༄༅། །འདི་གར་ཐའེ་ཝན་བོད་ཀྱི་སྐུ་ཚབ་དོན་གཅོད་ལས་ཁུངས་ནས་བཏང་གནས་ནང་འཁོད་དོན། ཕྱི་ལོ་ ༢༠༢༡ ཟླ་ ༥ ཚེས་ ༢ རེས་གཟའ་ཉི་མའི་ཉིན་རྒྱབ་ཆུ་ཚོད་ ༢ ནས་ ༥ བར་ཐའེ་སྡོད་བོད་རིགས་ཚོགས་པ་དང་། ཐའེ་ཝན་བོད་རྒྱ་མཛའ་འབྲེལ་ཚོགས་པ་ཐུན་མོང་ནས་དབུ་མའི་ལམ་གྱི་དགོངས་དོན་དང་གྲུབ་འབྲས་ངོ་སྤྲོད་ཀྱི་བཞུགས་མོལ་ཚོགས་འདུ་ཞིག་གོ་སྒྲིག་གནང་སྟེ་ཐའེ་ཝན་གྱི་སྲིད་འཛིན་གཞོན་པ་ཟུར་པ་ལྕམ་ནུལ་ཤུག་ནན་མཆོག་གིས་གཙོས་ཆབ་སྲིད་ཀྱི་གནད་ཡོད་མི་སྣ་དང་མཁས་དབང་། ཆབ་སྲིད་ལས་འགུལ་བ་དང་དོ་སྣང་ཅན། གསར་འགྱུར་བརྒྱུད་ལམ་སོགས་མི་སྣ་བཞི་བཅུ་ལྷག་ལྷན་འཛོམས་ཀྱིས་གསུང་བཤད་དང་དྲི་བ་དྲིས་ལན་སོགས་བགྲོ་གླེང་ལྷུག་པོ་གནང་ཡོད།
དེ་ཡང་བགྲོ་གླེང་གི་ཐོག་མར་ཐའེ་སྡོད་བོད་རིགས་ཚོགས་པའི་ཚོགས་གཙོ་བསྟན་འཛིན་རྣམ་དག་ལགས་ཀྱིས་གཙོ་སྐྱོང་བའི་ངོ་བོའི་ཐོག་བགྲོ་གླེང་ཚོགས་འདུ་གོ་སྒྲིག་ཞུ་དགོས་པའི་དགོས་དམིགས་དང་། བོད་དོན་བདེན་མཐའ་གསལ་ཐབས་དབུ་མའི་ལམ་གྱི་སྲིད་བྱུས་གཏན་འབེབས་ཇི་གནང་གི་བརྒྱུད་རིམ་ངོ་སྤྲོད་གནང་རྗེས། གསུང་བཤད་གནང་མཁན་དང་པོ་ཐའེ་ཝན་སྐུ་ཚབ་དོན་གཅོད་ཟུར་པ་ཟླ་བ་ཚེ་རིང་ལགས་ཀྱིས་དབུ་མའི་ལམ་གྱི་དགོངས་དོན་ཞེས་པའི་བརྗོད་གཞིའི་ཐོག བོད་རྒྱ་གཉིས་དབར་གྱི་ལོ་རྒྱུས་ཀྱི་གནས་བབ་ནས། རྒྱ་མི་གུང་ཁྲན་གྱི་བོད་ལ་བཙན་འཛུལ་དང་དབང་བསྒྱུར་བྱས་སྟངས། དེ་ནས་བཙན་བྱོལ་གྱི་གནས་བབ་འོག་བོད་ཀྱི་འཐབ་རྩོད་ཀྱི་ངོ་བོ་རིམ་བཞིན་དབུ་མའི་ལམ་གྱི་སྲིད་བྱུས་ཐོག་ཁ་ལོ་བསྒྱུར་ཏེ་བོད་དོན་བདེན་མཐའ་གསལ་ཐབས་ཀྱི་འབད་རྩོལ་ཇི་གནང་། མཐའ་མ་བོད་རིགས་ཡོངས་ལ་མིང་དོན་མཚུངས་པའི་རང་སྐྱོང་ཡོང་ཐབས་ཀྱི་བསམ་འཆར་ཡིག་ཆའི་ནང་དོན་བཅས་རེ་རེ་བཞིན་འགྲེལ་བཤད་གནང་།
