༄༅། །རྒྱ་གར་རྒྱལ་ཡོངས་ནང་ཏོག་དབྱིབས་གཉན་རིམས་ཀྱི་ནད་རླབས་གཉིས་པའི་ཛ་དྲག་གནས་སྟངས་ཐོན་བཞིན་པར་བརྟེན་ཕྱི་ལོ་ ༢༠༢༡ ཟླ་ ༤ ཚེས་ ༢༨ ཉིན་བོད་མིའི་སྒྲིག་འཛུགས་ཀྱི་བཀའ་ཤག་ནས་རྒྱ་གར་གཞུང་མང་གཉིས་ཀྱིས་ཏོག་དབྱིབས་གཉན་རིམས་ཀྱི་ནད་རླབས་གཉིས་པའི་ཛ་དྲག་གི་དཀའ་ཚེགས་ཆེ་བའི་དུས་སྐབས་ལ་གདོང་ལེན་གནང་བཞིན་པ་འདིར་འཛམ་གླིང་གང་སར་བཞུགས་པའི་བཙན་བྱོལ་བོད་མི་ཡོངས་ནས་གདུང་སེམས་མཉམ་སྐྱེ་དང་། རྒྱ་གར་གྱི་སྲིད་བློན་མཆོག་གི་ཛ་དྲག་གུད་སྐྱོབ་མ་དངུལ་དུ་རྒྱ་མཚོ་ཆུ་ཐིགས་ཀྱི་ཞལ་འདེབས་རྒྱ་མི་ཆུང་བ་ཞིག་འཕྲལ་འབུལ་ཞུ་རྒྱུའི་ལམ་སྟོན་ཕེབས་པ་བཞིན། ནུབ་ཡུ་རོབ་ཁུལ་གནས་སྡོད་བོད་མི་རྣམས་ཀྱིས་རྒྱ་གར་གྱི་སྲིད་བློན་མཆོག་གི་ཛ་དྲག་གུད་སྐྱོབ་མ་དངུལ་དུ་གདུང་སེམས་མཉམ་སྐྱེའི་ཞལ་འདེབས་ཕུལ་ཡོད།
དེ་ཡང་ནུབ་ཡུ་རོབ་ཁུལ་གྱི་རྒྱལ་ཁབ་སྦེལ་ཇམ་ནས་ཡུ་སྒོར་ ༡༤༩༦༡།༤༩ དང་། ཕ་རན་སི་ནས་ཡུ་སྒོར་ ༢༠༢༠༧།༠༠ ཧོ་ལེན་ཌི་ནས་ཡུ་སྒོར་ ༨༠༤༦།༠༠ སི་པན་ནས་ཡུ་སྒོར་ ༢༣༡༦།༠༠ བཅས་ཁྱོན་ནུབ་ཡུ་རོབ་ཁུལ་གྱི་བོད་མི་རྣམས་ཀྱིས་རྒྱ་གར་སྲིད་བློན་མཆོག་གི་ཛ་དྲག་གུད་སྐྱོབ་མ་དངུལ་དུ་ཡུ་སྒོར་ ༤༥༥༣༠།༤༩ ཐམ་པ་ཞལ་འདེབས་ཕུལ་ཡོད།
སྦེལ་ཇམ་སྐུ་ཚབ་དོན་གཅོད་བཀྲ་ཤིས་ཕུན་ཚོགས་ལགས་ཀྱིས་ད་ལམ་རྒྱ་གར་སྲིད་བློན་མཆོག་གི་ཛ་དྲག་གུད་སྐྱོབ་མ་དངུལ་ལ་ཞལ་འདེབས་འབུལ་རྒྱུའི་འབོད་སྐུལ་གསལ་བསྒྲགས་ཀྱི་དུས་ཚོད་ཧ་ཅང་ཐུང་མོད་ཡུ་རོབ་ཁུལ་གྱི་བོད་མི་རྣམས་ཀྱིས་ཞལ་འདེབས་ཧ་ལས་པའི་ཡག་པོ་ཕུལ་སོང་ཞེས་དང་། ད་ལན་ངས་སྦེལ་ཇམ་དང་པེ་རི་སིར་ཡོད་པའི་སྐུ་ཚབ་དོན་ཁང་གི་ལས་བྱེད་རྣམ་པ་དང་། ཡུ་རོབ་ཁུལ་གྱི་བོད་པའི་ཚོགས་སྡེ་ཁག་གི་འགོ་ཁྲིད་རྣམ་པ། དེ་བཞིན་ཚོགས་པ་སྐྱིད་སྡུག་ཁག་དང་མི་སྒེར་ཚང་མས་འབད་བརྩོན་ཆེན་པོས་ཞལ་འདེབས་ཕུལ་བར་ཐུགས་རྗེ་ཆེ་ཞུ་རྒྱུ་ཡིན་ཞེས་གསུངས་ཡོད་པ་བཅས། །
