༄༅། །ཨ་རི་དང་ཐེ་ཝན་གཞུང་གིས་བོད་མིའི་སྒྲིག་འཛུགས་ཀྱི་བདམས་ཐོན་སྲིད་སྐྱོང་སྤེན་པ་ཚེ་རིང་མཆོག་ལ་དགའ་བསུའི་འཚམས་འདྲི་གནང་འདུག  

དེ་ཡང་ཨ་རིའི་ཕྱི་སྲིད་ལྷན་ཁང་གི་མགྲིན་ཚབ་པ་སྐུ་ཞབས་ནེ་ཌི་པི་ར་ཡི་སི་ (Ned Price) ལགས་ཀྱིས་ཊི་ཝི་ཊར་བརྒྱུད་བོད་མིའི་སྒྲིག་འཛུགས་ཀྱི་བདམས་ཐོན་སྲིད་སྐྱོང་སྤེན་པ་ཚེ་རིང་ལགས་ལ་འཚམས་འདྲི་གནང་བའི་ནང་འཁོད་དོན། སྤེན་པ་ཚེ་རིང་མཆོག་བོད་མིའི་སྒྲིག་འཛུགས་ཀྱི་སྲིད་སྐྱོང་རྗེས་མར་བདམས་ཐོན་བྱུང་བར་ཨ་རིའི་ངོས་ནས་འཚམས་འདྲི་ཞུ་གི་ཡོད། ང་ཚོས་བོད་མིའི་སྒྲིག་འཛུགས་དང་བདམས་ཐོན་སྲིད་སྐྱོང་མཆོག་གི་ལྷན་དུ་རྒྱལ་སྤྱིའི་བཙན་བྱོལ་བོད་མི་རྣམས་ལ་རྒྱབ་སྐྱོར་གྱི་ཕྱག་ལས་གནང་རྒྱུའི་རེ་ལྟོས་བྱེད་ཀྱི་ཡོད། ཅེས་གསུངས། 

ཕྱོགས་མཚུངས་ཐེ་ཝན་གྱི་ཕྱི་སྲིད་བློན་ཆེན་སྐུ་ཞབས་ཇོ་སེ་ཕི་ཝུ་ (Mr Joseph Wu) མཆོག་གིས་ཟླ་འདིའི་ཚེས་ ༡༧ ཉིན་བདམས་ཐོན་སྲིད་སྐྱོང་སྤེན་པ་ཚེ་རིང་མཆོག་ལ་འཚམས་འདྲི་གནང་བའི་ནང་འཁོད་དོན། སྐུ་ཉིད་མཆོག་ཉེ་ཆར་འོས་བསྡུའི་ཁྲོད་རྒྱལ་ཁ་ཐོབ་པར་སྙིང་ཐག་པ་ནས་དགའ་བསུའི་འཚམས་འདྲི་ཞུ་རྒྱུ་ཡིན། ཉེ་ཆར་གྱི་འོས་བསྡུའི་གྲུབ་འབྲས་དེས་འཛམ་གླིང་ཡོངས་ལ་བོད་མི་ཚོས་གཡོ་བ་མེད་པར་བོད་མང་གཙོ་དང་རང་དབང་ལྡན་པ་ཞིག་ལ་བསྒྱུར་རྒྱུའི་ཆོད་སེམས་བརྟན་པོ་ཡོད་པ་གསལ་འདེབས་གནང་ཡོད། ཅེས་དང་། ཐེ་ཝན་དང་བོད་ནི་བློ་ཐུབ་ཀྱི་གྲོགས་པོ་ཡིན་སྟབས་མཉམ་རུབ་ཀྱིས་མང་གཙོ་དང་། རང་དབང་། འགྲོ་བ་མིའི་ཐོབ་ཐང་སྲུང་སྐྱོབ་བྱ་ཐུབ་ངེས་ཡིན། ཞེས་གསུངས། 

གཞན་ཡང་ཁོང་གིས། ང་ཚོའི་གྲོགས་པོའི་འདུ་ཤེས་ནི་ཕན་ཚུན་བརྩི་བཀུར་དང་འདྲ་མཉམ་གཞིར་བཞག་ཐོག་བསྐྲུན་གནང་ཡོད། སྐུ་ཉིད་མཆོག་གི་དབུ་ཁྲིད་འོག་ངས་སྐུ་ཉིད་དང་སྐུ་ཉིད་ཀྱི་འཛིན་སྐྱོང་ལྷན་དུ་བོད་དང་ཐེ་ཝན་དབར་འབྲེལ་བ་དམ་ཟབ་ཡོང་བར་ཕྱག་ལས་གནང་རྒྱུའི་རེ་ལྟོས་བྱེད་ཀྱི་ཡོད། ཅེས་གསུངས།།