༄༅། །བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་གི་ལོ་བཅུའི་ལས་ཡུན་འཁྱུར་ལ་ཉེ་བ་དང་བསྟུན། ཕྱི་ལོ་ ༢༠༢༡ ཟླ་ ༥ ཚེས་ ༨ ཉིན་ཁེ་ན་ཌ་ཨོན་ཌེ་རི་ཡོ་བོད་རིགས་སྤྱི་མཐུན་ཚོགས་པས་དྲ་ལམ་བརྒྱུད་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་ལ་བཀའ་དྲིན་རྗེས་དྲན་གྱི་གཟེངས་རྟགས་ཕུལ་ཡོད།

བཀའ་དྲིན་རྗེས་དྲན་གྱི་གཟེངས་རྟགས་མཛད་སྒོར་བྱང་ཨ་རིའི་སྐུ་ཚབ་དོན་གཅོད་དངོས་གྲུབ་ཚེ་རིང་ལགས་དང་། ཁེ་ན་ཌ་ཨོན་ཌེ་རི་ཡོ་བོད་རིགས་སྤྱི་མཐུན་ཚོགས་པའི་ཚོགས་མི་རྣམ་པ། གཞུང་འབྲེལ་མིན་པའི་ཚོགས་པ་ཁག་གི་ཚོགས་མི་རྣམ་པ་སོགས་མཉམ་ཞུགས་གནང་ཡོད་པ་མ་ཟད། ཁེ་ན་ཌའི་གྲོས་ཚོགས་འཐུས་མི་ཁག་གཅིག་གིས་ཀྱང་བརྙན་ཐུང་བརྒྱུད་དཔལ་ལྡན་སྲིད་སྐྱོང་མཆོག་ལ་ཆེ་བསྟོད་དང་འཚམས་འདྲི་གནང་ཡོད།  དེ་ཡང་ཁེ་ན་ཌ་ཨོན་ཌེ་རི་ཡོ་བོད་རིགས་སྤྱི་མཐུན་ཚོགས་པའི་ཚོགས་གཙོ་ཚེ་རིང་དབང་རྒྱལ་ལགས་ཀྱིས་ཕེབས་བསུ་དང་སྦྲགས། ཏོག་དབྱིབས་གཉིན་རིམས་ཁྱབ་བརྡལ་འགྲོ་བཞིན་པའི་སྐབས་འདིར་ཁེ་ན་ཌ་ཨོན་ཌེ་རི་ཡོ་བོད་རིགས་སྤྱི་མཐུན་ཚོགས་པའི་ངོས་ནས་༧རྒྱལ་བའི་བཀའ་དྲིན་རྗེས་དྲན་དང་བོད་དོན་ཞུ་གཏུག་སོགས་ཀྱི་ལས་འགུལ་སྤེལ་བའི་སྐོར་ལོ་འཁོར་ལས་བསྡོམས་སྙན་སྒྲོན་གནང་གྲུབ་མཚམས་བྱང་ཨ་རིའི་སྐུ་ཚབ་དོན་གཅོད་དངོས་གྲུབ་ཚེ་རིང་ལགས་ཀྱིས། དཔལ་ལྡན་སྲིད་སྐྱོང་མཆོག་གིས་ལས་ཡུན་ལོ་བཅུའི་རིང་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གི་དགོངས་བཞེད་དང་བཀའ་སློབ་ལམ་སྟོན་གཅོ་བོ་གཞིར་བཞག་ཐོག་བོད་དོན་སླད་སྐུ་ལས་ཚད་མེད་བསྐྱོན་གནང་ཡོད། ཅེས་དང་།དུས་ཚོད་གཉན་འཕྲང་གི་སྐབས་འདིར་བོད་མི་ཚོས་སོ་སོའི་ལྟ་བ་ལངས་ཕྱོགས་དང་བསམ་ཚུལ་མ་མཐུན་པ་ཡོད་པ་རྣམས་ཟུར་དུ་བཞག་ནས་རྡོག་རྩ་གཅིག་སྒྲིལ་གནང་དགོས་པ་མ་ཟད། འབྱུང་འགྱུར་གྱི་སྲིད་སྐྱོང་གསར་པ་མཆོག་ལའང་རྒྱབ་སྐྱོར་དང་ཕྱར་བ་གྲུ་འདེགས་གནང་དགོས་པའི་གལ་གནད་སོགས་ཀྱི་སྐོར་གསུངས། 

