༄༅། །ཨུ་རུ་སུའི་གྲོས་ཚོགས་འཐུས་མི་དང་ཐུ་ཝ་ཡུལ། ཨུ་རུ་སུའི་གྲོང་ཁྱེར་སེན་པི་ཊར་སི་བྷག (St Petersburg)  ཀ་ཛ་ཀི་སི་ཐན་ (Kazakhstan) བཅས་ཀྱི་བོད་དོན་རྒྱབ་སྐྱོར་ཚོགས་པས་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་ལ་འཚམས་འདྲི་ཞུས་གནང་འདུག

དེ་ཡང་ཨུ་རུ་སུའི་གྲོས་ཚོགས་ཀྱི་ཚོགས་གཞོན་མཆོག་གིས། སྐུ་ཉིད་མཆོག་བོད་མིའི་སྒྲིག་འཛུགས་ཀྱི་སྲིད་སྐྱོང་ལ་བདམས་ཐོན་བྱུང་བར་ངས་སྙིང་ཐག་པ་ནས་འཚམས་འདྲི་ཞུ་རྒྱུ་ཡིན། ཞེས་གསུངས།

རུ་སུ་བོད་ཀྱི་གྲོགས་པོ་ཚོགས་པའི་ཚོགས་གཙོ་ (Balgan Aylana) ལགས་ཀྱིས། མང་གཙོའི་ལམ་ནས་བདམས་ཐོན་བྱུང་བའི་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་ལ་འཚམས་འདྲི་དང་འབྲེལ། བོད་མིའི་སྒྲིག་འཛུགས་ཀྱི་དབུ་ཁྲིད་གསར་པ་དང་ལྷན་དུ་རྒྱལ་སྤྱིའི་ནང་བོད་དོན་ཞུ་གཏུག་གི་ལས་དོན་ཐོག་ཕྱག་ལས་གནང་རྒྱུ་ཡིན་སྐོར་གསུངས། ཕྱོགས་མཚུངས་ཨུ་རུ་སུའི་གྲོང་ཁྱེར་སེན་པི་ཊར་སི་བྷག་ཏུ་རྟེན་གཞི་བྱས་པའི་བོད་ཀྱི་གྲོགས་པོ་ཚོགས་པའི་ཚོགས་གཙོས་འཚམས་འདྲི་ཞུས་པ་མ་ཟད། ལས་དོན་ལམ་ལྷོངས་ཡོང་བར་སྨོན་འདུན་ཞུས་གནང་ཡོད།

ཀ་ཛ་ཀི་སི་ཐན་བོད་ཀྱི་གྲོགས་པོ་ཚོགས་པའི་འགན་འཛིན་ (Murat Aubakirov) ལགས་ཀྱིས་ཀ་ཛ་ཀི་སི་ཐན་བོད་ཀྱི་གྲོགས་པོ་ཚོགས་པའི་ཚོགས་མི་ཡོངས་ཀྱི་ཚབ་ཞུས་ཏེ་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་ལ་འཚམས་འདྲི་ཞུས་ཡོད་པ་མ་ཟད། བོད་དོན་ལ་རྒྱབ་སྐྱོར་དང་གདུང་སེམས་མཉམ་སྐྱེ་ཞུ་བཞིན་ཡོད། མུ་མཐུད་བོད་མིའི་སྒྲིག་འཛུགས་དང་བོད་མིར་རྒྱབ་སྐྱོར་གནང་རྒྱུ་ཡིན་སྐོར་གསུངས། །