༄༅། །ཕྱི་ལོ་ ༢༠༢༡ ཟླ་ ༥ ཚེས་ ༢༥ ཉིན་ཨ་རིའི་གྲོས་ཚོགས་འོག་མའི་ཚོགས་གཙོ་ལྕམ་སྐུ་ནེན་སི་པི་ལོ་སི་མཆོག་གིས་བོད་མིའི་སྒྲིག་འཛུགས་ཀྱི་བདམས་ཐོན་སྲིད་སྐྱོང་སྤེན་པ་ཚེ་རིང་ལ་འཚམས་འདྲིའི་གསུང་འཕྲིན་ཞིག་གནང་བའི་ནང་འཁོད་དོན། སྐུ་ཉིད་བོད་མིའི་སྒྲིག་འཛུགས་ཀྱི་སྲིད་སྐྱོང་ལ་བདམས་ཐོན་བྱུང་བར་འཚམས་འདྲི་ཞུ་རྒྱུ་ཡིན།
སྐུ་ཉིད་ཀྱིས་སྤྱི་ཚོགས་ལ་ཡུན་རིང་ཁྱད་དུ་འཕགས་པའི་ཞབས་འདེགས་བསྒྲུབས་པའི་ཉམས་མྱོང་གཞིར་བཞག་ཐོག་བོད་མི་རྣམས་ལ་སྲི་ཞུ་བསྒྲུབ་རྒྱུ་ཡིན་ཞིང་། སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་བཙན་དབང་འོག་བཙན་བྱོལ་དུ་ཆིབས་སྒྱུར་བསྐྱངས་རྗེས་འདས་པའི་ལོ་ངོ་ ༦༠ ལྷག་རིང་བོད་རྒྱ་ཆེ་མི་མང་གི་ཞུམ་པ་མེད་པའི་སྙིང་སྟོབས་ཀྱིས་མུ་མཐུད་འཛམ་གླིང་ཡོངས་ལ་སེམས་ཤུགས་སྐྱེད་བཅུག་ཡོད།
བོད་མིའི་སྒྲིག་འཛུགས་ཀྱིས་སྙིང་སྟོབས་ཆེ་བསྐྱེད་ཀྱིས་པེ་ཅིང་གི་དྲག་གནོན་ལ་ཁ་གཏད་དུ་ལངས་ཏེ་བོད་མིའི་མཛེས་སྡུག་ལྡན་པའི་རིག་གཞུང་དང་སྐད་ཡིག་གི་འཚོ་གནས་དང། དེ་བཞིན་ཆོས་ལུགས་མཐུན་སྒྲིལ་སྲ་བརྟན་བཟོས་གནང་ཐུབ་ཡོད། གནད་འགག་ཆེ་བའི་སྲོལ་རྒྱུན་འདི་རྒྱུན་སྐྱོང་དང་། ཞི་བདེ་བསྐྲུན་པར། སྐུ་ཉིད་སྲིད་སྐྱོང་ཡིན་པའི་ཆ་ནས་ད་ལྟ་སྔར་ལས་ལྷག་སྐུ་ཉིད་ཀྱིས་ཆོད་སེམས་བརྟན་པོའི་འབོད་སྒྲ་དང་སྐུ་ངལ་འཛེམས་མེད་ཀྱིས་སྣེ་ཁྲིད་དགོས་པ་གལ་ཆེན་པོ་ཆགས་ཡོད།
ཨ་རིས་དུས་དེ་རིང་དང་དུས་རྟག་ཏུ་སྐུ་ཉིད་དང་བོད་མི་མང་གི་རྒྱབ་ཏུ་ལང་རྒྱུར་སྤོབས་པ་ཡོད། སླར་ཡང་སྲིད་སྐྱོང་སྤེན་པ་ཚེ་རིང་མཆོག་སྲིད་སྐྱོང་ལ་བདམས་ཐོན་བྱུང་བར་འཚམས་འདྲི་དང་། སྐུ་ཉིད་ཀྱིས་ཐུགས་འགན་གསར་པ་བཞེས་ཡོད་པའི་ཆ་ནས་མ་འོངས་པའི་བྱ་གཞག་ཐམས་ཅད་ལམ་ལྷོངས་ཡོང་བའི་སྨོན་འདུན་ཞུ་རྒྱུ་ཡིན། ཞེས་གསུང་འཕྲིན་གནང་འཁོད་ཡོད་པ་བཅས།།
