༄༅། །ཕྱི་ལོ་ ༢༠༢༡ ཟླ་ ༦ ཚེས་ ༣ ཉིན་བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ཀྱི་ཏོག་དབྱིབས་གཉན་རིམས་ལས་དོན་ཚོགས་ཆུང་གི་གསར་འགོད་གསལ་བསྒྲགས་ཐེངས་ ༦༢ དེ་སྤེལ་ཡོད་པ་དང་། གསལ་བསྒྲགས་གནང་མཁན་བོད་མིའི་སྒྲིག་འཛུགས་ཀྱི་འཕྲོད་བསྟེན་དྲུང་ཆེ་དཔལ་ལྡན་དོན་གྲུབ་ལགས་དང་། སྨན་པ་ཚེ་རིང་མཚམས་གཅོད་ལགས། སྨན་པ་བསྟན་འཛིན་རྣམ་གྲོལ་ལགས་བཅས་ཡིན།
དེ་ཡང་འཕྲོད་བསྟེན་དྲུང་ཆེ་དཔལ་ལྡན་དོན་གྲུབ་ལགས་ཀྱིས་གསུང་དོན། ངས་བོད་མིའི་སྒྲིག་འཛུགས་ཀྱི་ཏོག་དབྱིབས་གཉན་རིམས་ལས་དོན་ཆོགས་ཆུང་གི་མིང་ཐོག་ནས་དོན་ཚན་དྲུག་ཙམ་གྱི་ཐོག་ཞུ་རྒྱུ་ཡིན།
དང་པོ། ད་ཆ་ཏོག་དབྱིབས་གཉན་རིམས་ཀྱི་རྦ་རླབས་གཉིས་པ་ཞེས་བརྗོད་བཞིན་ཡོད། བོད་མིའི་སྒྲིག་འཛུགས་ཀྱི་འཕྲོད་བསྟེན་ལས་ཁུངས་ནས་ནད་རླབས་དང་པོ་དེ་ཕྱི་ལོ་ ༢༠༢༠ ཟླ་ ༥ ནས་ཕྱི་ལོ་ ༢༠༢༡ ཟླ་ ༢ བར་ཟླ་བ་བཅུའི་རིང་དེ་རྩིས་ཀྱི་ཡོད། གང་ཡིན་ཞེ་ན་བོད་པའི་སྤྱི་ཚོགས་ནང་ཏོག་དབྱིབས་གཉན་རིམས་ཀྱི་ནད་པ་དང་པོ་དེ་ཕྱི་ལོ་ ༢༠༢༠ ཟླ་ ༥ ནང་ཐོན་སྟབས་དུས་དེ་ནས་བཟུང་ཕྱི་ལོ་ ༢༠༢༡ ཟླ་ ༢ བར་ནད་རླབས་དང་པོ་དེ་རྩིས་ཀྱི་ཡོད། ནད་རླབས་དང་པོའི་སྐབས་བོད་པའི་སྤྱི་ཚོགས་ནང་ཁྱོན་མི་གྲངས་ ༡༥༦༦ ཙམ་ནད་མནར་བྱུང་འདུག་པ་དང་མི་གྲངས་ ༤༠ འདས་གྲོངས་སུ་གྱུར་འདུག དེ་དག་གི་གནས་སྟངས་ལ་བལྟས་ན་ཟླ་བ་བཅུའི་རིང་ཟླ་རེར་མི་གྲངས་ ༡༥༦ ཙམ་ལ་ནད་ཡམས་ཕོག་ཡོད། དེ་བཞིན་ཟླ་བ་རེར་མི་གྲངས་ ༤ ཙམ་འདས་གྲོངས་སུ་གྱུར་ཡོད། 
