༄༅། །ཕྱི་ལོ་ ༢༠༢༡ ཟླ་ ༥ ཚེས་ ༢༦ རེས་གཟའ་ལྷག་པ་ཉིན་ཨོ་སི་ཌོ་ལི་ཡའི་གྲོས་ཚོགས་འཐུས་མི་བོད་དོན་རྒྱབ་སྐྱོར་ཚོགས་པས་ཨོ་གླིང་སྐུ་ཚབ་དོན་གཅོད་ཀརྨ་སེངྒེ་ལགས་དང་ལྷན་གྲོས་ཚོགས་ཀྱི་ཚོགས་ཁང་དུ་ཚོགས་འདུ་ཞིག་ཚོགས་གནང་སྟེ་བོད་མིའི་འཐབ་རྩོད་ལ་མུ་མཐུད་རྒྱབ་སྐྱོར་གནང་རྒྱུའི་ཁས་ལེན་གནང་ཡོད།
དེ་ཡང་ཚོགས་འདུ་དེ་བཞིན་ཨོ་སི་ཊི་ལི་ཡའི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པའི་ཟུང་སྦྲེལ་ཚོགས་གཙོ་སྐུ་ཞབས་ཝ་རན་ཨིན་ཆི་ (Warren Entsch) མཆོག་དང་། གྲོས་ཚོགས་འཐུས་མི་ལྕམ་སུ་སན་ཊེམ་པོལ་མན་མཆོ (Susan Templeman) མཆོག་གཉིས་ཀྱིས་ཟུང་སྦྲེལ་ཐོག་གོ་སྒྲིག་གནང་བ་ཞིག་ཡིན་པ་དང་། ཚོགས་འདུའི་ཐོག་སྲིད་དོན་ཚོགས་པ་འདྲ་མིན་གྱི་གྲོས་ཚོགས་འཐུས་མི་གྲངས་ ༡༡ མཉམ་ཞུགས་གནང་ཡོད།
ཚོགས་འདུའི་ཐོག་སྐུ་ཞབས་ཝ་རན་ཨིན་ཆི་མཆོག་གིས་གྲོས་ཚོགས་བོད་རྒྱབ་སྐྱོར་ཚོགས་པར་ཀརྨ་སེངྒེ་ལགས་ངོ་སྤྲོད་གནང་སྟེ་ཁོང་ཨོ་སི་ཀྲོ་ལི་ཡའི་སྐུ་ཚབ་དོན་གཅོད་གསར་པ་ཡིན་པར་དགའ་བསུ་ཞུ་རྒྱུ་དང་། བོད་མིའི་རང་དབང་འཐབ་རྩོད་ལ་རྒྱབ་སྐྱོར་བྱེད་རྒྱུར་ཤུགས་གནོན་རྒྱག་དགོས་པའི་འབོད་སྐུལ་ཞུས་ཡོད།
དེ་རྗེས་ཨོ་གླིང་སྐུ་ཚབ་དོན་གཅོན་ཀརྨ་སེངྒེ་ལགས་ཀྱིིས་གྲོས་ཚོགས་འཐུས་མི་རྣམས་ནས་རྒྱབ་སྐྱོར་གནང་བར་ཐུགས་རྗེ་ཆེ་ཞུས་ཡོད་མ་ཟད། ཁོང་ཚོས་བོད་མིའི་རང་དབང་འཐབ་རྩོད་དང་མང་གཙོ་རྩོད་ལན་ལ་ཨི་སི་ཌོ་ལི་ཡ་རྒྱབ་ཏུ་ལངས་ཡོད་ཅེས་འཛམ་གླིང་ལ་བརྡ་ལན་ཤུགས་ཆེ་གནང་བར་དགའ་བསུ་ཞུས་ཡོད།
སྐུ་ཚབ་དོན་གཅོད་ཀརྨ་སེངྒེ་ལགས་ཀྱིས་ཚོགས་འདུར་ཕེབས་པའི་གྲོས་ཚོགས་འཐུས་མི་རྣམས་ལ་བཙན་བྱོལ་བོད་མིའི་མང་གཙོའི་འོས་བསྡུ་དང་འབྲེལ་བའི་གནས་ཚུལ་ངོ་སྤྲོད་དང་། བཙན་བྱོལ་བོད་མིའི་མང་གཙོ་ནི་བོད་ཀྱི་འཐབ་རྩོད་ལམ་ལྷོངས་ཡོང་ཆེད་གལ་འགངས་ཆེ་ཚུལ་འགྲེལ་བརྗོད་གནང་ཡོད་པ་མ་ཟད་མང་གཙོའི་ལམ་ནས་བདམས་ཐོན་བྱུང་བའི་བོད་མིའི་སྒྲིག་འཛུགས་ཀྱི་སྲིད་སྐྱོང་ཟུར་པ་བློ་བཟང་སེངྒེ་མཆོག་ཉེ་ལམ་ཨ་རིའི་ཕོ་བྲང་དཀར་པོའི་ནང་ལོ་རྒྱུས་རང་བཞིན་ལྡན་པའི་འཚམས་གཟིགས་གནང་བ་དེས། ཨ་རིའི་གཞུང་གིས་བོད་མིའི་སྒྲིག་འཛུགས་ཀྱི་མང་གཙོའི་ལམ་ལུགས་དང་། དེའི་ཆབ་སྲིད་ཀྱོ་འགོ་ཁྲིད་བཅས་ངོས་འཛིན་གནང་བ་ཞིག་ཡིན་སྐོར་འགྲེལ་བརྗོད་གནང་ཡོད།
