༄༅། ། ཡུ་རོབ་སྤྱི་མཐུན་ཚོགས་པའི་ཕྱི་འབྲེལ་ལས་ཁུངས་ཀྱི་འགན་འཛིན་གཞོན་པ་སྐུ་ཞབས་ཇོ་སེཕ་བྷོ་རེལ་ (Josep Borrell) མཆོག་གིས་ཉེ་ལམ་བོད་ནང་རྒྱ་ནག་གཞུང་གིས་ཆབ་སྲིད་བཙོན་པར་རྡུང་རྡེག་མནར་གཅོད་བཏང་སྟེ་བཀག་བསྐྱིལ་ཁང་དུ་འདས་གྲོངས་སུ་གྱུར་བ་དང་། རྡུང་རྡེག་མཉར་གཅོད་ཀྱིས་རྐྱེན་པས་བཙོན་གྲོལ་ཐོབ་ཀྱང་འདས་གྲོངས་སུ་གྱུར་བའི་གནད་དོན་ཐད་ཡུ་རོབ་གྲོས་ཚོགས་སུ་ལན་འདེབས་གནང་བའི་ནང་མི་སྤྱོད་ལས་འདས་པའི་མནར་གཅོད་ཡང་ན། མི་གཤིས་ལ་བརྙས་བཅོས་དང་ཁྲིམས་ཆད་སོགས་ཀྱི་བྱ་སྤྱོད་རིགས་གང་དུ་ཐོན་པ་དང་། རྣམ་པ་གང་ཞིག་གི་ཐོག་ནས་ཐོན་ཡང་བྱ་སྤྱོད་དེ་རིགས་ལ་སྐྱོན་བརྗོད་ཤུགས་ཆེ་གནང་ཡོད།
སྐུ་ཞབས་ཇོ་སེཕ་བྷོ་རེལ་མཆོག་གིས། ཡུ་རོབ་གྲོས་ཚོགས་ཀྱིས་རྒྱ་ནག་གཞུང་ལ་འགྲོ་བ་མིའི་ཐོབ་ཐང་ལ་བརྩི་འཇོག་དང་སྲུང་སྐྱོབ་ཀྱི་སླད་གཏན་འབེབས་བྱས་པའི་རྒྱལ་ཁབ་དང་རྒྱལ་སྤྱིའི་བཅའ་ཁྲིམས་ཁག་ལ་གུས་བརྩི་ཞུ་དགོས་པ་ཐེངས་མང་ནན་སྐུལ་བྱས་ཡོད་ཅེས་གསུངས། དེ་བཞིན་ཁོང་གིས་དེ་སྔ་ཡུ་རོབ་གྲོས་ཚོགས་ནས་བསྒྲགས་གཏམ་ཞིག་སྤེལ་བའི་ནང་། རང་ཉིད་ཀྱི་གཞི་རྩའི་འགྲོ་བ་མིའི་ཐོབ་ཐང་ལོངས་སུ་སྤྱད་པའི་དབང་གིས་བཙོན་འཇུག་བྱས་པ་རྣམས་འཕྲལ་མར་ཆ་རྐྱེན་གང་ཡང་མེད་པའི་ཐོག་ནས་གློད་བཀྲོལ་དགོས་པ་མ་ཟད། ཆབ་སྲིད་བཙོན་པ་བཀག་ཉར་བྱས་པ་རྣམས་ལ་དྲང་གཞག་ངང་འདྲི་གཅོད་དང་ཚུལ་མཐུན་ངང་གོ་རིམ་བརྒྱུད་དགོས་པ། བཀག་ཉར་བྱས་པ་རྣམས་ལ་སྡུག་སྦྱོང་མནར་གཅོད་སོགས་གཏོང་མི་དགོས་པ་སོགས་བཏོན་པའི་བསྒྲགས་གཏམ་ལུང་འདྲེན་གནང་ཡོད།
