༄༅། །ཕྱི་ལོ་ ༢༠༢༡ ཟླ་ ༥ ཚེས་ ༢༡ རེས་གཟའ་པ་སངས་ཉིན་གྱི་སྔ་དྲོར་བཀའ་ཤག་གི་མཇལ་འཕྲད་ཁང་དུ་བོད་པའི་གཞུང་འབྲེལ་མིན་པའི་ཚོགས་པ་ཆེ་ཁག་བཞི་སྟེ་བོད་ཀྱི་གཞོན་ནུ་ལྷན་ཚོགས་དང་། བོད་ཀྱི་བུད་མེད་ལྷན་ཚོགས། བོད་རང་བཙན་སློབ་ཕྲུག་ཚོགས་པ། བོད་ཀྱི་རྒྱལ་ཡོངས་མང་གཙོ་ཚོགས་པ་བཅས་ནས་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་གིས་གཙོས་སྐབས་ ༡༥ པའི་བཀའ་ཤག་གི་བཀའ་བློན་རྣམ་པར་བཀའ་དྲིན་རྗེས་དྲན་དང་ཐུགས་རྗེ་ལེགས་འབུལ་གྱི་ཆེ་བསྟོད་གཟེངས་རྟགས་ཤིག་ཕུལ་ཡོད།
དེ་ཡང་བོད་ཀྱི་གཞོན་ནུ་ལྷན་ཚོགས་ཀྱི་ཚོགས་གཙོ་མགོན་པོ་དོན་གྲུབ་ལགས་ཀྱིས་དཔལ་ལྡན་སྲིད་སྐྱོང་མཆོག་གིས་གཙོས་སྐབས་ ༡༥ པའི་བཀའ་ཤག་གི་བཀའ་བློན་རྣམ་པར་གཟེངས་བསྟོད་འབུལ་དགོས་དོན་སྐོར་ངོ་སྤྲོད་གནང་དོན། ད་རེས་བོད་པའི་གཞུང་འབྲེལ་མིན་པའི་ཚོགས་པ་ཁག་བཞི་ཐུན་མོང་ནས་དཔལ་ལྡན་སྲིད་སྐྱོང་མཆོག་དང་བཀའ་བློན་རྣམ་པར་ཐུགས་རྗེ་ལེགས་འབུལ་གྱི་ཆེ་བསྟོད་གཟེངས་རྟགས་ཤིག་ཕུལ་ཡོད།
བོད་པའི་གཞུང་འབྲེལ་མིན་པའི་ཚོགས་པ་ཁག་བཞི་ནས་གཟེངས་བསྟོད་འབུལ་དགོས་པའི་རྒྱུ་མཚན་གཙོ་བོ་ནི། དཔལ་ལྡན་སྲིད་སྐྱོང་བློ་བཟང་སེངྒེ་མཆོག་གིས་འདས་པའི་ལོ་ངོ་བཅུའི་རིང་བོད་བསྟན་སྲིད་དང་མི་རིགས་ཀྱི་དོན་དུ་སྐུ་ལས་བསྐྱོན་ཏེ་ཕྱག་ལས་གནང་བ་དང་། དེ་བཞིན་བཀའ་བློན་རྣམ་པས་འདས་པའི་ལོ་ངོ་ལྔའི་རིང་བཀའ་བློན་གྱི་མཛད་ཁུར་བཞེས་ཏེ་ཕྱག་ལས་ཧུར་ཐག་གནང་བར་ཐུགས་རྗེ་ལེགས་འབུལ་གྱི་གཟེངས་བསྟོད་ཕུལ་བ་ཞིག་ཆགས་ཀྱི་ཡོད། ཅེས་གསུངས།།