༄༅། །ཕྱི་ལོ་ ༢༠༢༡ ཟླ་ ༥ ཚེས་ ༢༤ ཉིན་ཨིན་ཡུལ་རྒྱལ་ཡོངས་ཆབ་སྲིད་ཚོགས་པའི་གྲོས་ཚོགས་བོད་དོན་རྒྱབ་སྐྱོར་ཚོགས་པས་རྒྱ་ནག་གིས་བོད་ཐོག་འཛིན་བཞིན་པའི་དྲག་གནོན་ཅན་གྱི་འཐབ་ཇུས་གསར་པའི་སྐོར་གྲོས་བསྡུར་གནང་སྐབས་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་ལ་ཆེ་བསྟོད་ཀྱི་འཚམས་འདྲི་ཞུས་གནང་འདུག
དེ་ཡང་ཨིན་ཡུལ་རྒྱལ་ཡོངས་ཆབ་སྲིད་ཚོགས་པའི་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཟུང་སྦྲེལ་ཚོགས་གཙོ་སྐུ་ཞབས་ཊིམ་ལོབ་ཊོན་ (Tim Loughton) མཆོག་གི་གཙོ་སྐྱོང་འོག་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་དང་། ཨིན་ཡུལ་གྲོས་ཚོགས་འཐུས་མི་ཁིར་སི་ལོ་ ( Chris Law) མཆོག ཨིན་ཡུལ་གྲོས་ཚོགས་འཐུས་མི་ན་ཝན་ཌུ་མི་ཤིས་ར་ (Navendu Mishra) མཆོག ཨིན་ཡུལ་གྲོས་ཚོགས་འཐུས་མི་ཀེ་རེ་མེག་ཁར་ཐེ་ (Kerry McCarthy) མཆོག ཨིན་ཡུལ་གྲོས་ཚོགས་འཐུས་མི་ཝེ་ར་ (Wera Hobhouse) མཆོག ཨིན་ཡུལ་སྐུ་ཚབ་དོན་གཅོད་ཕར་སི་བསོད་ནམས་ཚེ་རིང་ལགས། སྐུ་ཞབས་ཇོན་ཇོན་སི་ (John Jones) ལགས། བོད་ཀྱི་དྲང་བདེན་ལས་ཁུངས་ཀྱི་འགྲོ་བ་མིའི་ཐོབ་ཐང་ཞུ་གཏུག་པ་གྷོ་རི་ཡ་ (Goria Montgomery) ལགས། ཨིན་ཡུལ་སྐུ་ཚབ་དོན་གཅོད་ཁང་གི་དྲུང་ཆེ་ཚེ་རིང་མཚོ་མོ་ལགས་བཅས་མཉམ་ཞུགས་གནང་ཡོད།
ཐོག་མར་ཨིན་ཡུལ་གྲོས་ཚོགས་འཐུས་མི་སྐུ་ཞབས་ཊིམ་ལོབ་ཊོན་མཆོག་གིས་ཚོགས་འདུར་མཉམ་ཞུགས་གནང་མཁན་ཡོངས་ལ་ཕེབས་བསུ་ཞུས་པ་དང་སྦྲགས་ཚོགས་འདུའི་གྲོས་གཞི་ཁག་ངོ་སྤྲོད་དང་། དེ་བཞིན་དཔལ་ལྡན་སྲིད་སྐྱོང་མཆོག་ལ་ཆེ་བསྟོད་ཀྱི་འཚམས་འདྲི་གནང་ཡོད། གྷོ་རི་ཡ་ལགས་ཀྱིས་འདི་ལོ་ཕྱི་ཟླ་ ༣ ཟླ་མཇུག་ཏུ་བོད་དོན་ཞུ་གཏུག་པ་ཐུན་མོང་གིས་བཏོན་པའི་བོད་ཀྱི་བྱིས་པའི་ཐོབ་ཐང་དང་། ངལ་རྩོལ་བ། ཆོས་དད་རང་དབང་བཅས་ཀྱི་སྙན་ཐོོའི་སྐོར་གསུང་བཤད་གནང་གྲུབ་མཚམས་ཨིན་ཡུལ་གྲོས་ཚོགས་འཐུས་མི་རྣམ་པས་དྲི་བ་དྲིས་ལན་གནང་ཡོད།
