༄༅། །རྒྱ་ནག་གཞུང་གིས་༸ཀུན་གཟིགས་པཎ་ཆེན་སྐུ་ཕྲེང་བཅུ་གཅིག་པ་དགེ་འདུན་ཆོས་ཀྱི་ཉི་མ་མཆོག་བཙན་འཁྲིད་བྱས་ཏེ་ད་བར་གར་སོང་ཆ་མེད་དུ་གྱུར་ནས་ལོ་ངོ་ ༢༦ འཁོར་བའི་དུས་ཚིགས་དང་བསྟུན་སུད་སི་སྐུ་ཚབ་དོན་ཁང་ནས་ཕྱི་ལོ་ ༢༠༢༡ ཟླ་ ༥ ཚེས་ ༡༧ ཉིན་བོད་མི་ཡོངས་དང་། འཛམ་གླིང་ཐོག་གི་བོད་དོན་རྒྱབ་སྐྱོར་བ་རྣམས་ཀྱི་ཚབ་ཞུས་ཏེ་མཉམ་འབྲེལ་རྒྱལ་ཚོགས་ལ་འབོད་སྐུལ་ཞུ་སྙན་ཞིག་ཕུལ་ཡོད།
འབོད་སྐུལ་ཞུ་སྙན་ནང་མཉམ་འབྲེལ་རྒྱལ་ཚོགས་ཀྱིས་༸ཀུན་གཟིགས་པཎ་ཆེན་སྐུ་ཕྲེང་བཅུ་གཅིག་པ་དགེ་འདུན་ཆོས་ཀྱི་ཉི་མ་མཆོག་མགྱོགས་མྱུར་གློད་བཀྲོལ་ཐོབ་ཆེད་འཕྲལ་དུ་ལག་བསྟར་ཡོང་བའི་འབོད་སྐུལ་ཞུས་ཡོད།
དེ་ཡང་འབོད་སྐུལ་ཞུ་སྙན་དེ་བཞིན་འཛམ་གླིང་མཉམ་འབྲེལ་རྒྱལ་ཚོགས་ཀྱི་སྤྱི་ཁྱབ་དྲུང་ཆེ་སྐུ་ཞབས་ཨེན་ཊོ་ནིའོ་གུ་ཊར་རེ་སི་ (Mr Antonio Guterres) མཆོག་དང་། མཉམ་འབྲེལ་རྒྱལ་ཚོགས་ཀྱི་རྒྱལ་ཡོངས་བདེ་སྲུང་ལྷན་ཁང་། མཉམ་འབྲེལ་རྒྱལ་ཚོགས་ཀྱི་ཚོགས་ཆེན་གྱི་སྤྱི་ཚོགས་ཀྱི་ཚོགས་གཙོ། མཉམ་འབྲེལ་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་ལྷན་ཁང་གི་ཚོགས་གཙོ། རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཁང་གི་འགན་འཛིན། མཉམ་འབྲེལ་རྒྱལ་ཚོགས་ཀྱི་ཆིངས་ཡིག་གི་ལས་ཁུངས་ཁག དེ་བཞིན་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་གི་གནད་དོན་ཐོག་དམིགས་བསལ་མཁས་ལས་མི་སྣ་སོགས་ལ་ཕུལ་ཡོད།
ཕྱི་ལོ་ ༡༩༩༥ ཟླ་ ༥ ཚེས་ ༡༧ ཉིན་༸ཀུན་གཟིགས་པཎ་ཆེན་སྐུ་ཕྲེང་བཅུ་གཅིག་པ་དགེ་འདུན་ཆོས་ཀྱི་ཉི་མ་མཆོག་རྒྱ་ནག་གཞུང་གིས་བཙན་ཁྲིད་བྱེད་སྐབས་ཁོང་དགུང་གྲངས་དྲུག་ཀྱང་ཟིན་མེད། དུས་དེ་ནས་བཟུང་༸ཀུན་གཟིགས་པཎ་ཆེན་རིན་པོ་ཆེ་མཆོག་དང་ཁོང་གི་ནང་མི་ལྷན་རྒྱས་དང་བཅས་པ་ད་བར་མི་ཚོགས་ཀྱི་ཁྲོད་ནས་གར་སོང་ཆ་མེད་དུ་གྱུར་ཡོད། མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་གི་གནད་དོན་ཐོག་དམིགས་བསལ་མཁས་ལས་མི་སྣ་དང་། རྒྱལ་ཚོགས་ཀྱི་ཆིངས་ཡིག་ལས་ཁུངས་ཁག་གིས་༸ཀུན་