༄༅། །རྒྱ་གར་དབུས་གཞུང་གི་ཤེས་རིག་བློན་ཆེན་ལས་ཁུངས་ནས་དབུས་བོད་སློབ་འཛིན་ཚོགས་ཁྱབ་ཁོངས་བཙན་བྱོལ་བོད་མིའི་སློབ་གྲྭ་ལྷག་བསྡད་རྣམས་བོད་མིའི་སྒྲིག་འཛུགས་ཤེས་རིག་ལས་ཁུངས་ཀྱི་ཁྱབ་ཁོངས་སཾ་བྷོ་ཌ་བོད་སློབ་ཚོགས་པར་རྩིས་སྤྲོད་གནང་གཏན་འཁེལ་ཡོད་པ་དང་། དེ་སྔ་དབུས་བོད་སློབ་འཛིན་ཚོགས་ནས་སྔོན་འགྲོའི་སློབ་གྲྭ་ཁག་ ༣༣ དང་། གཞི་རིམ་འོག་མའི་སློབ་གྲྭ་ཁག་ ༩ ། གཞི་རིམ་བར་མའི་སློབ་གྲྭ་ཁག་ ༥ ། འཛིན་གྲྭ་བཅུ་པ་དང་བཅུ་གཉིས་བར་ཡོད་པའི་སློབ་གྲྭ་ཁག་ ༨ བཅས་རྩིས་སྤྲོད་གནང་ཡོད།
དེ་ཡང་ཕྱི་ལོ་ ༢༠༢༡ ཟླ་ ༥ ཚེས་ ༢༥ རེས་གཟའ་མིག་དམར་ཉིན་རྒྱ་གར་དབུས་གཞུང་ཤེས་རིག་བློན་ཆེན་ལས་ཁུངས་ནས་ལྷག་བསྡད་སློབ་གྲྭ་ཁག་དྲུག་སྟེ་མ་སུ་རི་དང་། སིམ་ལ། ཌལ་ཧོར། རྡོར་གླིང་། ཀ་སྦུག ཧ་སྤུར་གཏན་སློབ་བཅས་བོད་མིའི་སྒྲིག་འཛུགས་ཤེས་རིག་ལས་ཁུངས་ཀྱི་ཁྱབ་ཁོངས་སཾ་བྷོ་ཌ་བོད་སློབ་ཚོགས་པར་རྩིས་སྤྲོད་གནང་རྒྱུའི་བཀའ་ཁྲོལ་གནང་བར་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་མཆོག་གིས་གསུང་དོན། རྒྱ་གར་དབུས་གཞུང་གི་ཤེས་རིག་བློན་ཆེན་ལས་ཁུངས་ནས་ལྷག་བསྡད་དབུས་བོད་སློབ་འཛིན་ཚོགས་ཁྱབ་ཁོངས་སློབ་གྲྭ་རྣམས་སཾ་བྷོ་ཌ་བོད་སློབ་ཚོགས་པར་རྩིས་སྤྲོད་གནང་གཏན་འཁེལ་བའི་གནས་ཚུལ་དེ་ཉིད་གཏམ་བཟང་ཞིག་ཡིན།
དབུས་བོད་སློབ་འཛིན་ཚོགས་ཁྱབ་ཁོངས་བཙན་བྱོལ་བོད་མིའི་སློབ་ཁག་སཾ་བྷོ་ཌ་བོད་སློབ་ཚོགས་པར་རྩིས་ལེན་རྒྱུ་ནི་བཀའ་ཤག་སྐབས་ ༡༤ དང་ ༡༥ པའི་ལས་དོན་གལ་ཆེན་ཞིག་ཡིན། དེ་རིང་གོ་སྐབས་འདི་བརྒྱུད་བོད་མིའི་སྒྲིག་འཛུགས་ཀྱི་ཤེས་རིག་བཀའ་བློན་འབུམ་རམས་པ་པདྨ་དབྱངས་ཅན་མཆོག་གིས་གཙོས་ཤེས་རིག་ལས་ཁུངས་ཀྱི་ལས་བྱེད་ཡོངས་ལ་འཚམས་འདྲི་ཡོད། ཅེས་གསུངས།
