༄༅། །ཕྱི་ལོ་ ༢༠༢༡ ཟླ་ ༥ ཚེས་ ༢༦ ཉིན་ཏེ་ས་ག་ཟླ་བའི་དུས་ཆེན་ཁྱད་པར་ཅན་དང་བསྟུན་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གིས་འཛམ་གླིང་ནང་པའི་མཆེད་གྲོགས་ཡོངས་ལ་འཚམས་འདྲི་སྩལ་བའི་ནང་འཁོད་དོན། སྟོན་པ་བཅོམ་ལྡན་འདས་སྐུ་བལྟམས་པ་དང་། མངོན་པར་རྫོགས་པར་སངས་རྒྱས་པ། སྐུ་མྱ་ངན་ལས་འདས་པ་བཅས་དུས་ཆེན་ཁྱད་པར་ཅན་ང་ཚོས་སྲུང་བརྩི་ཞུ་བཞིན་པའི་གོ་སྐབས་དང་བསྟུན། ངོས་ཀྱིས་འཛམ་གླིང་ནང་པའི་མཆེད་གྲོགས་ཡོངས་ལ་འཚམས་འདྲི་ཞུ་རྒྱུ་ཡིན།

སྟོན་པ་ཤཱཀྱ་མུ་ནི་ལོ་ ༢༦༠༠ ཙམ་གྱི་གོང་རྒྱ་གར་ནང་རྒྱ་གར་གྱི་ཤཱཀྱའི་རྒྱལ་རྒྱུད་ཡབ་ཟས་གཙང་མའི་རྒྱལ་སྲས་སུ་སྐུ་བལྟམས་པ་དང་། པཱ་ལི་དང་ལེགས་སྦྱར་གྱི་ཆོས་བརྒྱུད་འཛིན་མཁན་གཉིས་ཀས་སྟོན་པ་སངས་རྒྱས་བཅོམ་ལྡན་འདས་ས་ག་ཟླ་བའི་ཡར་ཚེས་བཅོ་ལྔ་ཉིན་གྱི་ཐོ་རངས་ལ་མངོན་པར་རྫོགས་པར་སངས་རྒྱས་པ་ཡོངས་གྲགས་ཀྱིས་རྗོད་ཀྱི་ཡོད།

པཱ་ལི་དང་ལེགས་སྦྱར་གྱི་ཆོས་བརྒྱུད་འཛིན་མཁན་གཉིས་ཀས་ཁ་གཅིག་གྲག་ཐོག་སྟོན་པ་སངས་རྒྱས་བཅོམ་ལྡན་འདས་ཐོག་མ་ཉིད་ནས་སངས་རྒྱས་ཟིན་པ་ཞིག་ལ་ངོས་འཛིན་གནང་གི་མེད་ཀྱང་། སངས་རྒྱས་བཅོམ་ལྡན་འདས་ཀྱིས་ཚོགས་གསག་སྒྲིབ་སྦྱོང་མཛད་དེ་མངོན་པར་རྫོགས་པར་སངས་རྒྱས་པ་ཞིག་ཡིན་པ་ངོས་འཛིན་ཞུ་གི་ཡོད།

ལེགས་སྦྱར་གྱི་ཆོས་བརྒྱུད་འཛིན་པས་སྟོན་པ་བཅོམ་ལྡན་འདས་ཀྱིས་བསྐལ་པ་གྲངས་མེད་པའི་སྔ་རོལ་ནས་སྐུ་བཞིའི་རྣམ་པ་བསྟན་ཡོད་པ་རྗོད་ཀྱི་ཡོད། སྐུ་བཞི་ནི། ངོ་བོ་ཉིད་སྐུ། ཡེ་ཤེས་ཆོས་སྐུ། ལོངས་སྐུ། སྤྲུལ་སྐུ་བཅས་ཡིན། ཞེས་དང་། སངས་རྒྱས་ཀྱི་གསུང་རབ་དེ་དག་ཁ་ཡོད་ལག་ཡོད་ཡིན་པ་དང་། གསུང་རབ་དེ་དག་ནི་མི་མང་བྱེ་བྲག་པ་དང་། ལུང་པ་བྱེ་བྲག་པ་ཞིག་གི་ཆེད་དུ་མ་ཡིན་པར། སེམས་ཅན་ཐམས་ཅད་ཀྱི་ཆེད་དུ་ཡིན།

མི་སོ་སོའི་ནུས་པ་དང་མོས་པ་ལ་དཔགས་པའི་གསུང་རབ་དེ་དག་གི་ལམ་དུ་རྗེས་སུ་འབྲང་ཆོག་གི་རེད། དཔེར་ན་ངོས་རང་ལ་ཆ་བཞག་ན། ངོས་རང་ལོ་ཆུང་ངུ་ཡིན་པའི་སྐབས་ནས་ནང་པའི་གཞུང་དེ་དག་སྦྱོང་འགོ་བཙུགས་པ་ཡིན་ལ། དུས་ད་ལྟ་ཡིན་ནའང་ལོ་ ༨༦ ལ་སླེབ་ལ་ཉེ་བ་ཡོད་ཀྱང་ངོས་ཀྱིས་ད་དུང་སློབ་གཉེར་བྱེད་ཀྱི་ཡོད། དེར་བརྟེན་ངོས་ཀྱིས་དུས་རྟག་ཏུ་ནང་པ་ཡོངས་ལ་དུས་རབས་ཉི་ཤུ་རྩ་གཅིག་པའི་ནང་པ་བྱེད་དགོས་པ་དང་། སངས་རྒྱས་ཀྱི་གསུང་རབ་ངོ་མ་གང་ཡིན་པ་ཤེས་པའི་ཐོག་ལག་ལེན་གནང་དགོས་པའི་སྐུལ་མ་གཏོང་གི་ཡོད། ནང་པའི་སངས་རྒྱས་པའི་གཞུང་དེ་དག་སྦྱང་བར་ཐོས་བསམ་སྒོམ་གསུམ་ཡ་མ་བྲལ་བ་བྱེད་དགོས།

