༄༅། །ཕྱི་ལོ་ ༢༠༢༡ ཟླ་ ༥ ཚེས་ ༡༩ ཉིན་འཇར་མན་གྲོས་ཚོགས་ཀྱི་འགྲོ་བ་མིའི་ཐོབ་ཐང་ཚོགས་ཆུང་གིས་རྒྱ་གཞུང་ནས་བོད་མི་ཚོར་བཅིངས་འགྲོལ་གཏོང་རྒྱུའི་ཁས་ལེན་འོག་བཙན་དབང་གིས་གྲོས་མཐུན་དོན་ཚན་བཅུ་བདུན་ལ་མི་རྟགས་བཀོད་དུ་བཅུག་ནས་ལོ་ངོ་ ༧༠ འཁོར་བ་དང་བསྟུན། འདས་པའི་ལོ་ངོ་ ༧༠ རིང་རྒྱ་ནག་གཞུང་གིས་བོད་ནང་གདུག་རྩུབ་ཅན་གྱི་སྲིད་བྱུས་ལག་བསྟར་བྱས་ཏེ་བོད་མིའི་འགྲོ་བ་མིའི་ཐོབ་ཐང་ལ་བརྩི་མེད་རྡོག་རོལ་གཏོང་བཞིན་པར་སྐྱོན་བརྗོད་དྲག་པོའི་བསྒྲགས་གཏམ་སྤེལ་ཞིག་ཡོད།
འཇན་མན་གྲོས་ཚོགས་ཀྱི་འགྲོ་བ་མིའི་ཐོབ་ཐང་ཚོགས་ཆུངགིས་སྤེལ་བའི་བསྒྲགས་གཏམ་ལ་འཇར་མན་གཞུང་འཛིན་དང་། ཕྱོགས་འགལ་ཚོགས་པ། དེ་བཞིན་ལྗང་ཁུ་ཚོགས་པ་སོགས་ཀྱི་གྲོས་ཚོགས་འཐུས་མི་རྣམ་གྱིས་རྒྱབ་སྐྱོར་གནང་ཡོད།
དེ་ཡང་འཇར་མན་གྲོས་ཚོགས་ཀྱི་འགྲོ་བ་མིའི་ཐོབ་ཐང་ཚོགས་ཆུང་གིས་སྤེལ་བའི་བསྒྲགས་གཏམ་ནང་། ཕྱི་ལོ་ ༡༩༥༡ ཟླ་ ༥ ཚེས་ ༢༣ ཉིན་བོད་དང་རྒྱ་ནག་དབར་རྩོད་གཞི་ཅན་གྱི་གྲོས་མཐུན་དོན་ཚན་བཅུ་བདུན་ཞིག་བཞག་ནས་བོད་ཀྱི་དོན་དངོས་ཐོག་གི་རང་བཙན་ (de facto) ཤོར་ཡོད་པ་དང་། གྲོས་མཐུན་དོན་ཚན་བཅུ་བདུན་དེ་ནི་ཕྱི་ལོ་ ༡༩༤༩ གོང་ནས་རྒྱ་ནག་གཞུང་གིས་བོད་བཙན་བཟུང་བྱས་པའི་རྗེས་བོད་མིར་འཇིགས་སྐུལ་བཙན་ཤེད་འོག་བཞག་ཏུ་བཅུག་པ་ཞིག་ཡིན་ཞེས་གསལ་འདོན་གནང་ཡོད་པ་མ་ཟད། གྲོས་མཐུན་ནང་ཇི་ལྟར་རྒྱ་ནག་གཞུང་གིས་བོད་མིར་ཁས་ལེན་བྱས་པའི་རང་སྐྱོང་གི་ངོ་བོ་དང་། བོད་མིའི་ཆོས་དད་ལ་སྲུང་སྐྱོབ་བྱ་རྒྱུའི་གྲོས་མཐུན་ལས་འགལ་ཏེ་བཙན་ཤེད་ཀྱིས་བོད་མི་རིགས་འདི་བཞིན་རྒྱ་རིགས་ཅན་ཏུ་བསྒྱུར་རྒྱུའི་སྲིད་བྱུས་འདིང་བཞིན་ཡོད་པ་དང་། བོད་ནང་གི་དགོན་པ་གཏོར་བཤིག དེ་བཞིན་བོད་མིའི་གཞི་རྩའི་ཆོས་དད་རང་དབང་ལ་བརྩི་མེད་རྡོག་རོལ་གཏོང་བཞིན་ཡོད་པ་གསལ་འདོན་གནང་ཡོད།
