༄༅། །ཕྱི་ལོ་ ༢༠༢༡ ཟླ་ ༥ ཚེས་ ༢༦ ཉིན་ལྡི་ལིར་རྟེན་གཞི་བྱས་པའི་རྒྱལ་སྤྱིའི་ནང་པའི་མཐུན་ཚོགས་དང་། སོག་ཡུལ་དུ་ཡོད་པའི་ཨེ་ཤི་ཡ་ནང་པའི་ཆོས་ཚོགས་གཉིས་ཀྱི་གོ་སྒྲིག་འོག་ས་ག་ཟླ་བའི་དུས་ཆེན་གསུམ་འཛོམས་ཁྱད་པར་ཅན་དེ་ཉིད་དྲ་ལམ་བརྒྱུད་སྲུང་བརྩི་ཞུས་ཡོད་པ་དང་། སྐབས་དེར་བོད་མིའི་སྒྲིག་འཛུགས་ཀྱི་ཆོས་རིག་བཀའ་བློན་གཡུ་ཐོག་ཀརྨ་དགེ་ལེགས་མཆོག་གིས་ས་ག་ཟླ་བའི་དུས་ཆེན་ཁྱད་པར་ཅན་དེ་དང་བསྟུན་གསུང་བཤད་གནང་ཡོད།
དེ་ཡང་ཆོས་རིག་བཀའ་བློན་མཆོག་གིས་གསུང་དོན། ངས་དེ་རིང་ས་ག་ཟླ་བའི་དུས་ཆེན་ཁྱད་པར་ཅན་གྱི་ཉིན་མོར་བོད་མིའི་སྒྲིག་འཛུགས་དང་རྒྱལ་སྤྱིའི་བོད་མི་ནང་པ་ཡོངས་ཀྱི་ཚབ་ཞུས་ཏེ་རྒྱལ་སྤྱིའི་སྐྱབས་གནས་དགེ་འདུན་གྱི་སྡེ་དང་ནང་པའི་མཆེད་གྲོགས་ཕོ་མོ་རྣམས་ལ་སྤྲོ་སེམས་འཁོལ་བའི་ངང་ནས་འཚམས་ཞུ་རྒྱུ་ཡིན།
ས་ག་ཟླ་བའི་ཚེ་བཅོ་ལྔ་ནི་འཛམ་གླིང་གི་ནང་པ་ཡོངས་ལ་མཚོན་ན་དུས་ཆེན་ཧ་ཅང་རྩ་ཆེན་པོ་ཞིག་ཡིན་ཞིང་། ཉིན་དེར་འཛམ་གླིང་གི་ནང་པ་ཡོངས་ཀྱིས་སྟོན་པ་བཅོམ་ལྡན་འདས་སྐུ་བལྟམས་པ་དང་། མངོན་པར་རྫོགས་པར་སངས་རྒྱས་པ། སྐུ་མྱ་ངན་ལས་འདས་པ་བཅས་དུས་ཆེན་ཁྱད་པར་ཅན་དེ་ཉིད་སྲུང་བརྩི་ཞུ་གི་ཡོད།
སྤྱིར་ས་ག་ཟླ་བ་ནི་ནང་པའི་རྒྱལ་ཁབ་སོ་སོའི་ནང་ཅུང་ཙམ་རྩིས་སྟངས་མ་འདྲ་བ་ཡོད་སྟབས། རྒྱལ་སྤྱིིའི་ནང་པ་ཡོངས་ཀྱིས་ས་ག་ཟླ་བའི་དུས་ཆེན་ཁྱད་པར་ཅན་དེ་ཉིད་གཅིག་གྱུར་གྱིས་སྲུང་བརྩི་ཞུ་ཐུབ་ན་དགེ་མཚན་ཆེ་བ་ཡོད་པ་སོགས་ཀྱི་སྐོར་གསུངས།
དེ་བཞིན་ཆོས་རིག་བཀའ་བློན་མཆོག་གིས་ས་ག་ཟླ་བའི་དུས་ཆེན་ཁྱད་པར་ཅན་དང་བསྟུན་བོད་མིའི་སྒྲིག་འཛུགས་དང་རྒྱལ་སྤྱིའི་བོད་མི་ནང་པ་ཡོངས་ཀྱི་ཚབ་ཞུས་ཏེ་སོག་པོའི་སྐྱབས་གནས་དགེ་འདུན་གྱི་སྡེ་དང་མཆེད་གྲོགས་ཕོ་མོ་རྣམས་ལ་སྤྲོ་སེམས་འཁོལ་བའི་ངང་ནས་འཚམས་ཞུས་པ་དང་སྦྲགས། སངས་རྒྱས་བཅོམ་ལྡན་འདས་ཀྱི་བཀའ་དྲིན་རྗེས་དྲན་སྲུང་བརྩི་ཞུ་རྒྱུ་ཡག་ཤོས་ནི། སངས་རྒྱས་བཅོམ་ལྡན་འདས་ཀྱིས་བདེན་བཞི་དང་། རྟེན་ཅིང་འབྲེལ་བར་འབྱུང་བའི་རྣམ་གཞག བཟོད་པ། སྦྱིན་པ། བྱམས་བརྩེ། སྙིང་རྗེ། གཞན་ཕན་བཅས་ཀྱི་སྐོར་གསུངས་ཡོད་པ་དེ་དག་ཉམས་ལེན་བྱེད་རྒྱུ་དེ་ཡིན། ཞེས་སོགས་ཀྱི་གསུང་བཤད་གནང་ཡོད་པ་བཅས།།