དེ་བཞིན་ཁོང་གིས་ཨ་རིའི་གྲོས་ཚོགས་གོང་འོག་ནང་ཚད་མཐོའི་རྒྱབ་སྐྱོར་ཐོག་གཏན་འབེབས་གནང་བའི་ཕྱི་ལོ ༢༠༢༠ ལོའི་བོད་དོན་སྲིད་བྱུས་དང་རྒྱབ་སྐྱོར་གྱི་ཁྲིམས་འཆར་དང་། བོད་ནང་ཕར་འགྲོ་ཚུར་འོང་གི་གོ་སྐབས་འདྲ་མཉམ་གྱི་ཁྲིམས་འཆར་ཐོག་འགྲེལ་བརྗོད་གནང་སྟེ། མ་འོངས་པར་གྲོས་ཚོགས་འཐུས་མི་རྣམས་ཀྱིས་དེ་ལྟ་བུའི་ཁྲིམས་འཆར་ལ་རྒྱབ་སྐྱོར་གནང་སྟེ་ཁྲིམས་འཆར་གཏན་འབེབས་ཡོང་བའི་རེ་སྐུལ་ཞུས་ཡོད།
སྐུ་ཚབ་དོན་གཅོད་ཀརྨ་སེངྒེ་ལགས་ཀྱིས་རྒྱ་བལ་འབྲུག་གསུམ་ཕུད་པའི་ཨེ་ཤི་ཡ་དང་ཨོ་སི་ཀྲེ་ལེ་ཡེ་ཤི་ཡའི་ཁུལ་གྱི་བདམས་ཐོན་སྤྱི་འཐུས་དང་ཨོ་སི་ཌོ་ལི་ཡར་རྟེན་གཞི་བྱས་པའི་བོད་དོན་ལྷན་ཚོགས་ (Australia Tibet Council) ཀྱི་རྒྱུན་ལས་རྡོ་རིང་བསྟན་འཛིན་ཕུན་ཚོགས་ལགས་གྲོས་ཚོགས་འཐུས་མི་བོད་དོན་རྒྱབ་སྐྱོར་ཚོགས་པའི་ཚོགས་མི་རྣམས་ལ་ངོ་སྤྲོད་གནང་ཡོད། སྐུ་ཚབ་དོན་གཅོད་ཀརྨ་སེངྒེ་ལགས་དང་བདམས་ཐོན་སྤྱི་འཐུས་རྡོ་རིང་བསྟན་འཛིན་ཕུན་ཚོགས་ལགས་རྣམ་གཉིས་ཀྱིས་ཐེངས་འདིའི་ཚོགས་འདུ་བསྐོང་ཚོགས་གནང་བར་ཐུགས་རྗེ་ཆེ་ཞུས་ཡོད་པ་དང། དེ་རྗེས་གྲོས་ཚོགས་འཐུས་མི་ལྕམ་སྐུ་ (Ms Zoe) མཆོག་གིས་ཨོ་སི་ཌོ་ལི་ཡར་རྟེན་གཞི་བྱས་པའི་བོད་དོན་ལྷན་ཚོགས་ཀྱི་ཡོང་རྒྱུའི་ལས་འགུལ་ཁག་ཅིག་སྙན་གསང་ཞུས་ཡོད།
ཨོ་སི་ཊི་ལི་ཡའི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པའི་ཟུང་སྦྲེལ་ཚོགས་གཙོ་སྐུ་ཞབས་ཝ་རན་ཨིན་ཆི་མཆོག་གིས་རང་ཉིད་ཀྱི་ངོ་དེབ་བརྒྱུད་བོད་མིའི་སྒྲིག་འཛུགས་ཀྱི་བདམས་ཐོན་སྲིད་སྐྱོང་སྤེན་པ་ཚེ་རིང་མཆོག་ལ་འཚམས་འདྲི་ཞིག་གནང་བའི་ནང་འཁོད་དོན། རང་ཉིད་ཨོ་སི་ཊི་ལི་ཡའི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པའི་ཟུང་སྦྲེལ་ཚོགས་གཙོས་གོ་སྐབས་འདི་བཟུང་ནས་བོད་མིའི་སྒྲིག་འཛུགས་ཀྱི་བདམས་ཐོན་སྲིད་སྐྱོང་སྤེན་པ་ཚེ་རིང་མཆོག་ལ་འཚམས་འདྲི་ཞུ་རྒྱུ་དང་། བོད་རྒྱ་གཉིས་ཀྱི་དཀའ་རྙོག་ཞི་བདེའི་ངང་ཐག་གཅོད་ཐུབ་པའི་སྨོན་འདུན་ཞུ་རྒྱུ་ཡོན། ཞེས་གསུངས།
དེ་བཞིན་ཨི་སི་ཌོ་ལི་ཡའི་གྲོས་ཚོགས་འཐུས་མི་དང་ལྗང་ཁུ་ཚོགས་པའི་མགྲིན་ཚབ་པ་ལྕམ་ཇན་ནི་ཊི་ར་ཡིས་ (Janet Rice) མཆོག་གིས་ཊུཝི་ཊར་ (Twitter) ཐོག་བོད་མིའི་སྒྲིག་འཛུགས་ཀྱི་བདམས་ཐོན་སྲིད་སྐྱོང་སྤེན་པ་ཚེ་རིང་མཆོག་ལ་འཚམས་འདྲི་ཞུས་ཡོད་པ་དང་། ཁོང་གིས། སྐུ་ཉིད་སྲིད་སྐྱོང་དུ་བདམས་ཐོན་བྱུང་བ་དེས་འཛམ་གླིང་ས་ཕྱོགས་གང་སར་བཞུགས་པའི་བོད་མི་རྣམས་ཀྱིས་རང་དབང་དང་མང་གཙོ་ལ་ཆོད་སེམས་བརྟན་པོ་ཡོད་པ་མཚོན་ཐུབ། ཞེས་གསུངས།།
