༄༅། ། ཨིན་ཡུལ་གྲོང་སྡེ་མིལ་ཌོན་ཀི་ནེས་ (Milton Keynes) ཞེས་པའི་ནང་ལོ་ལྟར་བོད་ཀྱི་རྒྱལ་དར་སྒྲེང་འཛུགས་གནང་རྒྱུའི་ལམ་སྲོལ་བཟང་པོ་ཞིག་ཡོད་པ་བཞིན་འདི་ལོ་སྟེ། ཕྱི་ལོ་ ༢༠༢༡ ཟླ་ ༥ ཚེས་ ༡༦ རེས་གཟའ་ཉི་མའི་ཉིན་ཨིན་ཡུལ་སྐུ་ཚབ་དོན་གཅོད་ཕར་སི་བསོད་ནམས་ཚེ་རིང་ལགས་ཀྱིས་གྲོང་སྡེའི་སྤྱི་ཁྱབ་པ་སྐུ་ཞབས་ (Cllr Andrew Geary) མཆོག་དང་ཁོང་གི་བཟའ་ཟླ་ལྕམ་སྐུ་ (Mayoress Lisa) མཆོག་དང་ལྷན་གྲོང་སྡེ་དེར་རྟེན་གཞི་བྱས་པའི་ནིཔ་པོན་སན་མཡོ་ཧི་ཇི་ (Nipponzan Myohoji) ཞེས་པའི་ནང་པའི་དགོན་པའི་མདུན་དུ་བོད་ཀྱི་རྒྱལ་དར་སྒྲེང་འཛུགས་ཀྱི་ལས་འགུལ་སྤེལ་གནང་འདུག

དེ་ཡང་བོད་ཀྱི་རྒྱལ་དེར་སྒྲེང་འཛུགས་ཀྱི་ལས་འགུལ་འདི་ཉིད་ཡུན་རིང་བོད་དོན་རྒྱབ་སྐྱོར་བ་ཀེ་ཐི་ར་ཡིན་  (Catherine Mostyn Scott) ལགས་ཀྱིས་གོ་སྒྲིག་གནང་བ་ཞིག་ཡིན་པ་དང་། ཁོང་གིས་ཕྱི་ལོ་ ༢༠༡༤ ལོ་ནས་བཟུང་གྲོང་སྡེའི་སྤྱི་ཁྱབ་གཙོས་པའི་མིི་མང་ཡོངས་ལ་བོད་ཀྱི་རྒྱལ་དར་སྒྲེང་འཛུགས་ཀྱི་གལ་ཆེའི་རང་བཞིན་དང་། བོད་ནང་བོད་མི་ཚོས་མྱོང་བཞིན་པའི་དཀའ་སྡུག དེ་བཞིན་བོད་ནང་དང་བཙན་བྱོལ་དུ་ཡོད་པའི་བོད་མི་ཚོའི་གནས་སྟངས་སོགས་གོ་རྟོགས་ཡོང་སླད་ལོ་ལྟར་བོད་ཀྱི་རྒྱལ་དར་སྒྲེང་འཛུགས་ཀྱི་ལས་འགུལ་འདི་སྤེལ་ཡོད། བོད་ཀྱི་རྒྱལ་དར་སྒྲེང་འཛུགས་ཀྱི་ལས་འགུལ་འདི་ཉིད་ད་རེས་ཐེངས་བརྒྱད་པ་ཆགས་ཀྱི་ཡོད།ནམ་རྒྱུན་བོད་ཀྱི་རྒྱལ་དར་སྒྲེང་འཛུགས་ཀྱི་ལས་འགུལ་ཉིན་མི་གྲངས་ ༧༠ ནས་ ༡༠༠ བར་མཉམ་ཞུགས་གནང་གི་ཡོད་ཀྱང་། ད་ལན་འཛམ་གླིང་ཡོངས་ལ་ཏོག་དབྱིབས་གཉན་རིམས་ཀྱིས་རྐྱེན་པས་ལས་འགུལ་གོ་སྒྲིག་གནང་མཁན་ནས་མི་དྲུག་ལས་ལྷག་འདུ་འཛོམས་མི་ཆོག་པའི་གཞུང་གི་ཏོག་དབྱིབས་གཉན་རིམས་ཁྱབ་གདལ་མི་འགྲོ་བའི་ཁྲིམས་སྒྲིག་གཏན་འབེབས་ལག་བསྟར་འོག་ལས་འགུལ་འདི་བཞིན་གོ་སྒྲིག་ཞུས་ཡོད།

