ཨུ་རུ་སུར་གནས་སྡོད་བོད་མིས་སྲིད་སྤྱི་གཉིས་ཀྱི་དངོས་གཞིའི་འོས་བསྡུར་ཆ་ཤས་བླངས་པ།

གསར་ལས་ཁང་གི་གསར་འགོད་པས།

༢༠༢༡-༠༤-༡༣

༄༅། །ཨུ་རུ་སུ་ནི་འཛམ་གླིང་ནང་ས་ཁུལ་ཆེ་ཤོས་ཤིག་ཡིན་ནའང་དེར་བོད་མི་ཉུང་ཤས་ལས་ཡོད་མེད་ལ་མ་ལྟོས་པར་བོད་མི་རྣམས་ཀྱིས་ཚ་ཚ་འུར་འུར་ངང་ཕྱི་ལོ་ ༢༠༢༡ ཟླ་ ༤ ཚེས་ ༡༡ རེས་གཟའ་ཉི་མའི་ཉིན་བོད་མིའི་སྒྲིག་འཛུགས་ཀྱི་སྲིད་སྐྱོང་དང་། བོད་མི་མང་སྤྱི་འཐུས་སྐབས་ ༡༧ པའི་སྤྱི་འཐུས་ཀྱི་དངོས་གཞིའི་འོས་བསྡུར་ཆ་ཤས་བླངས་ཡོད། ཨུ་རུ་སུའི་ནང་བོད་མི་བརྒྱ་ལྷག་ལས་མེད་པ་མ་ཟད་ཕལ་ཆེ་བ་ཨུ་རུ་སུའི་སྤྱི་མཐུན་རྒྱལ་ཁབ་ཀྱི་བྷུ་རི་ཡ་ཐ་དང་། ཁལ་མིག ཐུ་ཝ་བཅས་སྲོལ་རྒྱུན་གྱི་ནང་པའི་ས་ཁུལ་ཁག་ནས་ཡིན།

དེ་ཡང་བོད་རིགས་སྤྱི་མཐུན་ཚོགས་པའི་ཚོགས་གཙོ་ཟླ་བ་ཚེ་རིང་ལགས་ཀྱིས་གསུང་དོན། ཨུ་རུ་སུའི་ས་བབས་གནས་སྟངས་ཀྱི་ཆ་ནས་བོད་མིའི་སྒྲིག་འཛུགས་ཀྱི་བསྟི་གནས་བཞུགས་སྒར་རྡ་ས་དང་ཐག་རིང་པོར་ཡོད་ནའང་། དེང་དུས་ཀྱི་འཕྲུལ་ཆས་བེད་སྤྱད་དེ་དུས་རྒྱུན་དུ་ང་ཚོའི་འཐབ་རྩོད་སྐོར་གསར་འགྱུར་བརྒྱུད་ལམ་ཁག་སོགས་ཀྱི་བརྒྱུད་ནས་ཤེས་རྟོགས་ཐུབ་ཀྱི་ཡོད། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་དབུ་ཁྲིད་འོག་མང་གཙོའི་ལམ་ལུགས་ཕྱག་བསྟར་གནང་བ་དེ་ནི་གཞིས་བྱེས་བོད་མི་ཡོངས་ལ་མཚོན་ན་བོད་ཀྱི་ལོ་རྒྱུས་ཀྱི་དཀྱོགས་མཚམས་གལ་ཆེན་ཞིག་ཡིན་པ་ང་ཚོས་ཡིད་ཆེས་བྱེད་ཀྱི་ཡོད། ང་ཚོར་མ་འོངས་པའི་སྲིད་སྐྱོང་གདམ་པར་འོས་ཤོག་འཕེན་རྒྱུའི་ཐོབ་ཐང་ཡོད་པ་མ་ཟད། དེར་སྤོབས་པ་ཡོད། ཅེས་གསུངས།ཉིན་དེར་མོ་སི་ཁོར་གནས་སྡོད་བོད་མི་རྣམས་ཀྱིས་ཨུ་རུ་སུའི་རྒྱལ་ས་མོ་སི་ཁོའི་ནང་ཡོད་པའི་བོད་ཀྱི་སྐུ་ཚབ་དོན་གཅོད་ཁང་དུ་གོ་སྒྲིག་ཞུས་པའི་འོས་བསྡུའི་སྤྱིལ་བུར་འདུ་འཛོམས་གནང་སྟེ་སྲིད་སྤྱི་གཉིས་ཀྱི་དངོས་གཞིའི་འོས་ཤོག་འཕངས་ཡོད། མོ་སི་ཁོར་འོས་ཤོག་འཕེན་བཞིན་པའི་སྐབས་ཨུ་རུ་སུའི་ཤར་ཁུལ་གྱི་མངའ་ཁོངས་བྷུ་རི་ཡ་ཐི་དང་། ཐུ་ཝ་ཁུལ་གྱི་བོད་མི་རྣམས་ཀྱིས་སྲིད་སྤྱི་གཉིས་ཀྱི་དངོས་གཞིའི་འོས་ཤོག་འཕངས་ཟིན།

ཨུ་རུ་སུའི་མངའ་ཁོངས་ཐུ་ཝ་ཁུལ་ནས་ཡིན་པའི་དགེ་བཤེས་བློ་བཟང་ཕུན་ཚོགས་ལགས་ཀྱིས་གསུང་དོན། རང་ཉིད་བོད་པ་ཞིག་ཡིན་པའི་སྤོབས་པ་ཡོད། འཛམ་གླིང་སྟེང་གི་མངའ་ཁོངས་ཆེ་ཤོས་ནང་བོད་མི་ཉུང་ཤས་ཤིག་ལས་མེད་ནའང་ང་ཚོས་མང་གཙོའི་ཁེ་དབང་ལོངས་སུ་སྤྱད་དེ་འོས་ཤོག་འཕེན་རྒྱུའི་གོ་སྐབས་བཟང་པོ་ཐོབ་ཡོད། ཅེས་གསུངས།དེ་བཞིན་ཁལ་མིག་ཁུལ་གྱི་བོད་མི་རྣམས་ཀྱིས་སྲིད་སྤྱི་གཉིས་ཀྱི་དངོས་གཞིའི་འོས་བསྡུར་ནུས་ཤུགས་གང་ཡོད་ཀྱིས་འོས་ཤོག་འཕངས་ཡོད། ཁུལ་དེའི་བོད་རིགས་སྤྱི་མཐུན་ཚོགས་པའི་ཚོགས་གཙོ་ངག་དབང་བློ་གྲོས་ལགས་ཀྱིས། འཛམ་གླིང་སྟེང་གི་རྒྱལ་ཁབ་གཞན་ནང་འོས་ཤོག་གིས་མི་མང་གི་འབྱུང་འགྱུར་ཐག་གཅོད་ཐུབ་རྒྱུ་ཡིན་པ་བཞིན། ད་ལན་འོས་ཤོག་གིས་རྒྱ་གར་གྱིས་གཙོས་ཕྱི་རྒྱལ་ཡུལ་གྲུ་ཁག་ཏུ་ཡོད་པའི་བོད་མི་དང་བོད་ཀྱི་འབྱུང་འགྱུར་ཐག་གཅོད་ཐུབ་རྒྱུ་ཡིིན་པས་ང་ལ་སེམས་འཚབ་དང་སྤྲོ་སྣང་གཉིས་ཀ་སྐྱེས་བྱུང་ཞེས་གསུངས།