༄༅། །རྒྱ་གར་རྒྱལ་ཡོངས་ནང་ཏོག་དབྱིབས་གཉན་རིམས་ཀྱི་ནད་རླབས་གཉིས་པའི་ཛ་དྲག་གནས་སྟངས་ཐོན་བཞིན་ཡོད་པ་དང་། ཏོག་དབྱིབས་གཉན་རིམས་ཀྱི་རྐྱེན་པས་ཉེ་བའི་ཆར་རྒྱ་གར་ནང་མི་སྟོང་ཕྲག་ཁ་ཤས་འདས་གྲོངས་སུ་ཕྱིན་ཡོད་པ་མ་ཟད། ནད་གཞི་གསར་པ་ཕོག་མཁན་མི་ཁྲི་བརྒྱ་ལྷག་བྱུང་སྟེ་རྒྱ་གར་གྱི་འཕྲོད་བསྟེན་མ་ལག་ཁག་ལ་དཀའ་ངལ་འཕར་མ་ཞིག་ཕྲད་བཞིན་ཡོད་པའི་སྐབས་འདིར། བོད་མིའི་སྒྲིག་འཛུགས་བཀའ་ཤག་ནས་རང་ཅག་བཙན་བྱོལ་བོད་མི་ཡོངས་ཀྱི་ངོས་ནས་རྒྱ་གར་གཞུང་དང་མི་མང་ལ་བཀའ་དྲིན་རྗེས་དྲན་དང་། ཐུགས་གསོ། གདུང་སེམས་མཉམ་སྐྱེ་བཅས་མཚོན་ཕྱིར། རྒྱ་གར་གྱི་སྲིད་བློན་མཆོག་གི་ཛ་དྲག་གུད་སྐྱོབ་མ་དངུལ་ ( PM-CARES Fund) དུ་རྒྱ་མཚོ་ཆུ་ཐིགས་ཀྱི་ཞལ་འདེབས་རྒྱ་མི་ཆུང་བ་ཞིག་འཕྲལ་འབུལ་ཞུ་རྒྱུ་གལ་ཆེར་མཐོང་ཞེས་ལམ་སྟོན་ཕེབས་པ་བཞིན་བྱང་ཨ་རི་ཁུལ་དུ་གནས་སྡོད་བོད་མི་རྣམས་ཀྱིས་བོད་མིའི་སྒྲིག་འཛུགས་བརྒྱུད་རྒྱ་གར་གྱི་སྲིད་བློན་མཆོག་གི་ཛ་དྲག་གུད་སྐྱོབ་མ་དངུལ་དུ་ཞལ་འདེབས་ཕུལ་ཡོད།

དེ་ཡང་ཨ་རི་ཁུལ་གྱི་བོད་རིགས་སྤྱི་མཐུན་ཚོགས་པ་ཁག་ནས་ཨ་སྒོར་ ༢༢༢༤༥༦།༠༠ དང་། ཁེ་ན་ཌ་ཁུལ་གྱི་བོད་མི་རྣམས་ནས་ཁེ་ན་ཌ་སྒོར་ ༩༠༥༤༣།༢༥ བཅས་རྒྱ་གར་གྱི་སྲིད་བློན་མཆོག་གི་ཛ་དྲག་གུད་སྐྱོབ་མ་དངུལ་དུ་ཞལ་འདེབས་ཕུལ་ཡོད།

གཞན་ཡང་བྱང་ཨ་རིའི་སྐུ་ཚབ་དོན་གཅོད་དངོས་གྲུབ་ཚེ་རིང་ལགས་ཀྱིས་རྒྱ་གར་གྱི་ཨ་རིའི་གཞུང་ཚབ་ཆེན་མོ་སྐུ་ཞབས་ཏཱ་རཱན་ཇིཏ་སིངྒ་སཱན་འདུ་ (Taranjit Singh Sandhu) ལགས་དང་། རྒྱ་གར་གྱི་ཁེ་ན་ཌའི་ཆེ་མཐོའི་དོན་གཅོད་སྐུ་ཞབས་ཨ་ཇེ་བྷི་སཱ་རི་ཡ་ Ajay Bisaria ལགས་རྣམ་གཉིས་ལ་ཕྱག་བྲིས་ཤིག་ཕུལ་ཡོད་པ་དང་། ཕྱག་བྲིས་ནང་བྱང་ཨ་རི་ཁུལ་གྱི་བོད་མི་ཡོངས་ཀྱི་ཚབ་ཞུས་ཏེ་རྒྱ་གར་གཞུང་དང་མི་མང་ལ་གདུང་སེམས་མཉམ་སྐྱེ་དང་། སྔར་བྱུང་མྱོང་མེད་པའི་ནད་ཡམས་འདིའི་ཁྲོད་ནས་མགྱོགས་མྱུར་དྲག་སྐྱེད་ཡོང་བའི་རེ་བ་དང་སྨོན་ལམ་ཡོད་ཅེས་འཁོད་ཡོད་པ་བཅས། །