༄༅། །ཕྱི་ལོ་ ༢༠༡༩ ཟླ་ ༩ ནང་དུ་རྒྱ་ནག་གཞུང་གི་མི་ལོ་བདུན་ཅུ་འཁོར་བའི་རྒྱལ་སྟོན་དུས་ཆེན་ཟེར་བ་ཚོགས་ལ་ཉེ་བའི་སྐབས་སུ། ཤག་རོང་པོ་ཁུལ་གེ་སོ་སྲ་བྷ་གྲོང་ནས་ཡིན་པ་ནོར་བཟང་ལགས་དང་གེ་སོ་ཚ་ལྷིས་གྲོང་ནས་ཡིན་པའི་མི་སྣ་འགའ་བཅས་སྟར་ཆེན་ཤང་དུ་སློབ་གསོའི་འཛིན་གྲྭར་འགྲོ་དགོས་ཚུལ་བཤད་དེ་རྒྱ་ནག་དམར་གཞུང་གི་ཆེད་མངགས་མི་སྣས་བཙན་ཁྲིད་བྱས་ཡོད།

རྗེས་སུ་རྒྱ་གཞུང་གིས་གཞན་རྣམས་རིམ་བཞིན་གློད་བཀྲོལ་བཏང་ཡོད་ནའང་ནོར་བཟང་ལགས་གློད་བཀྲོལ་བཏང་མེད། ཤག་རོང་པོ་ཁུལ་དུ་དྲྭ་རྒྱའི་དམ་བསྒྲགས་ཧ་ཅང་ཆེ་བས་ལོ་གཉིས་མ་ཟིན་ཙམ་ལ་ནོར་བཟང་ལགས་ཀྱི་གནས་ཚུལ་གོ་ཐོས་མེད་པར་དེ་མུར་ལྷག་ཡོད་ནའང་ད་ལྟའི་ཆར་གནས་ཚུལ་ཤེས་གསལ་ལྟར་ན། ནོར་བཟང་ལགས་ཕྱི་ལོ་ ༢༠༡༩ ལོར་ཆབ་སྲིད་ཀྱི་ཉེས་མིང་འོག་བཙན་ཁྲིད་བྱེད་སྐབས་སྟར་ཆེན་ཤང་དུ་རྒྱ་དམར་གྱི་སྲིད་གཞུང་མི་སྣས་ཚད་ལས་འདས་པའི་རྡུང་རྡེག་མནར་གཅོད་འོག་རྐྱེན་ལམ་དུ་བཏང་འདུག 

འོན་ཀྱང་སྐབས་དེའི་དུས་སྲིད་གཞུང་མི་སྣས་བརྗོད་གསལ་ལ་ནོར་བཟང་ནི་བུ་ལོན་ཆེན་པོ་ཡོད་པར་བརྟེན་བུ་ལོན་གྱི་རྐྱེན་པས་ཁོ་རང་ཤག་ཆུའི་ཟམ་པའི་སྒང་ནས་མཆོངས་ཏེ་འདས་གྲོངས་སུ་སོང་བ་ཡིན་ཚུལ་བསྒྲགས་འདུག དོན་དངོས་སུ་ནོར་བཟང་ལགས་ནི་བུ་ལོན་སྣ་གཅིག་མེད་པར་མ་ཟད་རང་གི་འཚོ་བའི་མཐུན་རྐྱེན་དང་ཕྱིའི་དངོས་པོ་སོགས་གང་ཅིའི་ཐོག་ཡག་པོ་ཡིན་པར་འགྲེལ་བརྗོད་གནང་མཁན་འདུག 

དོན་དངོས་སུ་རྒྱ་གཞུང་གི་མི་སྣས་རྡུང་རྡེག་ཚད་ལས་འདས་པ་བཏང་ནས་ཁ་ཐུག་དམར་གསོད་བཏང་རྗེས་མི་མང་ལ་མགོ་སྐོར་གཏོང་ཐབས་ཀྱིས་རང་ཤི་རྒྱབ་ཚུལ་བརྗོད་པ་དང་། ཡང་ན་སྲིད་གཞུང་མི་སྣས་བཙན་དབང་གི་མནར་གཅོད་ཚད་ལས་འདས་པར་བཏང་མཐར་ངོ་རྒོལ་གྱིས་ཤག་ཆུར་མཆོངས་ནས་སྐུ་སྲོག་བཏང་བ་ཡིན་པའི་གནད་དོན་དེ་གཉིས་གང་རུང་ཞིག་གཏན་ཁེལ་རེད་འདུག 

ཡིན་ནའང་ཁུལ་དེར་ཧ་ཅང་གི་དམ་དྲག་ཆེ་བ་དང་། ལྷག་པར་ནོར་བཟང་ལགས་རྐྱེན་འདས་སྐབས་ཡུལ་མི་ཚོའི་དྲྭ་རྒྱ་བཀག་སྡོམ་བྱས་པར་བརྟེན་གནས་ཚུལ་དེ་གཉིས་ག་རེ་ཡིན་པ་གསལ་པོར་ཤེས་ཐུབ་ཀྱི་མེད།