ནད་རླབས་གཉིས་པ་དེ་ཕྱི་ལོ་ ༢༠༢༡ ཟླ་ ༣ ནས་ ༥ ཟླ་མཇུག་བར་རྒྱ་གར་དང་བལ་ཡུལ་ནང་ཁྱོན་མི་གྲངས་ ༢༤༥༣ ལ་ནད་གཞི་ཕོག་ཡོད་པ་དང་མི་གྲངས་ ༨༢ འདས་གྲོངས་སུ་གྱུར་ཡོད། ནད་རླབས་དང་པོ་དང་གཉིས་པ་གཉིས་མཚུངས་བསྡུར་བྱས་པ་ཡིན་ན་ནད་རླབས་གཉིས་པ་འདི་ཧ་ཅང་ཤུགས་ཆེ་བ་ཡོད་པ་གསལ་པོ་རེད། ནད་རླབས་ཤུགས་ཆེ་བ་ཡོད་སྟབས། མང་ཚོགས་ནས་སོ་སོའི་འཕྲོད་བསྟེན་ལ་སྔར་ལྷག་དགོངས་པ་བཞེས་དགོས་རྒྱུ་ཧ་ཅང་གལ་ཆེན་པོ་ཡིན།
བཀའ་ཤག་སྐབས་ ༡༦ པས་དབུས་ཏོག་དབྱིབས་གཉན་རིམས་ཛ་དྲག་ལས་དོན་ཚོགས་ཆུང་ལ་འགན་དབང་བསྐུར་གནང་བ་ལྟར་ཐག་གཅོད་དང་པོ་དེ་ཕྱི་ལོ་ ༢༠༢༡ ཟླ་ ༦ ཚེས་ ༡ ནས་བཟུང་སྨན་ཁང་སོ་སོའི་ནང་ནད་པ་འབྲིང་ཙམ་དང་། སྨན་བཅོས་བྱས་ནས་དྲག་སྐྱེད་འགྲོ་བཞིན་པ། ཕྱིའི་སྨན་ཁང་ཁག་ཏུ་སྨན་བཅོས་སླད་འཁྱེར་མི་དགོས་པ་བཅས་ལ་སྨན་བཅོས་བྱེད་པའི་སྐབས་སྨན་བཅོས་ཀྱི་འགྲོ་གྲོན་ཡོངས་རྫོགས་འཕྲོད་བསྟེན་ལས་ཁུངས་ནས་གནང་བ་མ་གཏོགས་ནད་པའི་སར་ནས་རྩ་བ་ཉིད་ནས་བསྡུ་བཞེས་མི་དགོས་པའི་ཐག་གཅོད་ཟིན་པ་ཡིན།
གཉིས་པ། རང་ལོ་ ༡༧ ནས་ ༤༤ བར་སྔོན་འགོག་སྨན་ཁབ་རྒྱག་རྒྱུ་འགོ་བཙུགས་པ་ནས་བཟུང་རྒྱ་གར་ནང་སྔོན་འགོག་སྨན་ཁབ་ཉུང་དུ་ཕྱིན་པའི་རྒྱུ་མཚན་ལ་བརྟེན་ནས་སྔོན་འགོག་སྨན་ཁབ་ཐོབ་ཐབས་མེད་པའི་གནས་སྟངས་ཆགས་པར་བརྟེན་དཔལ་ལྡན་སྲིད་སྐྱོང་མཆོག་གིས་བཀོད་མངགས་གནང་བ་ལྟར་སྒྲིག་འཛུགས་ནས་མངའ་སྡེ་སོ་སོའི་ཁོངས་ནས་ཐོབ་ཐབ་གནང་བཞིན་ཡོད། 
གསུམ་པ། སྨན་པ་མང་ཆེ་བས་ནད་རླབས་གསུམ་པ་ཞིག་སླེབ་བཞིན་ཡོད་ཅེས་དང་། དེ་བཞིན་ཁག་གཅིག་གིས་ནད་རླབས་གསུམ་པ་སླེབ་ཀྱི་མ་རེད་ཅེས་གསུང་གི་འདུག