བགྲོ་གླེང་གསུང་བཤད་གནང་མཁན་གཉིས་པ་སྐུ་ཚབ་དོན་གཅོད་འབའ་བ་སྐལ་བཟང་རྒྱལ་མཚན་ལགས་ཀྱིས་དབུ་མའི་ལམ་གྱི་གྲུབ་འབྲས་དང་མ་འོངས་ཁ་ཕྱོགས་ཞེས་པའི་བརྗོད་གཞིའི་ཐོག རྒྱ་ནག་གིས་བོད་དེ་དུམ་བུ་བཅད་གཏུབ་ཀྱིས་ཞིང་ཆེན་དང་ལྗོངས་ལྔའི་ནང་ཁག་བགོས་དབང་བསྒྱུར་བྱེད་བཞིན་པའི་གནས་བབ་ནས་དབུ་མའི་ལམ་སྲིད་བྱུས་ཀྱི་ནང་དོན་ཞི་བའི་དོན་ཚན་ལྔ་དང་། སི་ཊ་སི་སྦག་གི་གྲོས་འཆར། བོད་རིགས་ཡོངས་ལ་མིང་དོན་མཚུངས་པའི་རང་སྐྱོང་ཡོང་ཐབས་ཀྱི་བསམ་འཆར་བཅས་ཚིག་དོན་རེ་རེ་བཞིན་ངོ་སྤྲོད་དང་འབྲེལ། རྒྱ་ནག་གཞུང་ནས་སྲིད་བྱུས་དེར་འཁྱོག་བཤད་དང་དྲིལ་བསྒྲགས་ལོགས་པ་བྱས་དང་བྱེད་མུས་ཀྱི་དགོས་པ་རྒྱབ་ལྗོངས། བོད་མིའི་ཕྱོགས་ནས་དབུ་མའི་ལམ་གྱི་སྲིད་བྱུས་ལག་བསྟར་བྱས་པ་ནས་བཟུང་བོད་ཕྱི་ནང་གཉིས་དབར་ཕར་འགྲོ་ཚུར་འོང་གི་གོ་སྐབས་འོག་ཆོས་དང་རིག་གཞུང་། སྐད་ཡིག་སོགས་སློབ་སྦྱོང་དང་རྒྱུན་འཛིན་བྱས་པར་ཕན་ཐོགས་ཇི་བྱུང་།
བོད་ཕྱི་ནང་གཉིས་ཀྱི་བོད་མི་རྣམས་རྡོག་རྩ་གཅིག་ཏུ་སྒྲིལ་ཏེ་མི་རིགས་ཀྱི་ངོ་བོ་སྲུང་སྐྱོབ་དང་བོད་མིའི་འདུ་ཤེས་སྲ་བརྟན་དུ་འགྱུར་བར་ནུས་པ་ཇི་ཐོན། རྒྱལ་སྤྱིའི་སྟེང་བོད་དོན་ཁྱབ་བསྒྲགས་དང་ལས་འགུལ་གྱི་ཤུགས་ཚད་ཧ་ཅང་ཐོན་པོར་སླེབས་ཏེ་རྒྱབ་སྐྱོར་སྔར་ལྷག་ཐོབ་པའི་གནས་བབ་བཅས་རེ་རེ་བཞིན་ངོ་སྤྲོད་གནང་རྗེས། དབུ་མའི་མ་གྱི་སྲིད་བྱུང་ཡང་དག་པ་འདི་བརྒྱུད་བོད་དོན་བདེན་མཐའ་ངེས་པར་གསལ་ཐུབ་པའི་མཐའ་ཚིག་དོན་ཚན་ལྔ་འགྲེལ་བརྗོད་མཐིལ་ཕྱིན་གནང་།
