༄༅། །ཕྱི་ལོ་ ༢༠༢༡ ཟླ་ ༥ ཚེས་ ༢༡ ཉིན་མདོ་ཁམས་སྦྲ་སོག་འབྲི་གསུམ་མཉམ་སྒྲིལ་སྐྱིད་སྡུག་གི་ངོས་ནས་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་དང་། ཕྱག་སྦྲེལ་བཀའ་བློན་རྣམས་ལ་གཟེངས་བསྟོད་འབུལ་བའི་མཛད་སྒོ་ཞིག་འཚོགས་ཡོད།དེ་ཡང་ཐོག་མར་བཀའ་ཤག་གི་ཚོགས་ཁང་ནང་དཔལ་ལྡན་སྲིད་སྐྱོང་མཆོག་གིས་གཙོས་བཀའ་བློན་རྣམ་པ་ལྷན་འཛོམས་ཐོག རྟེན་འབྱུང་གསོལ་ཇ་འབྲས་སིལ་འདེགས་འབུལ་ཞུས་རྗེས། མདོ་ཁམས་སྦྲ་སོག་འབྲི་གསུམ་མཉམ་སྒྲིལ་སྐྱིད་སྡུག་གི་ཚོགས་གཙོ་བོད་མི་མང་སྤྱི་འཐུས་ངག་དབང་ཐར་པ་ལགས་ཀྱིས་གཟེངས་རྟགས་འབུལ་བའི་དགོས་དམིགས་དང་འབྲེལ་ནས་གསུང་བཤད་གནང་བའི་ནང་འཁོད་དོན། དཔལ་ལྡན་སྲིད་སྐྱོང་མཁས་དབང་བློ་བཟང་སེངྒེ་མཆོག་གིས་ཕྱི་ལོ་ ༢༠༡༡ ནས་ ༢༠༢༡ བར་མི་ལོ་བཅུའི་རིང་སྤྱི་ནོར་༧གོང་ས་༸སྐྱབས་མགོན་ཆེན་པོ་མཆོག་གི་བཀའ་གསུང་ཅི་སྒྲུབ་གནང་བ་དང༌། བཙན་བྱོལ་བོད་མིའི་སྒྲིག་འཛུགས་སྔར་ལྷག་ཚགས་ཚུད། རྒྱལ་སྤྱིའི་སྡིངས་ཆའི་ཐོག་བོད་དོན་དྲིལ་བསྒྲགས་ཚད་མཐོ་གནང་ཐུབ་པ་སོགས་རླབས་ཆེན་གྱི་མཛད་རྗེས་ཁག་ལ་ལེགས་གསོའི་གཟེངས་བསྟོད་དུ་ཅེས་སོགས་དང་།ད་ལམ་འཛིན་སྐྱོང་བཀའ་ཤག་སྐབས་བཅོ་ལྔ་པའི་ལས་ཡུན་རིང་། ཕྱི་ནང་འགལ་རྐྱེན་གང་བྱུང་མིན་ལ་མ་ལྟོས་པར། བཀའ་བློན་རྣམ་པ་ཚོ་ཞལ་མཐུན་པོའི་སྒོ་ནས་ཕྱག་ལས་གྲུབ་འབྲས་དང་ལྡན་པ་མང་པོ་གནང་བ་མ་ཟད། དཔལ་ལྡན་བཀའ་བློན་རྣམ་པས་སོ་སོའི་ལྷན་ཁང་ཁག་གི་ལས་དོན་ཁག་འཐུས་ཤོར་མེད་པར་སྒྲུབ་པའི་བཀའ་དྲིན་རྗེས་དྲན་དུ། བདག་ཅག་གི་སྟོན་པ་བདེ་བར་གཤེགས་པའི་སྐུ་བརྙན་ཨིན་ཅི་༩ ཅན་རེ་གཟེངས་བསྟོད་ཀྱི་ཚུལ་དུ་འབུལ་རྒྱུ་བཅས་འཁོད་འདུགདེ་ནས་དཔལ་ལྡན་སྲིད་སྐྱོང་མཆོག་ལ་གཟེངས་རྟགས་དང་ལྷན་འཕགས་པ་སྤྱན་རས་གཟིགས་ཕྱག་བཞི་པའི་སྐུ་བརྙན་ཨིན་ཅི་ ༡༢ ཅན་ཞིག་ཕུལ་སོང་ལ། བཀའ་བློན་རྣམ་པ་སོ་སོར་བདག་ཅག་གི་སྟོན་པ་བདེ་བར་གཤེགས་པའི་སྐུ་བརྙན་ཨིན་ཅི་ ༩ ཅན་རེ་གཟེངས་བསྟོད་ཀྱི་ཚུལ་དུ་ཕུལ་སོང་། དང་ཐོག་ཉིན་གུང་ཞལ་ལག་ཞིག་གོ་སྒྲིག་ཞུ་འཆར་ཡོད་ཀྱང་། ཏོག་དབྱིབས་གཉན་རིམས་ཀྱི་་གནས་སྟངས་རྐྱེན་པས་འབུལ་བདེ་མ་བྱུང་བས་བཀའ་ཤག་ལྷན་རྒྱས་ལ་ཞལ་ལག་ཀྱི་དོད་རེ་ཕུལ་ཡོད།དེ་ནས་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་གིས་གསུང་བཤད་གནང་རྗེས། སྐུ་པར་ལྷན་སྒྲོན་གནང་ནས་གཟེངས་རྟགས་འབུལ་བའི་མཛད་སྒོ་ལེགས་གྲུབ་བྱུང་ཡོད་པ་བཅས།།