གང་ལྟར་ནད་རླབས་གསུམ་པ་སླེབ་པ་ཡིན་ན་ལོ་ན་ཆུང་བ་ཚོར་ཉེན་ཚབས་ཆེ་བ་ཡོད་སྐོར་གསུང་གི་ཡོད། ད་བར་ལུས་སེམས་གསོ་བྱེད་ཀྱི་སྨན་དེ་གསུམ་ཆ་གཅིག་དབུས་བོད་ཀྱི་སྨན་རྩིས་ཁང་གིས་རིན་པ་གནང་བ་དང་། གསུམ་ཆ་གཉིས་བོད་མིའི་སྒྲིག་འཛུགས་ཀྱིས་གནང་སྟེ་བོད་མི་ཕལ་ཆེར་སྟོང་ཕྲག་ ༣༥་་༣༦ ཙམ་ལ་ཕུལ་ཟིན། ད་ལྟའི་ཆར་ལུས་སེམས་གསོ་བྱེད་ཀྱི་སྨན་དེ་ལོ་བཞི་ནས་བཅུ་བདུན་བར་དང་། ལོ་བཅོ་བརྒྱད་ནས་བཞི་བཅུ་ཞེ་བཞི་བར་ཁབ་མ་ཐོབ་མཁན་ཡོངས་ལ་དགོས་མཁོ་ཆེ་བ་འདུག
བཞི་པ། སྤྱིར་ཆོས་ཕྱོགས་ཀྱི་བྱེད་སྒོ་ཁག་གལ་ཆེན་པོ་རེད། འོན་ཀྱང་ད་ལྟའི་དུས་སུ་ཆོས་ཕྱོགས་ཀྱི་བྱེད་སྒོ་གང་ཡིན་རུང་ཚོགས་ཁང་ནང་འཛོམས་ཏེ་གནང་མི་དགོས་པར་རང་ཉིད་ཀྱི་ཁྱིམ་ཚང་དུ་བསགས་ཏེ་བརྒྱ་དཔོན་གྱིས་གྲངས་ཐོ་བསྡུས་པ་ཡིན་ནའང་མ་འགྲིག་པ་མེད་པར་བརྟེན་ད་ལྟའི་ཆར་འདུ་འཛོམས་རིག་རྩ་བ་ཉིད་ནས་མ་གནང་རོགས་ཞེས་འབོད་སྐུལ་ཞུ་རྒྱུ་ཡིན། འབོད་སྐུལ་ཞུས་པ་ནང་ལྟར་ཕྱག་བསྟར་གནང་རོགས།
ལྔ་པ། ས་གནས་འགོ་འཛིན་ཡོངས་ལ་ཡོངས་ཁྱབ་གསལ་བསྒྲགས་ཤིག་ཕུལ་བའི་ནང་ད་ལྟའི་ཆར་འདུ་འཛོམས་རིགས་རྩ་བ་ཉིད་ནས་མེད་པ་གནང་རོགས། གལ་ཏེ་ཛ་དྲག་ཚོགས་དགོས་ཀྱི་ཡོད་ན། བུད་མེད་སྦྲུམ་མ་དང་། ནམ་རྒྱུན་ནས་ལུས་པོ་གཅོང་པོ་ཡིན་པ། བླ་གཉན་གྱི་ནད་གཞི་ཡོད་མཁན་རིགས་ཕེབས་མི་དགོས་པ་གཙོ་འདོན་གནང་རོགས། ཞེས་ཡིག་ཐོག་འབོད་སྐུལ་བཏང་ཟིན་པ་ཡིན།
དྲུག་པ། འདས་པའི་དུས་ཡུན་ཟླ་བ་གསུམ་གྱི་ནང་རྒྱ་གར་ནང་གནས་སྟངས་ཚབས་ཆེ་ཆགས་པར་བརྟེན་བོད་པར་ཤ་ཚ་ཡོད་མཁན་དང་བོད་མི་ནང་ཁུལ་གཅིག་ཕན་གཅིག་གྲོགས་ཀྱི་ཚུལ་དུ་འཚོ་རླུང་དང་ཁ་རས། oxygen concentrator, PPE Kit སོགས་ཀྱི་ཞལ་འདེབས་ཕོན་ཆེ་གནང་བར་བརྟེན་གནས་སྐབས་དཀའ་ངལ་སེལ་ཐུབ་པ་བྱུང་འདུག