༄༅། །ཕྱི་ལོ་ ༢༠༢༡ ཟླ་ ༥ ཚེས་ ༡༢ ཉིན་ཏེ་རྒྱལ་སྤྱིའི་སྨན་ཞབས་པའི་ཉིན་མོ་དང་བསྟུན་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་གིས་གསུང་དོན། དེ་རིང་ནི་རྒྱལ་སྤྱིའི་སྨན་ཞབས་པའི་ཉིན་མོ་ཡིན་སྟབས་སྨན་ཞབས་པ་གཙོ་བོར་གྱུར་པའི་འཕྲོད་བསྟེན་ལས་བྱེད་དང་ས་གནས་ཀྱི་ལས་བྱེད་བཅས་ལ་བོད་མིའི་སྒྲིག་འཛུགས་ཀྱི་བཀའ་ཤག་གི་ངོས་ནས་བཀྲ་ཤིས་བདེ་ལེགས་དང་རྗེས་སུ་ཡི་རང་ཞུ་རྒྱུ་ཡིན།
བདུན་ཕྲག་གཅིག་ཙམ་གྱི་སྔོན་ལ་བཀའ་ཤག་གིས་རྒྱ་བལ་འབྲུག་གསུམ་ལ་ཡོད་པའི་བོད་མི་དང་ཕྱི་རྒྱལ་ཡུལ་གྲུ་ཁག་ཏུ་ཡོད་པའི་བོད་མི་རྣམས་ཀྱིས་རྒྱ་གར་ནང་ཏོག་དབྱིབས་གཉན་རིམས་ཀྱི་གནས་སྟངས་ཛ་དྲག་ཆགས་ཡོད་པར་བརྟེན་ཞལ་འདེབས་གང་ཐུབ་ཅི་ཐུབ་གནང་རོགས་ཞེས་འབོད་སྐུལ་ཞུས་པ་ལྟར། ཞལ་འདེབས་ཧ་ཅང་ཡག་པོ་གནང་འདུག ཚང་མར་ཐུགས་རྗེ་ཆེ་ཞུ་རྒྱུ་ཡིན། དཔེར་ན། བྱང་ཨ་རིའི་སྐུ་ཚབ་དོན་ཁང་ཁྱབ་ཁོངས་ཨ་རི་དང་ཁེ་ན་ཌ་ནས་ཧིན་སྒོར་ས་ཡ་ ༢༠ ལྷག་དང་། སུད་སི་དོན་ཁང་གི་ཁྱབ་ཁོངས་ནས་ཧིན་སྒོར་ས་ཡ་ ༡༠། སྦེལ་ཇེམ་དོན་ཁང་གི་ཁྱབ་ཁོངས་ནས་ཧིན་སྒོར་འབུམ་ ༣༧ ཙམ། ཐའེ་ཝན་ནས་ཧིན་སྒོར་འབུམ་ ༣༠ ཙམ། ཨོ་སི་ཀྲོ་ལི་ཡ་དང་ནིའུ་ཛེ་ལན་ཌ་ཁུལ་ནས་ཧིན་སྒོར་འབུམ་ ༢༧ ཙམ་བཅས་ཁྱོན་བསྡོམས་ཧིན་སྒོར་ས་ཡ་ ༤༠ ཙམ་གནང་འདུག
དེ་བཞིན་རྒྱ་བལ་འབྲུག་གསུམ་གྱི་བོད་མི་ཚོས་ཧིན་སྒོར་འབུམ་ ༨༠ ཙམ་དང་བོད་མིའི་སྒྲིག་འཛུགས་ཀྱི་ལས་བྱེད་ཚོའི་ཉིན་གཅིག་གི་གླ་ཕོགས་ཞལ་འདེབས་བཅས་བསྡོམས་ཧིན་སྒོར་ས་ཡ་ ༥༠ ཙམ་རྒྱ་གར་གྱི་སྲིད་བློན་མཆོག་གི་ཛ་དྲག་གུད་སྐྱོབ་མ་དངུལ་ ( PM-CARES Fund) ལ་ཞལ་འདེབས་ཕུལ་ཐུབ་པ་བྱུང་བ་འདི་ཧ་ཅང་ཡག་པོ་བྱུང་སོང་བསམ་གྱི་འདུག
