༄༅། །ཉི་ཧོང་གིས་རྒྱལ་ཡོངས་སུ་གསེར་གྱི་བདུན་ཕྲག་ཅེས་ལོ་འཁོར་བདུན་ཕྲག་གི་གུང་སེང་སྲུང་བརྩི་ཞུ་བཞིན་པ་དང་བསྟུན། ཉི་ཧོང་གི་རྒྱལ་ས་ཊོ་ཀི་ཡོ་ནང་རྟེན་གཞི་བྱས་པའི་ཉི་ཧོང་སྐུ་ཚབ་དོན་ཁང་གི་གོ་སྒྲིག་འོག་ཉི་ཧོང་བ་དང་བོད་མི་ཚོས་ཕྱི་ལོ་ ༢༠༢༡ ཟླ་ ༥ ཚེས་ ༢ ནས་ ༥ བར་ཉིན་གྲངས་བཞིའི་རིང་དྲ་ལམ་བརྒྱུད་བོད་ཀྱི་དུས་སྟོན་སྲུང་བརྩི་ཞུས་ཡོད།
དེ་ཡང་བོད་ཀྱི་དུས་སྟོན་དབུ་འབྱེད་མཛད་སྒོའི་ཐོག་ཉི་ཧོང་སྐུ་ཚབ་དོན་གཅོད་ཨརྱ་ཚེ་དབང་རྒྱལ་པོ་ལགས་ཀྱིས་བོད་ཀྱི་དུས་སྟོན་སྲུང་བརྩི་ཞུ་དགོས་པའི་དམིགས་ཡུལ་གཙོ་བོ་ནི། བོད་ཀྱི་ཐུན་མོན་མིན་པའི་ཆོས་དང་རིག་གཞུང་ཕྱུག་པོ་དེ་སྲུང་བརྩི་དང་འབྲེལ་བོད་ཀྱི་ལོ་རྒྱུས་ངོ་སྤྲོད། དེ་བཞིན་བོད་དོན་སླད་གཡོ་བ་མེད་པར་རྒྱབ་སྐྱོར་དང་ཐུགས་ཁུར་གནང་བཞིན་པའི་ཉི་ཧོང་གཞུང་མང་གཉིས་ལ་ཐུགས་རྗེ་ཆེ་ཞུ་ཆེད་ཡིན། ཞེས་དང་། བོད་ཀྱི་དུས་སྟོན་སྲུང་བརྩི་བརྒྱུད་ཉི་ཧོང་བ་དང་བོད་མི་ཚོར་སོ་སོའི་རིག་གཞུང་ཕྱུག་པོ་དེ་ཕན་ཚུན་ངོ་སྤྲོད་སྤེལ་རེས་ཀྱི་གོ་སྐབས་ཡོང་གི་ཡོད་པ་མ་ཟད། ཉི་ཧོང་དང་བོད་གཉིས་དབར་ཆོས་དང་རིག་གཞུང་གི་འབྲེལ་ལམ་ཤུགས་ཆེ་རུ་གཏོང་ཐུབ་ཀྱི་རེད། ཅེས་སོགས་ཀྱི་གསུང་བཤད་གནང་ཡོད།
དེ་རྗེས་ཉི་ཧོང་དུ་ཡོད་པའི་བོད་ཀྱི་ཟློས་གར་ཚོགས་པའི་གཞས་པ་ཟུར་པ་དགེ་བསྙེན་བསྟན་འཛིན་ལགས་དང་བསྟན་འཛིན་ཀུན་བཟང་ལགས། ཨ་རིར་ཡོད་པའི་ཚེ་རིང་ལགས་དང་ཚེ་རིང་གཡུ་སྒྲོན་ལགས། ལྷོ་ཀོ་རི་ཡའི་ནང་ཡོད་པའི་ཁ་རག་སྤེན་པ་ལགས། ཨོ་སི་ཊི་ལི་ཡའི་ནང་ཡོད་པའི་བསྟན་འཛིན་ཆོས་རྒྱལ་ལགས། སུད་སིར་ཡོད་པའི་རྣམ་གླིང་བློ་བསྟན་ལགས། ཉི་ཧོང་བ་ནོ་ཌ་མེ་གུ་མི་( Noda Megumi) ལགས་བཅས་ནས་བོད་ཀྱི་སྲོལ་རྒྱུན་གཞས་སྣ་གཟིགས་འབུལ་ཞུས་ཡོད། ཉིན་གཉིས་པ། ཉི་ཧོང་གི་རྒྱལ་ས་ཊོ་ཀི་ཡོ་ནང་རྟེན་གཞི་བྱས་པའི་པོ་ཏཱ་ལ་མཐོ་སློབ་ཁང་གི་དཀོན་མཆོག་སྲིད་ཐར་ལགས་ཀྱིས་རྡུལ་མཚོན་དཀྱིལ་འཁོར་གྱི་དགོས་དམིགས་དང་གལ་གནད་སྐོར་གསུངས་རྗེས་དྲི་བ་དྲིས་ལན་གནང་ཡོད།