སྐུ་ཞབས་ཊིམ་ལོབ་ཊོན་མཆོག་གིས། དཔལ་ལྡན་སྲིད་སྐྱོང་མཆོག་གིས་ལས་ཡུན་ལོ་བཅུའི་རིང་ལས་དོན་རྣམས་ཧ་ཅང་ཚགས་ཚུད་ངང་བསྒྲུབས་ཡོད་པ་དང་། དཔལ་ལྡན་སྲིད་སྐྱོང་མཆོག་དང་ལྷན་ལོ་ཤས་རིང་ཕྱག་ལས་གནང་རྒྱུའི་གོ་སྐབས་བྱུང་བའི་སྐོར། དེ་བཞིན་ཁོང་བཞུགས་སྒར་རྡ་སར་ཕེབས་པའི་ཉམས་མྱོང་དང་། དཔལ་ལྡན་སྲིད་སྐྱོང་མཆོག་ཨིན་ཡུལ་གྲོས་ཚོགས་སུ་ཐེངས་གཉིས་ཙམ་ཕེབས་པ་སོགས་ཀྱི་སྐོར་གསུངས།
དཔལ་ལྡན་སྲིད་སྐྱོང་མཆོག་གིས། རྒྱ་ནག་གཞུང་གིས་རྐང་བཙུགས་ནས་བོད་ནང་དམའ་རིམ་སློབ་གྲྭ་དང་མཐོ་འབྲིང་སློབ་གྲྭ་ཁག་ཏུ་བོད་ཀྱི་ཐུན་མོང་མིན་པའི་རིག་གཞུང་ཧན་མི་རིགས་ཀྱི་རིག་གཞུང་དང་ལྷན་མཉམ་བསྲེས་བྱེད་བཞིན་པའི་སྐོར་དང་། ཁྱེད་རྣམ་པས་རྒྱ་ནག་ལ་བཅོས་བསྒྱུར་མ་བྱེད་པ་ཡིན་ན། རྒྱ་ནག་གིས་ཚུར་བཅོས་བསྒྱུར་བྱེད་ངེས་ཡིན་པ་སོགས་ཀྱི་སྐོར་གསུངས།
གཞན་ཡང་དཔལ་ལྡན་སྲིད་སྐྱོང་མཆོག་གིས་རྒྱ་ནག་ལ་མང་གཙོ་དང་། བོད་ལ་རང་དབང་ཐོབ་ཐབས་སུ་ཨིན་ཡུལ་གྲོས་ཚོགས་འཐུས་མི་རྣམ་པས་རྒྱབ་སྐྱོར་གནང་དགོས་པ་ཧ་ཅང་གལ་ཆེན་པོ་ཡིན་པའི་སྐོར་དང་། བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་མགྱོགས་མྱུར་བོད་ཀྱི་རྒྱལ་ས་ལྷ་སར་གདན་འདྲེན་ཞུ་རྒྱུ་ནི་ང་ཚོའི་རེ་བ་ཡིན། ཞེས་དང་། ཨིན་ཡུལ་གྲོས་ཚོགས་འཐུས་མི་རྣམ་པས་མུ་མཐུད་བོད་མིའི་སྒྲིག་འཛུགས་དང་བོད་དོན་ལ་རྒྱབ་སྐྱོར་གནང་རོགས་ཞེས་གསུངས།
ཨིན་ཡུལ་གྲོས་ཚོགས་འཐུས་མི་ཁིར་སི་ལོ་ ( Chris Law) མཆོག་གིས། དཔལ་ལྡན་སྲིད་སྐྱོང་མཆོག་གིས་ལས་ཡུན་ལོ་བཅུའི་རིང་བོད་ཀྱི་རང་དབང་དང་འགྲོ་བ་མིའི་ཐོབ་ཐང་ཆེད་དུ་ལས་འགུལ་སྤེལ་གནང་ཡོད་པ་དང་། དཔལ་ལྡན་སྲིད་སྐྱོང་མཆོག་ལ་ཐུགས་རྗེ་ཆེ་ཞུ་རྒྱུ་ཡིན། ཞེས་དང་། བོད་དོན་སླད་མུ་མཐུད་རྒྱབ་སྐྱོར་གནང་རྒྱུ་ཡིན་པ་ཁས་ལེན་གནང་ཡོད། ཨིན་ཡུལ་སྐུ་ཚབ་དོན་གཅོད་ཕར་སི་བསོད་ནམས་ཚེ་རིང་ལགས་ཀྱིས་མཇུག་སྡོམ་གསུང་བཤད་གནང་བ་དང་འབྲེལ་ཨིན་ཡུལ་གྲོས་ཚོགས་ཀྱི་འཐུས་མི་རྣམ་པས་བོད་མིའི་སྒྲིག་འཛུགས་ཀྱི་བདམས་ཐོན་སྲིད་སྐྱོང་མཆོག་ལ་རྒྱབ་སྐྱོར་གནང་བའི་རེ་སྐུལ་ཞུས་ཡོད། སྐུ་ཞབས་ཊིམ་ལོབ་ཊོན་མཆོག་གིས་གཞུང་འབྲེལ་ཐོག་བོད་མིའི་སྒྲིག་འཛུགས་ཀྱི་བདམས་ཐོན་སྲིད་སྐྱོང་སྤེན་པ་ཚེ་རིང་མཆོག་ལ་ཡིག་ཐོག་ནས་འཚམས་འདྲི་ཞུ་རྒྱུ་ཡིན། ཞེས་གསུངས།།
