༄༅། །ཕྱི་ལོ་ ༢༠༢༡ ཟླ་ ༦ ཚེས་ ༡༢ ཉིན་ཉི་ཧོང་སྐུ་ཚབ་དོན་གཅོད་ཨརྱ་ཚེ་དབང་རྒྱལ་པོ་ལགས་ཀྱིས་ལྷོ་ཀོ་རི་ཡའི་བོད་རིགས་ཚོགས་པ་དང་ལྷན་དྲ་ལམ་བརྒྱུད་ཚོགས་འདུ་ཞིག་ཚོགས་གནང་ཡོད།
ཐེངས་འདིའི་དྲ་ཐོག་གི་ཚོགས་འདུའི་ཐོག་བསླབ་གསུམ་བཤད་སྒྲུབ་གླིང་གི་འགན་འཛིན་དགེ་བཤེས་བསྟན་འཛིན་ནམ་མཁའ་ལགས་དང་། དགེ་བཤེས། ལྷོ་ཀོ་རི་ཡའི་ས་གནས་འདྲ་མིན་ནང་རྟེན་གཞི་བྱས་པའི་འབུམ་རམས་པའི་སློབ་མ། དེ་བཞིན་ཉི་ཧོང་བོད་རིགས་ཚོགས་པའི་རྒྱུན་ལས་ཚེ་རིང་ལགས་དང་། ཀརྨ་ལྷ་མོ་ལགས་བཅས་མཉམ་ཞུགས་གནང་ཡོད།
དེ་ཡང་ཚོགས་འདུའི་ཐོག་ཉི་ཧོང་སྐུ་ཚབ་དོན་གཅོད་ཨརྱ་ཚེ་དབང་རྒྱལ་པོ་ལགས་ཀྱིས་ང་ཚོའི་རིག་གཞུང་གཅེས་འཛིན་དང་། ང་ཚོའི་ངོ་བོ། མཐུན་སྒྲིལ་བཅས་ཀྱི་གལ་ཆེའི་རང་བཞིན་ཐོག་གསུང་བཤད་གནང་ཡོད་པ་དང་། སྤྱི་པའི་རྩ་དོན་ནམ་ཡང་མི་བརྗེད་པ་བྱ་དགོས་སྐོར་གསུངས། ཁོང་གིས་ས་ཁུལ་སོ་སོར་བོད་རིགས་སྤྱི་མཐུན་ཚོགས་པ་གསར་བཙུགས་གནང་སྟེ་ཀོ་རི་ཡའི་གཞུང་དང་། གྲོས་ཚོགས། མི་མང་བཅས་དང་ལྷན་འབྲེལ་བ་བཙུགས་ཏེ་བོད་ཀྱི་འཐབ་རྩོད་ལ་རྒྱབ་སྐྱོར་ཐོབ་རྒྱུར་འབད་དགོས་སྐོར་གསུངས།
གཞན་ཡང་སྐུ་ཚབ་དོན་གཅོད་ཨརྱ་ཚེ་དབང་རྒྱལ་པོ་ལགས་ཀྱིས་བོད་མིའི་སྒྲིག་འཛུགས་ཀྱི་དཔལ་འབྱོར་ལས་ཁུངས་དང་གོ་བསྡུར་བྱས་ཏེ་ཀོ་ར་ཡར་གནས་སྡོད་བོད་མི་རྣམས་ཀྱི་དྭང་བླངས་དཔྱ་དངུལ་བསྡུ་རུབ་སྟབས་བདེ་རུ་གཏོང་རྒྱུ་ཡིན་སྐོར་གསུངས། ཁོང་གིས་ཀོ་རི་ཡར་གནས་སྡོད་བོད་མི་རྣམས་ནས་དྲ་རྒྱ་བརྒྱུད་བོད་ཀྱི་དུས་སྟོན་སྲུང་བརྩི་ཞུས་ཏེ་བོད་ཀྱི་ཆོས་དང་རིག་གཞུང་སོགས་གོ་རྟོགས་སྤེལ་རེས་གནང་ཐུབ་རྒྱུ་ཡིན་སྐོར་དང་། དེ་བཞིན་ཉི་ཧོང་བོད་ཁང་གིས་ངོས་ནས་རྒྱལ་ཁབ་ཀྱི་ཁྲིམས་ལ་གཞིགས་ནས་ཀོ་རི་ཡར་གནས་སྡོད་བོད་མི་རྣམས་ཀྱི་བདེ་སྡུག་ལ་རྒྱབ་སྐྱོར་ཞུ་རྒྱུ་ཡིན་ཞེས་གསུངས།