ཁེ་ན་ཌའི་གྲོས་ཚོགས་འོག་མའི་འཐུས་མི་སྐུ་ཞབས་ཇམ་སི་མེ་ལོ་ནེ་ (James Maloney)  མཆོག་དང་། གྲོས་ཚོགས་འོག་མའི་འཐུས་མི་སྐུ་ཞབས་སི་ཝན་ (Sven Spengemann) མཆོག  ཁ་ེན་ཌའི་ཨོན་ཌེ་རི་ཡོ་མངའ་སྡེའི་གྲོས་ཚོགས་འཐུས་མི་ལྕམ་སྐུ་ཁིར་སི་ཊིན་ཧོ་གྷར་ཐི་(Christine Hogarth) མཆོག   ཁེ་ན་ཌའི་ཨོན་ཌེ་རི་ཡོ་མངའ་སྡེའི་གྲོས་ཚོགས་འཐུས་མི་བུ་འཁྲིད་ལ་དཀར་པོ་ཆེ་ལགས་བཅས་ཀྱིས་བརྙན་ཐུང་བརྒྱུད་དཔལ་ལྡན་སྲིད་སྐྱོང་མཆོག་གིས་ལས་ཡུན་ལོ་བཅུའི་རིང་བོད་ཀྱི་གནད་དོན་དེ་རྒྱལ་སྤྱིའི་སྟེང་ངོས་འཛིན་ཡོད་པ་ཞིག་ལ་བསྒྱུར་གནང་བ་དང་།

དེ་བཞིན་དཔལ་ལྡན་སྲིད་མཆོག་གི་ཁྱད་འཕགས་ཀྱི་དབུ་ཁྲིད་ཀྱི་ནུས་པ་བཅས་ལ་ཆེ་བསྟོད་གནང་ཡོད་པ་མ་ཟད། དཔལ་ལྡན་སྲིད་སྐྱོང་མཆོག་གི་འབྱུང་འགྱུར་གྱི་བྱ་གཞག་ཐམས་ཅད་ལམ་ལྷོངས་ཡོང་བའི་སྨོན་འདུན་ཞུས་གནང་ཡོད། དེ་བཞིན་གཞུང་འབྲེལ་མིན་པའི་ཚོགས་པ་ཁག་གི་སྐུ་ཚབ་རྣམས་ནས་དཔལ་ལྡན་སྲིད་སྐྱོང་མཆོག་ལ་ཐུགས་རྗེ་ཆེ་ཞུའི་གསུང་བཤད་གནང་ཡོད། དེ་རྗེས་དཔལ་ལྡན་སྲིད་སྐྱོང་མཆོག་གིས། བཀའ་ཤག་གི་ལས་ཡུན་ལོ་བཅུའི་རིང་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གི་དགོངས་བཞེད་དང་བོད་མིའི་མངོན་འདོད་འགྲུབ་སླད་ཞབས་འདེགས་ཧུར་ཐག་འབད་ཐག་བསྒྲུབས་ཡོད། བཀའ་ཤག་སྐབས་ ༡༤ དང་ ༡༥ སྐབས་ལས་དོན་མང་པོ་ལེགས་གྲུབ་བྱུང་ཡོད་པ་དང་། དེ་ནི་གཙོ་བོ་བཀའ་བློན་རྣམ་པས་སྐུ་ལས་བསྐྱོན་པ་ལ་བརྟེན་ནས་བྱུང་བ་ཡིན། ཞེས་དང་།

ཁེ་ན་ཌ་ཨོན་ཌེ་རི་ཡོ་བོད་རིགས་སྤྱི་མཐུན་ཚོགས་པ་དང་། དེ་བཞིན་གཞུང་འབྲེལ་མིན་པའི་ཚོགས་པ་ཁག ལྷག་པར་བོད་རིགས་གཞོན་སྐྱེས་སོགས་ནས་བོད་དོན་སླད་ཞབས་འདེགས་ཧུར་ཐག་ཞུས་གནང་བར་ཐུགས་རྗེ་ཆེ་ཞུ་རྒྱུ་ཡིན། ཁེ་ན་ཌའི་གྲོས་ཚོགས་འཐུས་མི་ཁག་གཅིག་དང་། ཁེ་ན་ཌའི་བོད་མི་རྣམས་ཀྱིས་བོད་དོན་ཞུག་གཏུག་གི་ལས་འགུལ་སྣ་མང་སྤེལ་གནང་བར་ཐུགས་རྗེ་ཆེ་ཞུ་རྒྱུ་ཡིན། ཞེས་གསུངས།

མཐར་དཔལ་ལྡན་སྲིད་སྐྱོང་མཆོག་གིས་འཛམ་གླིང་གང་སར་གནས་པའི་བོད་མི་ཚོས་ཁོང་ལ་བོད་དོན་དང་བོད་མིར་སྲི་ཞུ་བསྒྲུབ་རྒྱུའི་གོ་སྐབས་གནང་བར་ཐུགས་རྗེ་ཆེ་ཞུ་རྒྱུ་ཡིན། ཞེས་གསུངས།།