སྐབས་དེར་ཨིན་ཡུལ་སྐུ་ཚབ་དོན་ཕར་སི་བསོད་ནམས་ཚེ་རིང་ལགས་ཀྱིས་གྲོང་སྡེའི་སྤྱི་ཁྱབ་པ་མཆོག་དང་ཁོང་གི་བཟའ་ཟླ། བོད་དོན་རྒྱབ་སྐྱོར་བ་ཀེ་ཐི་ར་ལགས་དང་ཁོང་གི་ནང་མི།  དེ་བཞིན་ (sister Maruta) ལགས་བཅས་ལས་འགུལ་ནང་མཉམ་ཞུགས་གནང་སྟེ་བོད་མིར་གདུང་སེམས་མཉམ་སྐྱེ་གནང་བར་ཐུགས་རྗེ་ཆེ་དང་མུ་མཐུད་རྒྱབ་སྐྱོར་ཡོང་བའི་རེ་སྐུལ་ཞུས་ཡོད།དེ་བཞིན་ཁོང་གིས་ཕྱི་ལོ་ ༢༠༢༡ ཟླ་ ༥ ཚེས་ ༡༧ ཉིན་ནི་ཀུན་གཟིགས་པཎ་ཆེན་རིན་པོ་ཆེ་མཆོག་རྒྱ་ནག་གཞུང་གིས་བཙན་ཁྲིད་ཀྱིས་གར་སོང་ཆ་མེད་དུ་གྱུར་ནས་མི་ལོ་ཧྲིལ་པོ་ ༢༦ འཁོར་གྱི་ཡོད་པས་རྒྱ་ནག་གཞུང་ལ་པཎ་ཆེན་ཆུང་སྲིད་རིན་པོ་ཆེ་མཆོག་དང་། ཁོང་གི་ནང་མི་རྣམས་འཕྲལ་མར་གློད་བཀྲོལ་གཏོང་དགོས་པའི་སྐད་འབོད་གནང་རོགས་ཞེས་འབོད་སྐུལ་ཞུས་ཡོད།

དེ་རྗེས་གྲོང་སྡེ་སྤྱི་ཁྱབ་པ་མཆོག་གིས་གསུང་བཤད་གནང་བའི་ནང་། ང་ཚོས་ལས་འགུལ་འདི་སྲུང་བརྩི་ཞུས་ཏེ་འཛམ་གླིང་གི་ས་ཕྱོགས་གཞན་ནང་འཛིན་བཟུང་དང་། སྡུག་སྦྱོང་མྱོང་བཞིན་པ་ཚོར་དྲན་གསོ་དང་གདུང་སེམས་མཉམ་སྐྱེ་ཞུ་རྒྱུ་ཡིན། ང་རང་ད་ལན་བོད་ཀྱི་རྒྱལ་དར་སྒྲེང་འཛུགས་ཀྱི་ལས་འགུལ་ནང་མཉམ་ཞུགས་བྱས་ཏེ་དཀའ་སྡུག་མྱོང་བཞིན་པའི་བོད་ནང་གི་བོད་མོ་ཚོ་ལ་གདུང་སེམས་མཉམ་སྐྱེ་ཞུ་རྒྱུ་བྱུང་བ་ནི་དགའ་ཚོར་ཆེན་པོ་བྱུང་ཞེས་གསུངས།

བོད་ཀྱི་རྒྱལ་དར་སྒྲེང་འཛུགས་ཀྱི་ལས་འགུལ་ཐོག་སྐུ་ཚབ་དོན་གཅོད་ཕར་སི་བསོད་ནམས་ཚེ་རིང་ལགས་དང་། གྲོང་སྡེའི་སྤྱི་ཁྱབ་པ་མཆོག་དང་ཁོང་གི་བཟའ་ཟླ། བོད་དོན་རྒྱབ་སྐྱོར་བ་ཀེ་ཐི་ར་ལགས་དང་ཁོང་གི་ནང་མི།  (sister Maruta) དེ་བཞིན་དགོན་པའི་བཙུན་མ་དང་ས་གནས་བོད་མི་ཁག་གཅིག་བཅས་མཉམ་ཞུགས་གནང་ཡོད་པ་བཅས། །