ད་ཆ་སྔོན་ཁབ་ཐད་དཀའ་ངལ་འཕྲད་བཞིན་ཡོད་སྟབས་དེའི་ཐད་ཞལ་འདེབས་གནང་མཁན་ཡོད་ན་དགའ་བསུ་ཡོད། ཅེས་གསུངས་གྲུབ་མཚམས་ལས་དོན་ཚོགས་ཆུང་གི་གསར་འགོད་འབྲེལ་མཐུད་པ་སྨན་པ་ཚེ་རིང་མཚམས་གཅོད་ལགས་ཀྱིས་འདས་པའི་བདུན་ཕྲག་གཅིག་ནང་ཚོགས་ཆུང་གི་སྙན་ཐོའི་སྐོར་གསུང་དོན། འདས་པའི་བདུན་ཕྲག་ནང་རྒྱ་གར་ནང་གི་བཙན་བྱོལ་བོད་མིའི་གཞིས་ཆགས་ཁག་ ༢༢ དང་། བལ་ཡུལ་ནང་གི་བཙན་བྱོལ་བོད་མིའི་གཞིས་ཆགས་ཁག་ ༤ བཅས་ཁྱོན་བཙན་བྱོལ་བོད་མིའི་གཞིས་ཆགས་ཁག་ ༢༦ ནང་གི་བོད་མི་རང་ཁྱིམ་དུ་མི་གྲངས་ ༦༠༣ དང་སྒྲིག་འཛུགས་ནས་མཐུན་འགྱུར་སྦྱར་བའི་འགོག་དབྱེ་ཟུར་འཇོག་ཁང་དུ་བཞུགས་མཁན་མི་གྲངས་ ༤༥༦ བཅས་ཁྱོན་བསྡོམས་བོད་མི་གྲངས་ ༡༠༥༩ འགོག་དབྱེ་ཟུར་བཀག་ཐོག་བཞུགས་ཡོད།
ད་བར་གསོ་རིག་ལུས་སེམས་ནུས་གསོའི་སྨན་ཁྱོན་བསྡོམས་ ༣༥༧༩༨ རིན་མེད་ཐོག་ཕུལ་ཐུབ་པ་བྱུང་ཡོད། སེམས་ཁམས་འཕྲོད་བསྟེན་དང་འབྲེལ་བའི་འདས་པའི་བདུན་ཕྲག་ནང་ནད་གཞི་ཕོག་པའི་མི་གྲངས་ ༡༡༤ ལ་སེམས་ཁམས་འཕྲོད་བསྟེན་དང་འབྲེལ་བའི་ལམ་སྟོན་སློབ་གསོ་སོགས་གནང་ཐུབ་པ་བྱུང་ཡོད། ནད་ཡམས་ཁྱབ་བརྡལ་སྔོན་འགོག་སླད་བདུན་ཕྲག་འདིའི་ནང་རྒྱ་གར་ནང་གི་ས་གནས་གྲངས་ ༡༦ དང་བལ་ཡུལ་ནང་གི་ས་གནས་གྲངས་ ༢ ཀྱི་བོད་མི་གྲངས་ ༡༤༠༩ ལ་ནད་གཞི་ཕོག་ཡོད་མེད་བརྟག་དཔྱད་གནང་ཐུབ་པ་བྱུང་ཡོད།
དེ་བཞིན་སྔོན་འགོག་སྨན་ཁབ་རྒྱག་སྒོ་ཚུགས་པ་ནས་བཟུང་ད་བར་རྒྱ་གར་དང་བལ་ཡུལ་ནང་མདུན་དུ་ཐོན་ནས་ཕྱག་ལས་གནང་མཁན་མི་གྲངས་ ༡༣༣༣ དང་། ལོ་ན་ ༦༠ ཡན་གྱི་མི་གྲངས་ ༧༩༡༥། ལོ་ན་ ༤༥ ཡན་གྱི་མི་གྲངས་ ༧༤༨༥། ལོ་ན་ ༡༨ ཡན་གྱི་མི་གྲངས་ ༡༠༣༧ བཅས་ཁྱོན་མི་གྲངས་ ༡༧༧༧༠ ཙམ་ལ་སྔོན་འགོག་སྨན་ཁབ་བརྒྱབ་ཟིན་པ་ཆགས་ཀྱི་ཡོད།