གཟིགས་པཎ་ཆེན་སྐུ་ཕྲེང་བཅུ་གཅིག་པ་དགེ་འདུན་ཆོས་ཀྱི་ཉི་མ་མཆོག་གང་དུ་ཡོད་མིན་དང་། མགྱོགས་མྱུར་གློད་བཀྲོལ་དགོས་པའི་ཐད་རྒྱ་ནག་དང་ལྷན་འབྲེལ་ལམ་ཐེངས་མང་བྱས་ཀྱང་། རྒྱ་ནག་གཞུང་གིས་༧པཎ་ཆེན་ཆུང་སྲིད་རིན་པོ་ཆེ་མཆོག་དང་ཁོང་གི་ནང་མི་རྣམས་ཀྱི་གཟུགས་གཞིའི་བདེ་ཐབས་དང་། གང་དུ་ཡོད་མིན་སོགས་ཀྱི་སྐོར་ལ་ཡིད་ཚིམས་པའི་གསལ་བཤད་གང་ཡང་བྱས་མེད།
༧པཎ་ཆེན་རིན་པོ་མཆོག་གི་གནད་དོན་དེ་བཞིན་མཉམ་འབྲེལ་རྒྱལ་ཚོགས་ཀྱི་གར་སོང་ཆ་མེད་དུ་གྱུར་བའི་གནད་དོན་ལས་དོན་ཚོགས་ཆུང་གིས་ཐག་མ་ཆོད་པའི་གྱོད་གཞིའི་གྲས་ཤིག་ཡིན། གཞན་ཡང་རྒྱ་ནག་གཞུང་གིས་༸ཀུན་གཟིགས་པཎ་ཆེན་སྐུ་ཕྲེང་བཅུ་གཅིག་པ་དགེ་འདུན་ཆོས་ཀྱི་ཉི་མ་མཆོག་དང་། ཁོང་གི་ནང་མི་ལྷན་རྒྱས་བཙན་ཁྲིད་ཀྱིས་ད་ཆ་གར་སོང་ཆ་མེད་དུ་གྱུར་ནས་མི་ལོ་ ༢༦ འཁོར་བ་དེ་ནི་༧པཎ་ཆེན་ཆུང་སྲིད་རིན་པོ་ཆེ་མཆོག་དང་ཁོང་གི་ནང་མི། དེ་བཞིན་བོད་མི་རྣམས་ལ་བར་མ་ཆད་པའི་ཉེས་མེད་ནག་ཉེས་ཤིག་ཆགས་ཀྱི་ཡོད་པ་མ་ཟད། འགྲོ་བ་མིའི་ཐོབ་ཐང་ལ་གུས་བརྩི་ཞུ་མཁན་གྱི་མི་སྒེར་ཚང་མར་བར་མ་ཆད་པའི་ཉེས་མེད་ནག་ཉེས་ཤིག་ཀྱང་ཆགས་ཡོད།
སུད་སི་སྐུ་ཚབ་དོན་ཁང་གིས་འཛམ་གླིང་མཉམ་འབྲེལ་རྒྱལ་ཚོགས་ཀྱི་ངོས་ནས་རྒྱ་ནག་གཞུང་ལ་གནོན་ཤུགས་སྤྲད་དེ་༸ཀུན་གཟིགས་པཎ་ཆེན་སྐུ་ཕྲེང་བཅུ་གཅིག་པ་དགེ་འདུན་ཆོས་ཀྱི་ཉི་མ་མཆོག་དང་། ཡབ་ཡུམ་དང་ནང་མི། བྱ་བྲལ་རིན་པོ་ཆེ་བཅས་མགྱོགས་མྱུར་གློད་བཀྲོལ་ཡོང་བ་དང་། བོད་དང་ཡུ་གུར་སོགས་ཀྱི་ནང་ཆོས་ལུགས་ལ་ཐེ་བྱུས་བྱེད་བཞིན་པ་མཚམས་འཇོག་བྱེད་དུ་འཇུག་རྒྱུ། བོད་ཀྱིས་གཙོས་རྒྱ་ནག་གི་ས་ཁུལ་གཞན་ཁག་གི་ནང་འགྲོ་བ་མིའི་ཐོབ་ཐང་ལ་རྩིས་མེད་རྡོག་རོལ་གཏོང་བཞིན་པར་རང་དབང་ལྡན་པའི་རྟོག་ཞིབ་ཚོགས་ཆུང་ཞིག་དངོས་ཡོད་གནས་ཚུལ་འཚོལ་ཞིབ་ཀྱི་སླད་བསྐྱོད་ཆོག་རྒྱུ། དེ་བཞིན་ཡོངས་ཁྱབ་ཀྱི་བསྒྲགས་གཏམ་སོགས་སྤེལ་ཏེ་༸ཀུན་གཟིགས་པཎ་ཆེན་སྐུ་ཕྲེང་བཅུ་གཅིག་པ་དགེ་འདུན་ཆོས་ཀྱི་ཉི་མ་མཆོག་མགྱོགས་མྱུར་གློད་བཀྲོལ་ཡོང་བའི་རེ་སྐུལ་ཞུས་ཡོད་པ་བཅས། །