བསྒྲགས་གཏམ་ནང་། ད་ཆ་བོད་མིའི་ཐུན་མོང་མ་ཡིན་པའི་ཆོས་དང་རིག་གཞུང་། སྐད་ཡིག ཡུལ་སྲོལ་གོམ་གཤིས། དེ་བཞིན་བོད་མིའི་ངོ་བོ་སོགས་རྩ་བརླག་འགྲོ་རྒྱུའི་ཉེན་ཚབས་འོག་ལ་ཡོད་པ་མ་ཟད། གྲོས་མཐུན་ལས་ལྡོག་སྟེ་འགྱུར་བ་ནི་བོད་མིའི་ཆབ་སྲིད་ལམ་ལུགས་དེ་མཐའ་གཅིག་ཏུ་རྩ་མེད་བཟོས་ཡོད། གྲོས་མཐུན་དོན་ཚན་བཅུ་བདུན་དེ་ནི་རྒྱ་ནག་གཞུང་གི་དྲག་པོའི་སྟོབས་ཤུགས་རྒྱ་སྐྱེད་གཏོང་རྒྱུ་ཁོ་ནའི་ཆེད་དུ་ཡིན་པ་ལས་བོད་ནང་ཞི་མཐུན་མཉམ་གནས་ཡོང་ཐབས་བྱ་རྒྱུའི་ཆེད་མིན་ཞེས་འཁོད་ཡོད།
དེ་བཞིན་བསྒྲགས་གཏམ་ནང་། གཉིས་སྨན་དབུ་མའི་ལམ་གྱི་སྲིད་བྱུས་ནི་མ་འོངས་པར་དཀལ་རྙོག་རིགས་མི་ཡོང་བའི་གོ་སྐབས་བཟང་པོ་ཡིན་པར་བསྔགས་བརྗོད་གནང་ཡོད་པ་དང་། འཇར་མན་གྲོས་ཚོགས་ཀྱི་འགྲོ་བ་མིའི་ཐོབ་ཐང་ཚོགས་ཆུང་གིས་བོད་མིའི་འཚེ་མེད་ཞི་བའི་ཐབས་ལམ་ཐོག་རང་སྲིད་རང་སྐྱོང་ཐོབ་ཐབས་ལ་སྔར་ལྷག་རྒྱབ་སྐྱོར་གནང་རྒྱུ་ཡིན་པ་འཁོད་ཡོད།
འཇར་མན་གྲོས་ཚོགས་ཀྱི་འགྲོ་བ་མིའི་ཐོབ་ཐང་ཚོགས་ཆུང་གིས་རྒྱ་ནག་གཞུང་ནས་འགྲོ་བ་མིའི་ཐོབ་ཐང་བརྩི་མེད་རྡོག་རོལ་ཚབས་ཆེན་གཏོང་བཞིན་པར་སྐྱོན་བརྗོད་དྲག་པོ་བྱས་པ་དང་སྦྲགས། རྒྱ་ནག་གཞུང་གིས་བོད་ནང་དྲག་གནོན་བྱེད་བཞིན་འཕྲལ་དུ་མཚམས་འཇོག་བྱེད་དགོས་པ་དང་། བོད་རྒྱ་འབྲེལ་མོལ་བསྐྱར་གསོ་དགོས་པའི་འབོད་སྐུལ་ཞུ་གནང་ཡོད་པ་མ་ཟད། རྒྱལ་སྤྱིའི་ཚོགས་སྡེ་ཁག་གིས་བོད་མིའི་འཚེ་མེད་ཞི་བའི་འཐབ་རྩོད་ལ་རྒྱབ་སྐྱོར་ཡོང་བའི་རེ་སྐུལ་ཞུས་ཡོད།