ཉིན་རྒྱབ་ཉི་ཧོང་བོད་ཁང་གི་ལས་བྱེད་བློ་བཟང་དང་འཇིགས་མེད་ལགས་རྣམ་གཉིས་ཀྱིས་བོད་ཀྱི་ཐུན་མོང་མིན་པའི་སྲོལ་རྒྱུན་ཟས་མཆོག་རྩམ་པ་དང་མར། དེ་བཞིན་འཐེན་ཐུག་བཅས་ཀྱི་སྐོར་ངོ་སྤྲོད་གནང་ཡོད།
ཉིན་གསུམ་པ། ཉི་ཧོང་གི་ཀོ་ཡ་སན་མཐོ་སློབ་ (Koyasan University) ཏུ་བོད་བརྒྱུད་ནང་བསྟན་དང་བོད་ཡིག་སློབ་ཁྲིད་གནང་བཞིན་པ་དགེ་བཤེས་བསྟན་འཛིན་འོད་ཟེར་ལགས་ཀྱིས་ནང་པའི་སྒོམ་རྒྱག་སྟངས་དང་ཉམས་ལེན་སྐོར་ངོ་སྤྲོད་གནང་ཡོད། ཉིན་རྒྱབ་རྡ་ས་དང་མ་སུ་རི་བོད་ཁྱིམ།་ སཾ་བྷོ་ཌ་བོད་སློབ། རྟ་དབང་མཉྫུཤྲཱི་དྭ་ཕྲུག་སློབ་གྲྭ་བཅས་ཀྱི་སློབ་ཕྲུག་ཁག་གཅིག་གིས་བརྙན་ཐུང་བརྒྱུད་ཉི་ཧོང་གི་སྦྱིན་བདག་དང་ཕ་ཚབ་རྣམས་ཀྱིས་ཤེས་ཡོན་ཆེད་རོགས་རམ་གནང་བཞིན་པར་ཐུགས་རྗེ་ཆེ་ཞུས་ཡོད།
ཉིན་བཞི་པ། ཉི་ཧོང་སྐུ་ཚབ་དོན་གཅོད་ཨརྱ་ཚེ་དབང་རྒྱལ་པོ་ལགས་ཀྱིས་བོད་ཀྱི་ཆོས་དང་རིག་གཞུང་། ལོ་རྒྱུས། དེ་བཞིན་སྤྱི་ཚོགས་དང་ཚོར་ཤེས། བཟང་སྤྱོད་ཀྱི་སློབ་གསོ་ (SEE Learning ) སོགས་ཀྱི་གལ་གནད་སྐོར་གསུངས་ཡོད།
ཐེངས་འདིའི་དྲ་ཐོག་གི་བོད་ཀྱི་དུས་སྟོན་དེ་བཞིན་ (BlueJeans) དང་། ཉི་ཧོང་བོད་ཁང་གི་ངོ་དེབ་བརྒྱུད་ཐད་གཏོང་ཞུས་ཡོད་པ་དང་། སྐབས་དེར་ངོ་དེབ་བརྒྱུད་བོད་ཀྱི་དུས་སྟོན་ཐད་གཏོང་ལ་གཟིགས་མཁན་ཉི་ཧོང་བ་ཚོས་དུས་སྟོན་དེར་ཧ་ཅང་དགའ་མོས་གནང་ཡོད་པ་མ་ཟད། དེ་ལྟ་བུའི་དུས་སྟོན་ནི་བོད་ཀྱི་ཆོས་དང་རིག་གཞུང་སྦྱང་བར་གོ་སྐབས་རྩ་ཆེན་པོ་རེད། ཅེས་དང་། ཏོག་དབྱིབས་གཉན་རིམས་ཀྱིས་རྐྱེན་པས་གསེར་གྱི་བདུན་ཕྲག་གི་གུང་སེང་སྐབས་ཕྱི་ལ་འགྲོ་ཐུབ་ཀྱི་མེད་པའི་སྐབས་འདིར་ཉི་ཧོང་དོན་ཁང་གིས་དྲ་ལམ་བརྒྱུད་བོད་ཀྱི་དུས་སྟོན་གོ་སྒྲིག་གནང་བར་ཐུགས་རྗེ་ཆེ་ཞུས་གནང་ཡོད། བོད་ཀྱི་དུས་སྟོན་གཟིགས་མཁན་གཞན་ཁག་གཅིག་གིས། སྒོམ་རྒྱག་སྟངས་དང་དབུགས་གཏོང་ལེན་སྐོར་ངོ་སྤྲོད་གནང་བ་དེས་སོ་སོའི་ཉིན་རེའི་འཚོ་བའི་ནང་ཉམས་ལེན་བྱེད་པར་ཕན་ཐོགས་པོ་བྱུང་། ཞེས་གསུངས།།