མཐར་སྐུ་ཚབ་དོན་གཅོད་ཨརྱ་ཚེ་དབང་རྒྱལ་པོ་ལགས་ཀྱིས་ཀོ་རི་ཡར་གནས་སྡོད་བོད་མི་རྣམས་ཀྱིས་ཏོག་དབྱིབས་གཉན་རིམས་སྔོན་འགོག་ལས་དོན་ཆེད་རྒྱ་གར་གྱི་སྲིད་བློན་མཆོག་གི་ཛ་དྲག་གུད་སྐྱོབ་མ་དངུལ་ལ་ལྷག་བསམ་རྣམ་དག་དང་གཏོང་ཕོད་ཆེན་པོས་ཞལ་འདེབས་ཕུལ་བར་ཐུགས་རྗེ་ཆེ་ཞུས་པ་དང་འབྲེལ། ཏོག་དབྱིབས་གཉན་རིམས་མེད་པའི་དུས་སྐབས་ཤིག་ལ་ས་ཁུལ་དེར་འཚམས་འདྲིར་ཕེབས་རྒྱུ་ཁས་ལེན་གནང་ཡོད།
དེ་རྗེས་བསླབ་གསུམ་བཤད་སྒྲུབ་གླིང་གི་དགེ་བཤེས་དང་། ཀོ་རི་ཡའི་གཞུང་འབྲེལ་སྐུ་ཚབ་དང་འབྲེལ་མཐུད་པ་བསྟན་འཛིན་ནམ་མཁའ་ལགས་ཀྱིས་བསླབ་གསུམ་བཤད་སྒྲུབ་གླིང་དགོན་པས་ཀོ་རི་ཡའི་ནང་བོད་ཀྱི་ཆོས་དང་རིག་གཞུང་ཁྱབ་གདལ་དང་སྲུང་སྐྱོབ་ཐད་འབད་བརྩོན་བྱེད་བཞིན་ཡོད་སྐོར་དང་། ཀི་རི་ཡར་གནས་སྡོད་བོད་མི་དང་དེ་དག་གི་བྱེད་སྒོ་སོགས་ངོ་སྤྲོད་གནང་ཡོད།
དེ་བཞིན་ཉི་ཧོང་བོད་རིགས་ཚོགས་པའི་རྒྱུན་ལས་གཉིས་ཀྱིས་ཚོགས་པའི་འཕེལ་རིམ་དང་། ཉི་ཧོང་མི་མང་ལ་བོད་དོན་གོ་རྟོགས། བོད་ཀྱི་འཐབ་རྩོད་ལ་རྒྱབ་སྐྱོར་ཐོབ་སླད་སྤེལ་བའི་བྱེད་སྒོ་ཁག་ངོ་སྤྲོད་གནང་ཡོད།
དྲ་ཐོག་གི་ཚོགས་འདུའི་ཐོག་ཕེབས་པའི་དགེ་བཤེས་རྣམས་ཀྱིས་རང་ཉིད་མི་སྒེར་གྱི་ངོས་ནས་ནུས་ཤུགས་གང་ཡོད་བཏོན་ཏེ་བསྟི་གནས་ཁང་གསར་བཙུགས་ཀྱིས་བོད་ཀྱི་ཕུན་སུམ་ཚོགས་པའི་ཆོས་དང་རིག་གཞུང་གོ་རྟོགས་སྤེལ་བཞིན་ཡོད་སྐོར་གསུངས། དེ་བཞིན་ཚོགས་འདུར་མཉམ་ཞུགས་གནང་མཁན་རྣམས་ཀྱིས་ད་ལན་སྐུ་ཚབ་དོན་གཅོད་དང་ལྷན་བཀའ་མོལ་ཞུ་རྒྱུ་དང་། གྲོས་བསྡུར་བྱ་རྒྱུ་བྱུང་བར་དགའ་ཚོར་དང་ཡིད་ཚེམ་པོ་བྱུང་ཡོད་སྐོར་གསུངས།
ཐེངས་འདིའི་དྲ་ཐོག་གི་ཚོགས་འདུའི་ཐོག་མཐུན་སྒྲིལ་ལ་ཤུགས་གནོན་དང་། བོད་ཀྱི་ཆོས་དང་རིག་གཞུང་གོ་རྟོགས་སྤེལ་ཆེད་བོད་མིའི་ནུས་ཤུགས་ཐོན་ཁུངས་ཇི་ལྟར་བེད་སྤྱོད་བྱ་རྒྱུ་དང་། བོད་ཀྱི་འཐབ་རྩོད་ཐད་ཆབ་སྲིད་ཀྱི་རྒྱབ་སྐྱོར་ཐོབ་ཐབས་བཅས་ཀྱིི་སྐོར་གྲོས་བསྡུར་གནང་ཡོད་པ་བཅས། །
