༄༅། །ཨ་རིའི་ཕྱི་སྲིད་ལྷན་ཁང་གི་མང་གཙོ་དང་། ངལ་རྩོལ། འགྲོ་བ་མིའི་ཐོབ་ཐང་གོང་འཕེལ་ཚན་པའི་གོ་སྒྲིག་འོག་ཨ་རིའི་ཕྱི་སྲིད་ལྷན་ཁང་གིས་ཕྱི་ལོ་ ༢༠༢༠ ལོའི་རྒྱ་ནག་ནང་གི་འགྲོ་བ་མིའི་ཐོབ་ཐང་གི་གནས་སྟངས་སྐོར་ཡིག་འབྲུ་ཁྲི་ལྔ་ཅན་གྱི་ལོ་འཁོར་སྙན་ཐོ་ཞིག་བཏོན་གནང་ཡོད།

ཕྱི་ལོ་ ༢༠༢༠ ལོའི་ཨ་རིའི་ཕྱི་སྲིད་ལྷན་ཁང་གི་སྙན་ཐོ་ནང་བོད་ནི་རྒྱ་ནག་དང་ཁ་བྲལ་ཐབས་མེད་པའི་ཆ་ཤས་ཤིག་ཡིན་ཞེས་འགྲེལ་བརྗོད་གནང་མེད་པ་དེར། ཨ་རིིའི་གྲོས་ཚོགས་གོང་མའི་སྤྱི་མཐུན་ཚོགས་པའི་ཚོགས་མི་སྐུ་ཞབས་མར་ཁོ་རུ་བྷིའོ་ (Marco Rubio) མཆོག་དང་། ཨ་རིའི་གྲོས་ཚོགས་གོང་མའི་འཐུས་མི་སྐུ་ཞབས་པེ་ཊིག་ལི་ཧེ་ (Patrick Leahy) མཆོག་གིས་ཟུང་འབྲེལ་ཐོག་ཨ་རིའི་ཕྱི་སྲིད་ལྷན་ཁང་གི་དྲུང་ཆེ་སྐུ་ཞབས་ཨན་ཊོ་ནེ་བྷི་ལིན་ཀིན་ (Antony Blinken) མཆོག་ལ་དགའ་བསུའི་ཡི་གེ་ཕུལ་ཏེ་ང་ཚོའི་ངོས་ནས་ཨ་རིའི་གཞུང་གིས་བོད་དོན་གྲོས་མོལ་དང་། རྒྱལ་སྤྱིའི་ཆོས་དད་རང་དབང་། དེ་བཞིན་བོད་དོན་སྐོར་སྙན་ཐོ་འདོན་སྐབས་བོད་ནི་རྒྱ་ནག་དང་ཁ་བྲལ་ཐབས་མེད་པའི་ཆ་ཤས་ཤིག་ཡིན་ཞེས་འགྲེལ་བརྗོད་གནང་རྒྱུ་མེད་པའི་རེ་བ་བྱེད་ཀྱི་ཡོད། ཅེས་སོགས་འཁོད་ཡོད།

ཨ་རི་སྐུ་ཚབ་དོན་གཅོད་ཁང་གིས། ཨ་རིིའི་གྲོས་ཚོགས་གོང་མའི་སྤྱི་མཐུན་ཚོགས་པའི་ཚོགས་མི་སྐུ་ཞབས་མར་ཁོ་རུ་བྷིའོ་མཆོག་དང་ཨ་རིའི་གྲོས་ཚོགས་གོང་མའི་འཐུས་མི་སྐུ་ཞབས་པེ་ཊིག་ལི་ཧེ་མཆོག་རྣམ་གཉིས་ལ་ཐུགས་རྗེ་ཆེ་ཞུས་པ་དང་སྦྲགས་ཨ་རིའི་གྲོས་ཚོགས་འཐུས་མི་གཞན་ཚོས་ཀྱང་དེ་ལྟར་གནང་རྒྱུའི་འབོད་སྐུལ་ཞུ་རྒྱུ་ཡིན། 

བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་གིས་ཕྱི་ལོ་ ༢༠༢༠ ཟླ་ ༡༠ ནང་ཨ་རི་གཞུང་གིས་བསྐོ་གཞག་གནང་བའི་ཨ་རིའི་བོད་དོན་དམིགས་བསལ་འབྲེལ་མཐུད་པ་སྐུ་ཞབས་རོ་བྷར་ཊི་ཌེ་སི་ཊི་རོ་ (Robert A. Destro)  མཆོག་དང་ཐུག་འཕྲད་སྐབས་གནད་དོན་དེའི་སྐོར་གྲོས་བསྡུར་གནང་ཡོད། ཨ་རིའི་སྐུ་ཚབ་དོན་གཅོད་ཁང་དང་། བོད་དོན་རྒྱབ་སྐྱོར་ཚོགས་པ། མི་སྒེར་པ་སོགས་ཀྱིས་རྒྱུན་དུ་བོད་དོན་སླད་ལས་འགུལ་སྤེལ་བར་བརྟེན་འདི་ལྟ་བུའི་བཟང་ཕྱོགས་ཀྱི་འགྱུར་བ་ཕྱིན་ཡོད། ཅེས་དང་།

ཨ་རིའི་ཕྱི་སྲིད་ལྷན་ཁང་གི་དྲུང་ཆེ་སྐུ་ཞབས་ཨན་ཊོ་ནེ་བྷི་ལིན་ཀིན་མཆོག་གི་ལས་ཁུངས་ནས་རྒྱ་ནག་གཞུང་ལ་ངོ་དགའ་སྤྲེལ་ལད་མ་གནང་བར་དགའ་བསུ་དང་ཐུགས་རྗེ་ཆེ་ཞུ་རྒྱུ་ཡིན། ཞེས་གསུངས།།