༄༅། །ཕྱི་ལོ་ ༢༠༢༡ ཟླ་ ༥ ཚེས་ ༢༨ རེས་གཟའ་པ་སངས་ཉིན་གྱི་སྔ་དྲོར་སྲིད་སྐྱོང་ཟུར་པ་བློ་བཟང་སེངྒེ་མཆོག་གིས་གཙོས་ཕྱག་སྦྲེལ་བཀའ་བློན་རྣམ་པས་ཇི་ལྟར་སྔོན་ནས་གསོལ་འདེབས་ཞུས་དོན་བཞིན་བཀའ་བཞེས་བཟང་པོ་སྨིན་སྩལ་གྱིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དྲ་ལམ་བརྒྱུད་བོད་མིའི་སྒྲིག་འཛུགས་ཀྱི་སྲིད་སྐྱོང་ཟུར་པ་བློ་བཟང་སེངྒེ་མཆོག་གིས་གཙོས་བཀའ་ཤག་སྐབས་བཅོ་ལྔ་པའི་བཀའ་བློན་རྣམ་པར་དམིགས་བསལ་མཇལ་ཁ་དང་བཀའ་སློབ་བཀའ་དྲིན་སྩལ་འདུགདེ་ཡང་སྐབས་དེར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བོད་མིའི་སྒྲིག་འཛུགས་ཀྱི་སྲིད་སྐྱོང་ཟུར་པ་བློ་བཟང་སེངྒེ་མཆོག་གིས་གཙོས་བཀའ་ཤག་སྐབས་བཅོ་ལྔ་བའི་བཀའ་བློན་རྣམ་པས་ཧུར་ཐག་གིས་ཞབས་འདེགས་བསྒྲུབས་པར་རྗེས་སུ་ཡི་རང་དང་། ད་དུང་ཡིན་ཡང་སེམས་ཤུགས་མ་ཆག་པར་མུ་མཐུད་བོད་སྤྱིའི་དོན་དུ་ཞབས་ཞུ་ཧུར་ཐག་གིས་ཞུ་དགོས། ཞེས་དང་། མགོན་པོ་གང་ཉིད་མཆོག་དགུང་ལོ་མཐོན་པོར་ཕེབས་ཡོད་པའི་ཆ་ནས་ཕྱི་རྒྱལ་ཡུལ་གྲུ་ཁག་ཏུ་ཆིབས་སྒྱུར་བསྐྱང་རྒྱུ་ཉུང་དུ་བཏང་སྟེ་དུས་ཚོད་མང་བ་རྒྱ་གར་དུ་བསྐྱལ་རྒྱུ་ཡིན། ཞེས་བཀའ་སློབ་སྩལ་ཡོད།

ཕྱོགས་མཚུངས་མགོན་པོ་གང་ཉིད་མཆོག་གིས། ངོས་རང་ལོ་ ༡༡༠ ལྷག་འཚོ་ཐུབ་པའི་སྨོན་ལམ་རྒྱག་གི་ཡོད། ངོས་རང་ཚེ་རིང་པོ་གནས་པ་ཡིན་ན་དེས་གཞིས་བྱེས་བོད་མི་ཡོངས་ལ་ཕན་གྱི་ཡོད། ཅེས་བཀའ་སློབ་སྩལ།གཞན་ཡང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་སྲིད་སྐྱོང་ཟུར་པ་བློ་བཟང་སེངྒེ་མཆོག་གིས་འདས་པའི་ལས་ཡུན་ལོ་བཅུའི་རིང་ཕྱག་ལས་ཧུར་ཐག་གནང་ཡོད་པས་རྗེས་སུ་ཡི་རང་དང་། རྒྱ་གར་གྱི་ནཱ་ལེནྡྲའི་གནའ་བོའི་རིག་གཞུང་དེ་དག་དེང་དུས་སྤྱི་ཚོགས་ནང་དགོས་མཁོ་ཡོད་པ་ཞིག་ཆགས་ཡོད་སྟབས། སྲིད་སྐྱོང་ཟུར་པ་བློ་བཟང་སེངྒེ་མཆོག་གིས་དེའི་ཐད་ཐུགས་ཁུར་མང་ཙམ་བཞེས་དགོས་པ་སོགས་ཀྱི་སྐོར་བཀའ་སློབ་རྗེས་དཔལ་ལྡན་དགའ་ལྡན་ཕོ་བྲང་གི་དྲུང་ཆེ་བརྒྱུད་བོད་མིའི་སྒྲིག་འཛུགས་ཀྱི་སྲིད་སྐྱོང་ཟུར་པ་བློ་བཟང་སེངྒེ་མཆོག་གིས་གཙོས་བཀའ་ཤག་སྐབས་བཅོ་ལྔ་པའི་བཀའ་བློན་རྣམ་པར་སྟོན་པའི་སྐུ་བརྙན་རེ་བཀའ་དྲིན་སྩལ་གནང་ཡོད་པ་བཅས།།