དེ་ཡང་གནད་དོན་དེ་ནི་ཡུ་རོབ་གྲོས་ཚོགས་ཀྱི་བོད་དོན་རྒྱབ་སྐྱོར་ཚོགས་མི་ ༡༢ ཀྱིས་རྒྱ་གཞུང་གི་རྡུང་རྡེག་མནར་གཅོད་འོག་གྲྭ་ཆོས་སྐྱིད་ལགས་དང་། ཕྲུ་གུ་གསུམ་གྱི་ཨ་མ་ལྷ་མོ་ལགས། རང་ལོ་ ༡༩ ཡིན་པའི་རྫ་དབོན་པོ་དགོན་པའི་དགེ་འདུན་པ་བསྟན་འཛིན་ཉི་མ་ལགས། འབྲི་རུ་རྫོང་ཆགས་རྩེ་ཤང་གྲོང་ཚོ་ལྔ་པ་ནས་ཡིན་པའི་དཀོན་མཆོག་སྦྱིན་པ་ལགས་བཅས་འདས་གྲོངས་སུ་གྱུར་བའི་རྗེས་གླེང་སློང་གནང་ཡོད།
དེ་བཞིན་ཕྱི་ལོ་ ༢༠༢༡ ཟླ་ ༤ ཚེས་ ༢༧ ཉིན་སྦེལ་ཇམ་གྲོས་ཚོགས་འཐུས་མི་སྐུ་ཞབས་ (Mr Samuel Cogolati) མཆོག་གིས་གྲོས་ཚོགས་སུ་རྒྱ་ནག་གཞུང་གིས་བོད་ནང་ངལ་རྩོལ་བསྒྱུར་བཀོད་ཁང་གི་ལས་གཞི་ལག་བསྟར་བྱེད་བཞིན་པར་སྦེལ་འཇམ་གཞུང་ནས་ཐེ་བྱུས་བྱེད་ཀྱི་ཡོད་མིན་སྐོར་དང་། རྒྱ་ནག་གཞུང་གིས་བཀག་ཉར་བྱས་པའི་བོད་ཀྱི་ཆབ་སྲིད་བཙོན་པ་རྡུང་རྡེག་མནར་གཅོད་འོག་འདས་གྲོངས་སུ་གྱུར་བ་ལ་སྦེལ་ཇམ་གཞུང་ནས་སྐྱོན་བརྗོད་བྱེད་ཀྱི་ཡོད་མིན་བཀའ་འདྲི་གནང་ཡོད།
དེ་ཡང་ལན་འདེབས་སུ་སྦེལ་ཇམ་ཕྱི་སྲིད་བློན་ཆེན་ (Ms Wilmès) མཆོག་གིས། སྦེལ་ཇམ་གཞུང་གིས་རྒྱ་ནག་ནང་གི་འགྲོ་བ་མིའི་ཐོབ་ཐང་གི་གནས་སྟངས་ཐད་དོ་སྣང་ཆེན་པོ་བྱེད་ཀྱི་ཡོད་པ་དང་། རྒྱ་གཞུང་གིས་བཙན་དབང་ངང་ངལ་རྩོལ་བསྒྱུར་བཀོད་ཁང་དུ་བཅུག་པའི་བོད་མི་རྣམས་ཀྱི་གནས་སྟངས་ལ་སྦེལ་ཇམ་གཞུང་ནས་དོ་ཁུར་བྱེད་ཀྱི་སྐོར་དང་། དེ་ལ་བརྟེན་ནས་སྦེལ་ཇམ་གཞུང་གིས་ཕྱོགས་གཉིས་དང་ཕྱོགས་མང་པོའི་འབྲེལ་ལམ་བརྒྱུད་རྒྱལ་ཁབ་དང་ཡུ་རོབ་སྤྱི་མཐུན་རྒྱལ་ཁབ་ཀྱི་རིམ་པའི་ཐོག་བོད་ཀྱི་འགྲོ་བ་མིའི་ཐོབ་ཐང་གི་གནད་དོན་ཐད་གླེང་སློང་གནང་གི་ཡོད་སྐོར་འགྲེལ་བརྗོད་གནང་ཡོད།
སྦར་སིལ་སྐུ་ཚབ་དོན་ཁང་གིས་གོང་གསལ་ཡུ་རོབ་གྲོས་ཚོགས་ཀྱི་འཐུས་མི་རྣམས་དང་། སྦེལ་ཇམ་གྲོས་ཚོགས་འཐུས་མིའི་དབར་འབྲེལ་བ་དམ་ཟབ་རྒྱུན་འཁྱོངས་གནང་བཞིན་ཡོད་པ་བཅས། །