དེ་ནས་བགྲོ་གླེང་གསུང་བཤད་གནང་མཁན་གསུམ་པ་རྒྱ་གར་ནེ་རུ་མཐོ་སློབ་ཀྱི་འབུམ་རམས་པ་སྒྲོལ་མ་ཚེ་རིང་ལགས་ཀྱིས་ཨིན་ཡིག་ཐོག་རྒྱ་ནག་གཞུང་གི་བོད་ཐོག་འཛིན་པའི་སྲིད་བྱུས་ཀྱི་ངན་འབྲས་དང་། དཔལ་འབྱོར་འཛུགས་སྐྲུན་ཆེན་པོ་བྱེད་བཞིན་པ་དེས་བོད་མིར་ཕན་ཐོགས་བརྒྱ་ཆ་ ༢༠ ལས་ཉུང་བ་ཡིན་པའི་དན་རྟགས་དང་བཅས་ཉམས་ཞིབ་ཚད་དང་ལྡན་པ་གནང་ཡོད་པ་ཚང་མར་ངོ་སྤྲོད་གནང་།
དེ་རྗེས་ཐའེ་ཝན་སྲིད་འཛིན་ཟུར་པ་ལྕམ་ནུལ་ཤུག་ནན་མཆོག་གིས་དེ་རིང་བོད་མི་ཚོས་བགྲོ་གླེང་ཚོགས་འདུ་གལ་ཆེན་པོ་ཞིག་གོ་སྒྲིག་གནང་བའི་ཐོག་བཅར་རྒྱུའི་གོ་སྐབས་བྱུང་བར་དགའ་ཚོར་ཆེན་པོ་སྐྱེས་པ་དང་། སྤྱི་ནོར་༧གོང་ས་༸སྐྱབས་མགོན་ཆེན་པོ་མཆོག་ནི་འཛམ་གླིང་ནང་ཆེས་སྙན་གྲགས་ཆེ་བའི་ཞི་བདེའི་དེད་དཔོན་དང་། དབུ་ཁྲིད་ཅིག་ཡིན་སྟབས་ཁོང་ལ་གུས་བརྩི་ཆེན་པོ་ཡོད་པ། ཐེངས་མང་མཇལ་མྱོང་ཡོད་པ། བོད་མི་ཚོ་མི་འབོར་ཉུང་ཉུང་ཡིན་ནའང་རྒྱལ་སྤྱིའི་སྟེང་ལས་འགུལ་རྒྱ་ཆེན་པོ་དང་རྒྱབ་སྐྱོར་ཚད་མཐོན་པོ་ཐོབ་བཞིན་པའི་ཉམས་མྱོང་དང་བསླབ་བྱ་ཐའེ་ཝན་གྱི་ལེན་ཐུབ་དགོས་པ་བཅས་གསུངས་རྗེས། གཡས་གཡོན་ལས་རོགས་ཚོར་བལྟས་ཏེ་མ་འོངས་པར་ཐའེ་བོད་གཉིས་དབར་ལས་འགུལ་དེ་འདྲ་མང་ཙམ་སྤེལ་དགོས་པའི་བསྐུལ་མའང་གནང་ཡོད།
དེ་ནས་གསོལ་ཇའི་བར་གསེང་མཚམས་སུ་མང་ཚོགས་ཀྱི་དྲི་བ་གནང་བར་འབྲེལ་ཡོད་གསུང་བཤད་གནང་མཁན་གསུམ་ནས་རེ་རེ་བཞིན་ལན་འདེབས་བསྐྱོན་པ་དང་། དེ་རྗེས་ཐའེ་ཝན་གྲོས་ཚོགས་ཀྱི་འཐུས་མི་ནས་དོན་གཅོད་རྙིང་པ་ཕེབས་བསྐྱེལ་དང་། དོན་གཅོད་གསར་པ་ཕེབས་བསུའི་དགོང་མོའི་གསོལ་སྟོན་བཤམས་ཏེ། ཐའེ་ཝན་གྱི་མཁས་དབང་དང་། ལས་འགུལ་བ་མང་པོ་མཉམ་ཞུགས་གནང་ཡོད་པ་བཅས། །