དེའི་དུས་སུ་ཉེན་རྟོག་པའི་རླངས་འཁོར་ལྔ་དྲུག་ཙམ་ནོར་བཟང་ཡོད་སའི་སྲ་བྷ་གྲོང་ཚོར་སླེབས་ནས་ནོར་བཟང་གི་ཁྱིམ་དུ་ཉིན་གྲངས་མང་པོར་བསྔོགས་བཤེར་དང་ཁོང་གི་བཟའ་ཟླ་ལ་ཡང་སུན་གཙེར་ཡང་ཡང་བཟོས་ཡོད།

སྐབས་དེར་བཟའ་ཟླའི་ཁོག་ཏུ་ཕྲུ་གུ་ཡོད་པ་དང་ནོར་བཟང་ལགས་རྐྱེན་འདས་སུ་སོང་བར་བརྟེན། ཚད་ལས་འདས་པའི་སྡུག་བསྔལ་གྱིས་སྨྱོན་པ་ཆགས་གྲབས་བྱས་པའི་སྐད་ཆ་ཡང་འདུག་པ་མ་ཚད་ད་ལྟའི་ཆར་ཡང་ནོར་བཟང་གི་བཟའ་ཟླ་དང་ཤུལ་ལུས་ཀྱི་བྱིས་པ་ཚོ་ཡང་ཧ་ཅང་ཡ་ང་བའི་གནས་སྟངས་སུ་གྱུར་ཡོད་པའི་གནས་ཚུལ་འདུག

ནོར་བཟང་ལགས་ནི་རྒྱུན་དུ་སྲིད་གཞུང་གི་ཆེད་མངགས་མི་སྣས་ཆབ་སྲིད་དྲིལ་བསྒྲགས་དང་། དེ་བཞིན་བོད་མི་རྣམས་ལ་བདེ་སྐྱིད་དང་རང་དབང་ཡོད་ཚུལ་ཀྱི་འཁྲབ་སྟོན། བོད་མི་སོ་སོའི་སྡོད་ཁྱིམ་དུ་རྒྱ་ནག་དམར་པོའི་སྲིད་གཞུང་གི་མགོ་ཁྲིད་ལྔའི་པར་སྒྲིག་བཤོམ་བྱེད་དུ་བཅུག་པ་དང་། དེ་ཡང་མཐོ་སར་སྒྲིག་དགོས་པའི་བཙན་དབང་དང་དར་དམར་སྒྲེང་འཛུགས་བྱེད་དུ་བཅུག་པ་རྣམས་ལ་དང་ལེན་བྱེད་ཀྱི་མེད་པ་དང་། བོད་མི་རིགས་ཀྱི་ལ་རྒྱ་དང་སྤྱི་ནོར་༸གོང་ས་༧སྐྱབས་མགོན་ཆེན་པོ་མཆོག་ལ་དད་འདུན་འགྱུར་བ་མེད་པ་མངོན་གསལ་དོད་པོའི་ལྟ་བ་དང་ལངས་ཕྱོགས་འཛིན་ཕོད་པའི་མི་སྣ་ཞིག་རེད་འདུག ཁོང་གི་ཕའི་མིང་ལ་བསོད་ནམས་དབྱངས་དགའ་དང་། མའི་མིང་ལ་གངས་ཆུང་ཟེར་གྱི་ཡོད།  གཞན་ཡང་ནོར་བཟང་ལགས་ནི་བྱིས་པ་དྲུག་གི་ཕ་ཡིན་པ་དང་དགུང་ལོ་ ༣༥ ཙམ་རེད་འདུག

གཞན་ཡང་ཤག་རོང་པོའི་ཁུལ་དུ་རྒྱ་གཞུང་མི་སྣས་ཕྱི་རྒྱལ་ལ་འབྲེལ་བ་ཡོད་མེད་ཐོག་ཏུ་དམིགས་བསལ་ཡུལ་མི་རྣམས་ལ་ཞིབ་བཤེར་གྱིས་དྲི་རྩད་གཏོང་བ་དང་། དོགས་ཡོད་བྱུང་ཚེ་ཁ་པར་དང་སྡོད་ཁྱིམ་སོགས་སུ་བསྔོགས་བཤེར་བྱས་ཏེ་སུན་གཙེར་སྣ་ཚོགས་བཟོ་བཞིན་ཡོད་པ་དང་། སྲིད་གཞུང་མི་སྣས་ཁོང་ཚོ་ནི་ཁ་བྲལ་བ་ཡིན་པས་འབྲེལ་བ་ཡོད་ན་མཇུག་འབྲས་ངན་པ་ཡོང་རྒྱུ་ཡིན་པའི་འཇིགས་སྐུལ་ཡང་ཡང་བྱེད་བཞིན་ཡོད། །