འདས་པའི་བདུན་ཕྲག་གཅིག་གི་ནང་རྒྱ་གར་དང་བལ་ཡུལ་ནང་དུ་ནད་གཞི་ཕོག་པ་ར་འཕྲོད་བྱུང་བ་མི་གྲངས་ ༢༩༦ བྱུང་ཡོད་པ་ལས་སྐྱེས་པ་གྲངས་ ༡༨༩ དང་། བུད་མེད་གྲངས་ ༡༠༧ དེའི་ནང་ནས་དགུང་ན་མཐོ་ཤོས་དེ་ ༦༦ དང་ཆུང་ཤོས་དེ་བྱིས་པ་ལོ་ ༢ ཡིན། བློ་ཕམ་པའི་གནས་ཚུལ་ཞིག་ལ་བདུན་ཕྲག་འདིའི་ནང་སྐྱེས་པ་གྲངས་ ༠༥ དང་བུད་མེད་གྲངས་ ༠༣ བཅས་ཁྱོན་མི་གྲངས་ ༠༨ འདས་གྲོངས་སུ་གྱུར་ཡོད། ད་བར་རྒྱ་གར་དང་བལ་ཡུལ་ནང་གི་བོད་མི་ནད་གཞི་ཕོག་པ་ཁྱོན་མི་གྲངས་ ༤༦༨༡ དང་། དྲག་སྐྱེད་བྱུང་བ་མི་གྲངས་ ༣༦༩༦ འདས་གྲོངས་སོང་བ་མི་གྲངས་ ༡༢༢ ད་ལྟ་ནད་མནར་གསོ་བཅོས་བཞིན་པ་མི་གྲངས་ ༨༦༣ ཡོད་འདུག ཅེས་སོགས་གསུངས།
དེ་ནས་སྨན་པ་བསྟན་འཛིན་རྣམ་གྲོལ་ལགས་ཀྱིས་ལམ་སྟོན་གནང་དོན། རྒྱ་གར་རྒྱལ་ཡོངས་ཀྱི་ནང་ཏོག་དབྱིབས་གཉན་རིམས་ཀྱི་ནད་རླབས་གཉིས་པའི་ཁྲོད་ནད་གཞི་ཕོག་པ་མི་གྲངས་ཧ་ཅང་མང་པོ་བྱུང་ཡོད་པ་མ་ཟད། རིམ་བཞིན་དྲག་སྐྱེད་ཕྱིན་པ་ཡང་མང་པོ་བྱུང་ཡོད། བདུན་ཕྲག་གཉིས་གསུམ་རྗེས་ནད་གཞི་དྲག་སྐྱེད་བྱུང་སྟེ་ནད་རྟགས་གང་ཡང་ལྷག་གི་མེད། འོན་ཀྱང་མི་ཁག་གཅིག་ལ་ནད་རྟགས་ཡུན་རིང་ལྷག་པ་ཡང་ཡོང་གི་ཡོད། དེ་དག་ནི་ཕལ་ཆེ་བ་ལོ་ན་བགྲེས་པ་དང་བླ་གཉན་གྱི་ནད་གཞི་ཡོད་མཁན་རིགས་ཡིན། ཏོག་དབྱིབས་གཉན་རིམས་ཕོག་མཁན་ཕལ་ཆེ་བའི་གློ་བར་གནོད་སྐྱོན་བྱེད་ཀྱི་ཡོད་པར་བརྟེན་དྲག་སྐྱེད་བྱུང་ནའང་གློ་བར་དཀའ་ངལ་འཕྲད་དེ་དབུགས་གཏོང་ལེན་སོགས་ཀྱི་དཀའ་ངལ་འཕྲད་ཀྱི་ཡོད། ཅེས་སོགས་ཀྱི་ལམ་སྟོན་གནང་སྟེ་ལས་དོན་ཚོགས་ཆུང་གི་གསར་འགོད་གསལ་བསྒྲགས་ཐེངས་ ༦༡ དེ་མཇུག་སྒྲིལ་ཡོད། །
