞུགས་གནང་མཁན་ཡོངས་ལ་ཐུགས་རྗེ་ཞུས་པ་དང་སྦྲགས་རྒྱལ་སྤྱིའི་བོད་དོན་ཞུ་གཏུག་ལས་འགུལ་སྐོར་གསུངས་ཡོད།
སྐབས་དེར་དཔལ་ལྡན་སྲིད་སྐྱོང་མཆོག་གིས་ཕྱི་རྒྱལ་ཡུལ་གྲུ་ཁག་ ༢༥ ནང་བོད་མི་གནས་སྡོད་བྱེད་བཞིན་ཡོད་པ་དང་། བོད་མི་དེ་དག་གིས་ས་གནས་སོ་སོའི་སྐད་ཡིག་དང་། ཁྲིམས་དང་སྒྲིག་གཞི་སྐོར་ལེགས་པར་མཁྱེན་གྱི་ཡོད་སྟབས། བོད་མི་དེ་དག་གིས་ས་གནས་གྲོས་ཚོགས་འཐུས་མི་དང་གནད་ཡོད་མི་སྣ་སོགས་དང་ལྷན་བོད་དོན་ཞུ་གཏུག་གི་ལས་འགུལ་སྤེལ་ཐུབ་པའི་ནུས་པ་ཡོད་པའི་སྐོར་གསུངས་པ་མ་ཟད། ཁེ་ན་ཌ་ཡིས་བོད་དོན་ཞུ་གཏུག་གི་ལས་འགུལ་ཆེད་དུ་མིག་དཔེ་ལྡན་པ་ཞིག་བསྐྲུན་རྒྱུར་རེ་བ་གནང་གི་ཡོད་པའི་སྐོར་གསུངས།
གཞན་ཡང་དཔལ་ལྡན་སྲིད་སྐྱོང་མཆོག་གིས་ཁེ་ན་ཌའི་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ངོས་ནས་ཉམས་མྱོང་གསོག་ཆེད་བོད་པའི་གཞོན་སྐྱེས་རྣམས་ལ་དུས་ཡུན་རིང་ཐུང་འདྲ་མིན་རིང་ལས་ཀའི་ལས་འཆར་སྤེལ་བཞིན་པར་བསྔགས་བརྗོད་དང་། ལས་ཀའི་ལས་འཆར་དེའི་ཁེ་ཕན་ལ་བརྟེན་ནས་བོད་པའི་གཞོན་སྐྱེས་ཚོས་ད་ལྟ་བོད་པའི་སྤྱི་ཚོགས་ནང་ཞབས་འདེགས་བསྒྲུབས་དང་སྒྲུབ་བཞིན་པ་སོགས་ཀྱི་སྐོར་གསུངས།
བྱང་ཨ་རིའི་སྐུ་ཚབ་དོན་གཅོད་དངོས་གྲུབ་ཚེ་རིང་ལགས་ཀྱིས་ཁེ་ན་ཌའི་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཚོགས་གཙོ་སྐུ་ཞབས་ཨ་རིབ་ཝི་ར་ནི་མཆོག་དང་ཁེ་ན་ཌའི་གྲོས་ཚོགས་འཐུས་མི་རྣམས་ནས་བོད་ཀྱི་ཉིན་མོ་སྲུང་བརྩིའི་མཛད་སྒོར་མགྲོན་འབོད་གནང་བར་ཐུགས་རྗེ་ཞུས་པ་དང་འབྲེལ་ཁེ་ན་ཌའི་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ངོས་ནས་ཉམས་མྱོང་གསོག་ཆེད་བོད་པའི་གཞོན་སྐྱེས་རྣམས་ལ་དུས་ཡུན་རིང་ཐུང་འདྲ་མིན་རིང་ལས་ཀའི་ལས་འཆར་སྤེལ་བཞིན་པར་རྗེས་སུ་ཡི་རང་ཞུས་གནང་ཡོད། བསྟན་འཛིན་མཆོག་སྐྱིད་ལགས་ཀྱིས་བོད་ཀྱི་ཉིན་མོ་རེས་གཟའ་ལྷག་པ་ཉིན་སྲུང་བརྩི་དགོས་པའི་གལ་གནད་སོགས་ཀྱི་སྐོར་གསུང་བཤད་གནང་ཡོད་པ་བཅས།།
