༄༅། །ཉི་ཧོང་གིས་རྒྱལ་ཡོངས་སུ་ལོ་འཁོར་བདུན་ཕྲག་གི་གུང་སེང་སྲུང་བརྩི་ཞུ་བཞིན་པ་དང་བསྟུན། ཉི་ཧོང་གི་རྒྱལ་ས་ཊོ་ཀི་ཡོ་ནང་རྟེན་གཞི་བྱས་པའི་ཉི་ཧོང་བོད་ཁང་གིས་ཕྱི་ལོ་ ༢༠༢༡ ཟླ་ ༥ ཚེས་ ༢ ནས་ ༥ བར་ཉིན་གྲངས་བཞིའི་རིང་དྲ་ལམ་བརྒྱུད་བོད་ཀྱི་དུས་སྟོན་གོ་སྒྲིག་ཞུ་གཏན་འཁེལ་ཡོད།
དེ་ཡང་བོད་ཀྱི་དུས་སྟོན་གོ་སྒྲིག་ཞུ་དགོས་པའི་དམིགས་ཡུལ་གཙོ་བོ་ནི། བོད་ཀྱི་ཐུན་མོང་མ་ཡིན་པའི་རིག་གཞུང་ཕྱུག་པོ་དེ་སྲུང་བརྩི་དང་འབྲེལ་ཉི་ཧོང་གི་གྲོགས་པོ་དང་བོད་དོན་རྒྱབ་སྐྱོར་བ་རྣམས་ལ་བོད་ཀྱི་རིག་གཞུང་ཕྱུག་པོ་ངོ་སྤྲོད་དང་གོ་རྟོགས་སྤེལ་རེས་བྱ་ཆེད་ཡིན་ཞིང་། ང་ཚོའི་ངོས་ནས་བདུན་ཕྲག་འདིའི་གུང་སེང་གི་གོ་སྐབས་བརྒྱུད་ཉི་ཧོང་གི་བོད་དོན་རྒྱབ་སྐྱོར་བ་དང་སྦྱིན་བདག་རྣམས་ཀྱིས་མུ་མཐུད་བོད་དོན་སླད་རྒྱབ་སྐྱོར་དང་ཐུགས་ཁུར་གནང་བཞིན་ཡོད་སྟབས། ཁོང་ཚོ་ཚང་མར་ཐུགས་རྗེ་ཆེ་ཞུ་རྒྱུ་དེ་ཡིན།
དུས་སྟོན་འདི་བརྒྱུད་ང་ཚོས་བོད་དང་ཉི་ཧོང་གཉིས་ཀྱི་དབར་སྔར་ལས་ལྷག་འབྲེལ་བ་དམ་ཟབ་དང་། ཕན་ཚུན་ཐུན་མོང་མ་ཡིན་པའི་རིག་གཞུང་སྤེལ་རེས། དེ་བཞིན་ཆོས་ཕྱོགས་དང་རིག་གཞུང་གི་འབྲེལ་བ་ཤུགས་ཆེ་རུ་གཏོང་ཐུབ་པའི་རེ་བ་བྱེད་ཀྱི་ཡོད།
ཏོག་དབྱིབས་གཉན་རིམས་ཀྱི་རྐྱེན་པས་ན་ནིང་ནས་བཟུང་ང་ཚོའི་ལུས་སེམས་གཉིས་ཀར་འཕྲད་བཞིན་པའི་དཀའ་ངལ་དེ་དག་སེལ་པར་དུས་སྟོན་ལས་རིམ་དེ་དག་གིས་ཞབས་འདེགས་ཅུང་ཙམ་བསྒྲུབ་ཐུབ་པའི་རེ་བ་བྱེད་ཀྱི་ཡོད།
དེ་ཡང་དུས་སྟོན་སྐབས་ནང་པའི་སྒོམ་རྒྱག་སྟངས་དང་ཉམས་ལེན་སྐོར་ངོ་སྤྲོད་གཏམ་བཤད་དང་། དེ་བཞིན་རྡུལ་ཚོན་དཀྱིལ་འཁོར་གྱི་དགོས་དམིགས་དང་། བོད་ཀྱི་ཆོས་དང་རིག་གཞུང་གི་ལོ་རྒྱུས་སོགས་ཀྱི་ཐོག་གཏམ་བཤད་གནང་རྒྱུ་ཡིན་པ་མ་ཟད། བོད་མིའི་ཐུན་མིན་ཁ་ཟས་དང་། ཉི་ཧོང་དང་ཨ་རི། ཀོ་རི་ཡ། ཨོ་སི་ཀྲོ་ལི་ཡ་ཁུལ་གྱི་སྙན་གྲགས་ཆེ་བའི་བོད་པའི་གཞས་པ་གཞས་མ་རྣམས་ཀྱིས་བོད་ཀྱི་སྲོལ་རྒྱུན་གྱི་གཞས་དང་ཞབས་བྲོ་སོགས་འཁྲབ་སྟོན་ཞུ་རྒྱུ་ཡིན། ཕྱོགས་མཚུངས་རྒྱ་གར་ནང་ཡོད་པའི་བོད་པའི་སློབ་གྲྭ་ཁག་གཅིག་གི་སློབ་ཕྲུག་ཚོས་བརྙན་ཐུང་བརྒྱུད་ཉི་ཧོང་གི་སྦྱིིན་བདག་རྣམས་ནས་ཤེས་ཡོན་ཆེད་དུ་གཏོང་ཕོད་ཆེན་པོའི་སྒོ་ནས་མུ་མཐུད་རྒྱབ་སྐྱོར་དང་མཐུན་འགྱུར་རོགས་རམ་གནང་དང་གནང་བཞིན་པར་ཐུགས་རྗེ་ཆེ་ཞུའི་བརྙན་ཐུང་ཁག་གཅིག་ཀྱང་གཟིགས་འབུལ་ཞུ་རྒྱུ་ཡིན།
ཐེངས་འདིའི་དྲ་ཐོག་གི་བོད་ཀྱི་དུས་སྟོན་དེ་བཞིན་ (BlueJeans) དང་། ཉི་ཧོང་བོད་ཁང་གི་ངོ་དེབ་བརྒྱུད་ཐད་གཏོང་ཞུ་རྒྱུ་ཡིན་པ་བཅས། །