ཁ་སྔོན་ཞུས་པ་ནང་ལྟར་བཙན་བྱོལ་བོད་མི་རྣམས་ལ་རྒྱ་གར་གཞུང་མང་གཉིས་ལས་བཀའ་དྲིན་ཆེ་བ་མེད། ང་ཚོ་བཙན་བྱོལ་བོད་མི་མང་དག་ཅིག་ཆུང་དུས་ནས་སྐྱེས་ས་དང་འཚར་ས། བོད་ས་ཤོར་ནས་ཉག་ཕྲའི་དུས་སྐབས་སུ་རྒྱ་གར་གཞུང་མང་གཉིས་ནས་བདག་པོ་བརྒྱབ་སྟེ་གཞིས་ཆགས་དང་སྨན་ཁང་། སློབ་གྲྭ་སོགས་གང་ཅིའི་ཐད་ནས་རོགས་སྐྱོར་གནང་ཡོད། ད་ལམ་ཛ་དྲག་གནས་སྟངས་སྐབས་སུ་རྒྱ་གར་གཞུང་ལ་ཐུགས་རྗེ་ཆེ་ཞུའི་མཚོན་དོན་དུ་ཞལ་འདེབས་ཕྲན་བུ་བརྒྱབ་ཐུབ་པ་འདི་ཧ་ཅང་ཡག་པོ་བྱུང་སོང་། ཞིབ་ཕྲ་ཉིན་ཤས་རྗེས་གསར་འགྱུར་བརྒྱུད་ལམ་ཁག་ནང་འཐོན་ཡོང་གི་རེད། བཀའ་ཤག་ནས་འབོད་སྐུལ་ཞུས་པ་ལྟར་བོད་མི་ཡོངས་ནས་གང་ཐུབ་ཅི་ཐུབ་གནང་སྟེ་ཞལ་འདེབས་བརྒྱབ་པ་དེ་ལ་སྙིང་ཐག་པ་ནས་ཐུགས་རྗེ་ཞེས་ཞུ་རྒྱུ་ཡིན།
རྒྱ་གར་གཞུང་གི་གནད་ཡོད་མི་སྣ་ཚོས་གསན་པ་ཡིན་ནའང་བོད་པ་ཟེར་མཁན་དེ་སྤྱི་ནོར་༧གོང་ས་༸སྐྱབས་མགོན་ཆེན་པོ་མཆོག་གིས་གསུངས་པ་ལྟར་བཀའ་དྲིན་བསམ་མཁན་ཞིག་རེད་འདུག་ཅེས་དགའ་ཚོར་གནང་ངེས་རེད། རྒྱ་གར་ལ་དཀའ་ངལ་འཕྲད་པའི་སྐབས་གདུང་སེམས་མཉམ་སྐྱེའི་ཐོག་ནས་མཉམ་དུ་ལང་ཡོང་གི་འདུག ཅེས་བརྡ་ལན་བཟང་པོ་ཞིག་སྤྲོད་ཐུབ་ཀྱི་རེད་བསམ་གྱི་འདུག བརྡ་ལན་དེ་ཡང་རྣམ་པ་ཚོས་སྐུ་ལས་བསྐྱོན་ནས་ཞལ་འདེབས་གནང་བ་ལ་བརྟེན་ནས་བྱུང་བ་ཡིན་སྟབས་རྗེས་སུ་ཡི་རང་ཡོད།
བདུན་ཕྲག་སྔོན་མར་ངས་ནད་ཡམས་དང་འབྲེལ་བའི་བཀའ་ཤག་ནས་འགྲོ་གྲོན་ཇི་ཙམ་གཏོང་དགོས་བྱུང་ནའང་གཏོང་གི་ཡིན། སྔོན་ཁབ་ཡིན་ནའང་ཉོས་ནས་མི་མང་ལ་བརྒྱབ་རོགས། གཙོ་ཆེ་ཤོས་དབུས་དང་ས་གནས་ཀྱི་ལས་བྱེད་ཚོས་སྐུ་ལས་ཧ་ཅང་སྐྱོན་གནང་བར་ཐུགས་རྗེ་ཆེ་ཞུ་རྒྱུ་ཡིན།
ད་རེས་བཀའ་ཤག་ནས་རྣམ་པ་ཚོའི་ཕོགས་ཕྲན་བུ་སྤར་ཐུབ་པའི་གནས་སྟངས་ཆགས་ཀྱི་ཡོད་སྟབས། དེའི་སྐོར་སྙིང་བསྡུས་ཤིག་ཞུ་ན་སྙམ་བྱུང་། ཕྱི་ལོ་ ༢༠༠༨ ལོའི་བཀའ་ཤག་ནས་ལོ་ལྔ་རེའི་མཚམས་ཕོགས་རིམ་ཚོགས་ཆུང་འཚོགས་དགོས་ཞེས་སྙན་ཐོར་འཁོད་ཡོད་པ་ལྟར། ཕྱི་ལོ་ ༢༠༡༣ ལོར་ཕོགས་རིམ་བསྐྱར་ཞིབ་ཚོགས་ཆུང་ནས་སྙན་ཐོར་བདག་པོ་བརྒྱབ་མི་འདུག འོན་ཀྱང་བར་བརྒལ་ངལ་སེལ་བརྒྱ་ཆ་སོ་གཉིས་སྤར་གནང་འདུག ཕྱི་ལོ་ ༢༠༡༦ ལོར་བར་བརྒལ་ངལ་སེལ་དེ་རྩ་ཕོགས་ལ་བསྒྱུར་འདུག ཕྱི་ལོ་ ༢༠༡༦ ནས་ ༢༠༢༡ བར་ལོ་ལྔ་ཆགས་ཀྱི་ཡོད་སྟབས། གྲོས་ཚོགས་ནས་བཀའ་འཁྲོལ་ཞུས་ཡོད་པ་མ་ཟད་སྤོམ་དངུལ་ཡང་བཞག་ཡོད། ལམ་ལུགས་དང་མཐུན་པའི་ཕོགས་རིམ་ཚོགས་ཆུང་བཙུགས་ནས་ཕོགས་རིམ་ཚོགས་ཆུང་གི་སྙན་ཐོ་མང་ཆེ་བ་ཁས་ལེན་ཐུབ་པ་བྱུང་སོང་། དེའི་ནང་ལས་བྱེད་དམའ་རིམ་གྱི་ཕོགས་བརྒྱ་ཆ་ ༡༨ ཙམ་སྤར་རྒྱུ་དང་ལས་བྱེད་མཐོ་བའི་ཕོགས་བརྒྱ་ཆ་ ༡༠ ཙམ་སྤར་རྒྱུ་ལྟ་བུ་ཆགས་འདུག
འཕྲོད་བསྟེན་ཐོག་ནས་སྨན་ཞབས་པ་རྣམས་གཙོ་བོ་ཆགས་ཀྱི་ཡོད་སྟབས་ (B.Sc Nurse) ལ་བརྒྱ་ཆ་ ༡༠ ཙམ་དང་། (Staff Nurse) ལ་བརྒྱ་ཆ་ ༡༥ ཙམ། (Auxiliary Nurse) ལ་བརྒྱ་ཆ་ ༢༠ ཙམ། འཕྲོད་བསྟེན་རང་ཁོངས་ལས་བྱེད་ཁ་ལོ་བ་ལ་བརྒྱ་ཆ་ ༤༠ ཙམ་སྤར་ཐུབ་པ་བྱུང་སོང་། སྨན་ཞབས་པ་ཚོ་ནད་པ་དང་ཐད་ཀར་འབྲེལ་བ་ཡོང་གི་ཡོད་པ་མ་ཟད། སྨན་ཞབས་པ་མང་པོ་ཞིག་ནད་ཡམས་ཕོག་པའི་གནས་ཚུལ་ཡང་ཡོང་བཞིན་ཡོད་པར་བརྟེན་ནང་སྲིད་དང་འཕྲོད་བསྟེན། ཤེས་རིག་ལས་ཁུངས་བཅས་ཀྱི་ཁྱབ་ཁོངས་སུ་ཡོད་པའི་སྨན་ཞབས་པ་ཡོངས་ལ་ཐུགས་རྗེ་ལེགས་འབུལ་གྱི་ཚུལ་དུ་ཧིན་སྒོར་ལྔ་སྟོང་རེ་འབུལ་རྒྱུ་ཡིན། དེ་བཞིན་སྨན་ཞབས་པའི་ནང་མི་ཚོར་ནད་ཡམས་དང་འབྲེལ་བའི་ན་ཚ་རིགས་བྱུང་བ་ཡིན་ན་བཀའ་ཤག་ནས་འཕྲོད་བསྟེན་ལས་ཁུངས་བརྒྱུད་མཐུན་འགྱུར་གང་ཐུབ་ཅི་ཐུབ་སྦྱར་གྱི་ཡིན་ཞེས་ཞུས་ཡོད། སྨན་ཞབས་པའི་ནང་མི་འགའ་ཤས་ལ་འཕྲོད་བསྟེན་ལས་ཁུངས་ནས་མཐུན་རྐྱེན་སྦྱར་ཐུབ་པ་བྱུང་སོང་།
ནང་སྲིད་ལས་ཁུངས་ཀྱི་དབུས་བོད་མིའི་ངལ་སེལ་ཚོགས་པ་དང་སཾ་བྷོ་ཊའི་ཁྱབ་ཁོངས་ལ་ཡོད་པའི་ལས་བྱེད་ཀྱི་ཕོགས་ཕྲན་བུ་སྤར་ཐུབ་པ་བྱུང་སོང་། ཞེས་སོགས་གསུངས། །