སྟོན་པ་བཅོམ་ལྡན་འདས་འཇིག་རྟེན་འདིར་ཕེབས་པ་ནས་བཟུང་རིམ་པས་ང་ཚོའི་འཛམ་གླིང་འདི་འགྱུར་བ་ཕྱིན་ཡོད། འོན་ཀྱང་སྟོན་པ་ཐུགས་རྗེ་ཅན་གྱི་གསུང་གི་སྙིང་པོ་དེ་དག་དུས་ད་ལྟ་ཡིན་ནའང་ལོ་ ༢༦༠༠ གོང་གི་ནང་བཞིན་དགོས་མཁོ་ཡོད་པ་ཞིག་ཆགས་ཡོད། པཱ་ལི་དང་ལེགས་སྦྱར་གྱི་ཆོས་བརྒྱུད་གཉིས་ཀར་མ་རིག་པ་དང་སྡུག་བསྔལ་ལས་ཐར་པའི་ཐབས་ལམ་ཡོད། སངས་རྒྱས་བཅོམ་ལྡན་འདས་ཀྱིས་གཞན་ལ་གང་ཐུབ་ཅི་ཐུབ་ཀྱི་ཕན་པ་སྒྲུབ་དགོས་པ་དང་། གཞན་ལ་གནོད་པ་བྱེད་རྒྱུ་མེད་པའི་སྐོར་བསླབ་བྱ་བསྐྱོན་ཡོད། ང་ཚོས་དེ་ལྟར་འགོ་འཛུགས་བྱེད་པར་ང་ཚོ་ཚང་མ་བདེ་བ་འདོད་ཀྱང་སྡུག་བསྔལ་མི་འདོད་པ་གཅིག་མཚུངས་ཡིན་པ་ངོས་འཛིན་གནང་དགོས།

བདེ་སྐྱིད་འཚོལ་བ་དང་། སྡུག་བསྔལ་ལས་བྲལ་འདོད་ཀྱི་རང་དབང་ནི་ང་ཚོ་ཚང་མའི་སྐྱེས་ཐོབ་ཀྱི་ཐོབ་ཐང་ཡིན། འོན་ཀྱང་མི་སྒེར་གྱི་བདེ་སྐྱིད་ནི་ང་ཚོས་མི་གཞན་ལ་ཇི་ལྟར་འབྲེལ་བ་བྱེད་རྒྱུ་ལ་རག་ལུས་ཡོད། གཞན་གྱི་བདེ་སྡུག་ལ་བརྩི་བཀུར་གྱི་བློ་སྐྱེ་ཐབས་བྱེད་དགོས་པ་དང་། རང་གཅེས་འཛིན་གྱི་བློ་དེ་གང་ཐུབ་ཉུང་དུ་གཏོང་དགོས། ང་ཚོའི་དཀའ་ངལ་འབྱུང་ས་གཙོ་བོ་ནི་རང་གཅེས་འཛིན་གྱི་བློ་དེ་ཡིན། གཞན་ལ་སེམས་པ་བཟང་པོ་གང་ཐུབ་བྱེད་ན་རང་བཞིན་གྱིས་བདེ་སྐྱིད་འབྱུང་གི་ཡོད།

དུས་ཆེན་ཁྱད་པར་ཅན་གྱི་སྐབས་འདིར་ནང་པ་ཚོས་ནང་པའི་གནས་ཆེན་དཔེར་ན་གནས་མཆོག་རྡོ་རྗེ་གདན་དང་ལུམ་བི་ནི། དེ་བཞིན་ནང་པའི་གནས་ཆེན་ཁག་ཏུ་སྨོན་ལམ་གསུང་འདོན་དང་། རྣམ་དཀར་དགེ་བའི་ལས་ལ་འབད་ངེས་རེད། འཛམ་གླིང་སྤྱི་ལ་འཕྲད་བཞིན་པའི་ཉེན་ཁ་དང་། དེ་བཞིན་ཏོག་དབྱིབས་གཉན་རིམས་ཀྱི་རྐྱེན་པས་འཛམ་གླིང་ཡོངས་ལ་དཀའ་ངལ་འཕྲད་བཞིན་པ་དེ་དག་ང་ཚོ་ཚང་མ་ཐུན་མོང་གིས་གང་ཐུབ་ཅི་ཐུབ་ཀྱི་སེལ་ཐབས་གནང་དགོས། ཐུགས་སྨོན་དང་འཚམས་འདྲི་ཞུ་རྒྱུ་ཡིན། ཞེས་གསུང་འཕྲིན་སྩལ།།