མཐའ་དོན་བསྒྲགས་གཏམ་ནང་། འཇར་མན་གྲོས་ཚོགས་ཀྱི་འགྲོ་བ་མིའི་ཐོབ་ཐང་ཚོགས་ཆུང་གིས་རྒྱ་ནག་གཞུང་ནས་འགྲོ་བ་མིའི་ཐོབ་ཐང་བརྩི་མེད་རྡོག་རོལ་གཏོང་བཞིན་པར་མུ་མཐུད་སྐྱོན་བརྗོད་ནན་མོ་བྱས་ཏེ། རྒྱ་ནག་ནང་འགྲོ་བ་མིའི་ཐོབ་ཐང་གི་གནས་སྟངས་ཡར་རྒྱས་ཡོང་བ་བྱ་རྒྱུ་ཁས་ལེན་གནང་ཡོད།
བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་གིས་འཇར་མན་གྲོས་ཚོགས་ཀྱི་འགྲོ་བ་མིའི་ཐོབ་ཐང་ཚོགས་ཆུང་ནས་བསྒྲགས་གཏམ་སྤེལ་བར་དགའ་བསུ་དང་འབྲེལ་རྒྱ་ནག་གཞུང་གིས་ལོ་རྒྱུས་ལ་འཁྱོག་བཤད་བྱེད་ཀྱི་ཡོད་ཀྱང་དྲང་བདེན་ནི་ནམ་ཡང་འགོག་ཐབས་བྱེད་མི་ཐུབ། རྒྱ་ནག་གཞུང་གིས་གཞི་རྒྱ་ཆེ་བའི་དམག་དོན་འོག་བོད་མིར་བཙན་ཤེད་ཀྱིས་གྲོས་མཐུན་དོན་ཚན་བཅུ་བདུན་བཞག་བཅུག་སྟེ། ལོ་བཅུ་ཕྲག་ཁ་ཤས་རིང་བོད་ནང་སྡུག་རྩུབ་མནར་གཅོད་ལག་བསྟར་བྱས་ཡོད།
ད་ལན་ངས་བོད་མི་ཡོངས་ཀྱི་ཚབ་ཞུས་ཏེ་འཇར་མན་གྲོས་ཚོགས་ཀྱི་འགྲོ་བ་མིའི་ཐོབ་ཐང་ཚོགས་ཆུང་གིས་བོད་ཀྱི་འགྲོ་བ་མིའི་ཐོབ་ཐང་ལ་རྒྱབ་སྐྱོར་གནང་བ་དང་། བོད་ནི་ནམ་ཡང་རྒྱ་ནག་གི་ཆ་ཤས་ཤིག་མིན་པ་དང་དབུ་མའི་ལམ་གྱི་སྲིད་བྱུས་འོག་གྲོས་མོལ་བྱེད་དགོས་པའི་ང་ཚོའི་འབོད་སྒྲ་ལ་རྒྱབ་སྐྱོར་གནང་བར་ཐུགས་རྗེ་ཆེ་ཞུ་རྒྱུ་ཡིན་ཞེས་གསུངས།
སུད་སིའི་སྐུ་ཚབ་དོན་གཅོད་འཆི་མེད་རིག་འཛིན་ལགས་ཀྱིས་ཇར་མན་གྲོས་ཚོགས་ཀྱི་འགྲོ་བ་མིའི་ཐོབ་ཐང་ཚོགས་ཆུང་གི་ཚོགས་མི་རྣམས་ལ་ཐུགས་རྗེ་ཆེ་ཞུའི་ཕྱག་བྲིས་ཤིག་བཏང་གནང་སྟེ། ཁོང་ཚོས་བསྒྲགས་གཏམ་དེ་ལ་འོས་ཤོག་འཕངས་ནས་རྒྱབ་སྐྱོར་གནང་བར་ཐུགས་རྗེ་ཆེ་ཞུས་ཡོད་པ་བཅས། །
